Pʋ'ʋsim yir paal la yɛla
40
1 Tinamɛ da an yammisi bɛ teŋ zʋŋ la li yʋma pisi nɛ anu saŋa, ka li anɛ ban da nyaŋ Jerusalem la li yʋma pii nɛ anaasi saŋa, yʋʋm la pin'ilʋgʋn, li nwadig la dabpiiga daar, Zugsɔb la paŋ da bɛɛ m san'an, ka o nɔkim anina. 2 Wina'am la nier pʋʋgin, o da nɔkimi keŋ Israel teŋinɛ zi'elim zuor kanɛ wa'am hali zugin, ka li bɛ ya-datiuŋ baba la ka m nyɛ mɛɛb ka li zi'e nwɛnɛ tempʋʋg. 3 On mɔrimi paae ani la, ka m nyɛ dau ka o nyɛɛn nwɛnɛ kʋntzɛn'ug; ka o zi'e za'anɔɔrin la m mɔr nwiig kanɛ makid ka zanl daug kanɛ makid o nu'ugin. 4 Ka dau la yɛlim ye, “Ninsaal biiga, gɔsim nɛ fʋ nini ka wʋm nɛ fʋ tʋba ka kɛlis linɛ wʋsa ka m ye m pa'alif la, ka lin yɛla ka ba mɔrif kpɛla na. Yɛlim Israel dim la linɛ ka fʋ nyɛ wʋsa.”Za'anɔɔr kanɛ bɛ ya-nya'aŋi kpɛn'ɛd zakin la yɛla
5 Ka m nyɛ zaŋguom ka li mɛɛ gilig Wina'am Pʋ'ʋsim Yir la. Makir daug linɛ bɛ dau la nu'ugin la da anɛ nɔbir makir piiga. Ka o mak zaŋguom la ka li mugulim an makir daug yinne ka li wa'alim an daug la makir yinne.
6 Ani ka o keŋ za'anɔɔr kanɛ kpa' ya-nya'aŋ la. O da dʋʋ li dʋʋsa la ni maki li zanɔɔr la; ka zaŋguom la mugulim an makir daug la yinne. 7 Banɛ gur la dɔɔd la da bɛ za'anɔɔrin la, ka za'anɔya la yalʋŋ an makir daug yinne ka li wa'alim an daug la makir yinne. Ka dɔkpina banɛ bɛ dɔɔd la teŋsʋk la labisim an nɔbir makir anii. Ka mɛɛb linɛ bɛ zanɔɔr la tuonnɛ kpa' Pʋ'ʋsim Yir la zulʋŋ an makir daug la yinne.
8 Ka o mak za'anɔɔr la za'ambɛŋ la; 9 ka li mugulim an makir daug la yinne, ka li labisim an nɔbir makir anaasi. Ka za'ambɛŋ la kpa' Pʋ'ʋsim Yir la.
10 Za'anɔɔr linɛ bɛ ya-nya'aŋ la pʋʋgin da mɔr banɛ gur la dɔɔd atan' tan' dagɔbʋg nɛ datiuŋ wʋsa; dɔɔd la wʋsa makir anɛ yinne, ka dɔkpina banɛ baki ba la tɛbisim zem taaba. 11 Ka o maki li yalʋŋʋ paae za'anɔɔrin la; ka li an pii nɛ anu ka li wa'alim an pisi nɛ yinne. 12 Dɔɔd atan' la wʋsa tuon mɔr zaŋguom ka li wa'alim an nɔbir makir yinne nɛ pʋsʋk, ka dɔɔd la lʋga anaasi la makir an nɔba makir awai. 13 Ka o mak dɔɔd ayi' banɛ kpa' taaba za'anɔɔrin la ka li wa'alim makir an nɔba makir pistan' nɛ ayɔpɔi nɛ pʋsʋk. 14 Ka o maki gilig dɔbanɛ ka ba dɔlli kpɛn'ɛd la ti paae za'ambɛŋ la bɛn, ka li an nɔba makir piswai. 15 Lin yi za'anɔɔrin la keŋ paae za'ambɛŋ la makir bɛn la anɛ nɔba makir pisyɔpɔi nɛ anu. 16 Dɔɔd la dɔkpina banɛ bɛ pʋʋgin nɛ yiŋ la da mɔr takorobibisi gilig, ka za'ambɛŋ la mɛ da aan ala, ka takoronam la wʋsa kpa' pʋʋgin. Ka ba gʋl si'el ka li nwɛnɛ kpʋkparis vaandi tabili li dɔkpina la ni.
Zak kanɛ bɛ yiŋ la
17 Ka o mɔrimi kpɛn' zak kanɛ bɛ yiŋ la ni. Ani ka m nyɛ dɔɔd ka ba maal suorinɛ gilig zak la; dɔɔd pistan' da dɔlis suor la gilig. 18 Suor la da gilignɛ zak la paae za'anɔya la ka li yalʋŋ nɛ za'anɔya la wa'alim da zem taaba, nɛ'ɛŋa da anɛ suokanɛ bɛ teŋir la. 19 Ka o maki li pʋʋgin paae za'anɔɔr linɛ bɛ teŋir la keŋ yi zak kanɛ bɛ pʋʋgin la yiŋ, ka li ya-nya'aŋ la an nɔba makir kɔbiga nɛ pisnu wʋʋ li ya-datiuŋʋ an si'em la.
Ya-datiuŋ za'anɔɔr
20 Ka o mak za'anɔɔr kanɛ dɔlli yit zak kanɛ bɛ yiŋi kpa' ya-datiuŋ la wa'alim nɛ li yalʋŋ. 21 Za'anɔkaŋa da mɔr banɛ gur la dɔɔd atan' tan' li lʋga ayi' wʋsa ni. Li dɔkpina la nɛ li za'ambɛŋ la da zem nɛ taaba wʋʋ za'anɔkanɛ bɛ ya-nya'aŋ la. Li wa'alim anɛ nɔba makir pisyɔpɔi nɛ anu ka li yalʋŋ an pistan' nɛ ayɔpɔi nɛ pʋsʋk. 22 Li takoronam nɛ li zaŋguoma nɛ kpʋkparis vaand banɛ ka ba gʋli tabili li dɔkpina la makir anɛ yinne wʋʋ za'anɔɔr kanɛ kpa' ya-nya'aŋ la. Li dʋʋsa la anɛ ayɔpɔi ka li za'ambɛŋ la kpa' li. 23 Za'anɔɔr da bɛɛ kpɛn'ɛd zak kanɛ bɛ pʋʋginɛ kpa' ya-datiuŋ la wʋʋ ya-nya'aŋ din la mɔr si'em la. Ka o mak za'anɔya banɛ kpa' taaba la lal nɛ taaba si'em; ka li an nɔba makir kɔbiga nɛ pisnu. 24 Ka o dɔllimi lɛb ya-dagɔbʋg baba ka m nyɛ za'anɔɔr kanɛ kpa' zin'ikan la. Ka o maki li dɔkpina banɛ bɛ pʋʋgin la nɛ li za'ambɛŋ la, ka li zem nɛ za'anɔbama la. 25 Za'anɔɔr la nɛ li za'ambɛŋ la mɔr takoronamɛ gilig nwɛnɛ bama la mɔr si'em la. Ka li wa'alim an nɔba makir pisyɔpɔi nɛ anu ka li yalʋŋ an pistan' nɛ ayɔpɔi nɛ pʋsʋk. 26 Dʋʋsa ayɔpɔi ka fʋ na dʋʋ paae li, ka li za'ambɛŋ la kpa' zak la. Ka ba gʋl kpʋkparis vaandi tabili li dɔkpina la lʋga ayi' la wʋsa. 27 Zak kanɛ bɛ pʋʋgin la mɛ mɔr za'anɔɔr ka li kpa' ya-dagɔbʋg baba, ka o mak za'anɔkaŋa keŋ paae za'anɔɔr kanɛ bɛ yiŋ ya-dagɔbʋg baba la, ka li an nɔba makir kɔbiga nɛ pisnu.
Za'anɔbanɛ kpɛn'ɛd zak kanɛ bɛ pʋʋgin la
28 Ka o mɔrimi dɔl za'anɔɔr kanɛ bɛ ya-dagɔbʋgʋ kpɛn' zak kanɛ bɛ pʋʋgin la, ka mak za'anɔkan la ka li an yinne nɛ za'anɔbama la. 29 Banɛ gur la dɔɔd nɛ li dɔkpina banɛ bɛŋ la nɛ li za'ambɛŋ la makir anɛ yinne. Li za'anɔɔr nɛ li za'ambɛŋ la mɔr takoronamɛ giligi li. Ka li wa'alim an nɔba makir pisyɔpɔi nɛ anu ka li yalʋŋ an pistan' nɛ ayɔpɔi nɛ pʋsʋk. 30 (Za'ambɛmis banɛ bɛ za'anɔya nii gilig zak la wa'alim da anɛ nɔbir makir pisyɔpɔi nɛ anu ka li yalʋŋ an pistan' nɛ ayɔpɔi.) 31 Li za'ambɛŋ la kpa' nɛ zak kanɛ bɛ yiŋ la; ka ba gʋl kpʋkparis vaandi tabili li dɔkpina la, ka li mɔr dʋʋsa anii dʋti li ni.
32 Ka o mɔrimi kpɛn' zak kanɛ bɛ pʋʋgin ya-nya'aŋ baba la, ka maki li za'anɔɔr la; ka li makir an yinne nɛ bama la. 33 Banɛ gur la dɔɔd nɛ li dɔkpina nɛ li za'ambɛŋ la makir zem nɛ taaba wʋʋ bama la. Za'anɔɔr la nɛ li za'ambɛŋ la mɔr takoronamɛ gilig. Ka li wa'alim an nɔba makir pisyɔpɔi nɛ anu ka li yalʋŋ an pistan' nɛ ayɔpɔi nɛ pʋsʋk. 34 Banɛ gur la dɔɔd da kpa' nɛ zak kanɛ bɛ yiŋ la; ka ba gʋl kpʋkparis vaandi tabili li dɔkpina la, ka dʋʋsa anii dʋti li ni.
35 Ka o mɔrimi lɛb za'anɔɔr kanɛ bɛ ya-datiuŋ la ka maki li. Ka li makir an yinne nɛ bama la, 36 nwɛnɛ banɛ gur dɔbama la an si'em la, nɛ li dɔkpina nɛ li za'ambɛŋ la, ka li mɔr takoronamɛ gilig. Li wa'alim anɛ nɔba makir pisyɔpɔi nɛ anu ka li yalʋŋ an pistan' nɛ ayɔpɔi nɛ pʋsʋk. 37 Li za'ambɛŋ la da kpa' nɛ zak kanɛ bɛ yiŋ la; ka ba gʋl kpʋkparis vaandi tabili li dɔkpina la li lʋga ayi' wʋsa, ka ba maal dʋʋsa anii paae za'anɔɔr la bɛn.
Dɔbanɛ ka ba ti'ebid maana la'adi li pʋʋgin la
38 Zak kanɛ bɛ yiŋ la za'anɔya la mɔr dɔsieba linɛ da mɛɛ tabili li za'ambɛmis la. Zin'iban la ka ba piesid bʋnkɔnbid banɛ ka ba maan nyu'or maana la. 39 Za'anɔya banɛ bɛ za'ambɛmis pʋʋgin la teebulnam ayi', yi' zi'e ani, ani ka ba kɔtid bʋnkɔnbid banɛ ka ba maan nyu'or maan, nɛ tʋʋmbɛ'ɛd maan nɛ taal maana la. 40 Za'ambɛmis la yiŋ, zin'ikanɛ kpi'e nɛ dʋʋsa linɛ dʋti kpɛn'ɛd ya-datiuŋ za'anɔɔr la, teebulnam ayi' da bɛɛ ani ka ayi' mɛ bɛ dʋʋsa la zin'ikanɛ kpɛlim la. 41 Alazug za'anɔɔr la zin'ig yinne mɔri teebulnam anaasi ka zin'ig yinne mɛ mɔri anaasi. Maana kɔnbid la ka ba kɔtid teebul sieba zug la la'as nɛ teebulnam anii. 42 Teebulnam anaasi da lɛm bɛ ka ba kpi'e kuga maali li ka maan nyu'or maana li zug, yinne wʋsa wa'alim anɛ nɔbir makir ayi' nɛ bi'ela, ka li yalʋŋ mɛ an nɔbir makir ayi' nɛ bi'ela, ka lin naam teŋin dʋ zugin la mɛ an yinne nɛ pʋsʋk. Ban zug ka ba pa'an la'abanɛ ka ba mɔri maan nyu'or maana la nɛ maana banɛ kpɛlim la. 43 Ka ba kpa' kʋnt gɔna tabil dɔkpin la gilig ka li labisim zem wʋʋ nu'ug nɛ ka li mɔr nɔya ayi', yi'. Ba da mɔri maan la ni'imi pa'an teebulnam la zug.
Maanmaannib dɔɔd
44 Za'anɔɔr kanɛ da bɛ pʋʋgin zak la pʋʋgin la, dɔɔd ayi' da bɛɛ ani; dɔɔd ayi' da bɛ pʋʋgin la ka yinne tabi ya-datiuŋ za'anɔɔri kpa' ya-dagɔbʋg ka yinne mɛ tabi ya-dagɔbʋg za'anɔɔri kpa' ya-datiuŋ. 45 Ka o yɛlim ye, “Dɔkanɛ kpa' ya-dagɔbʋg la anɛ maanmaannib banɛ gɔsid Pʋ'ʋsim Yir la dɔɔg, 46 ka dɔkanɛ kpa' ya-datiuŋ la anɛ maanmaannib banɛ gɔsid bimbim la din. Bama anɛ Levi dim banɛ an Zadok yaas ka li nar ka ba li'en Zugsɔb la tʋmmi tisid o.”
47 Ka o mak zak la ka li an bʋmmauk: ka li wa'alim nɛ li yalʋŋ an nɔbir makir kɔbiga nɛ pisnu. Ka maan daka la zi'e Pʋ'ʋsim Dɔɔg la tuon.
Pʋ'ʋsim Dɔɔg la
48 Ka o mɔrimi keŋ Pʋ'ʋsim Dɔɔg za'ambɛŋin la, maki li zaŋguoma la; ka li an nɔbir makir ayɔpɔi nɛ pʋsʋk zin'ig wʋsa. Za'anɔɔr la yalʋŋ anɛ nɔbir makir pisi nɛ yinne ka li zaŋguoma linɛ bɛŋ la an makir anaasi nɛ pʋsʋk li zin'ig wʋsa. 49 Za'ambɛŋ la yalʋŋ anɛ nɔba makir pistan' ka lin yii li tuonnɛ paae li nya'aŋ la an nɔba makir pii nɛ anu. Li mɔr dʋʋsa ka fʋ na dɔlli kpɛn', ka buos bɛ zanɔɔr la kpikpɛŋ, ka zin'ig wʋsa mɔr bua yinne.