39
1 Ninsaal biiga, di'emi m nɔɔr pian'ad linɛ ka m zɛrig Gog la tis o ka yɛl o ye, “Zugsɔb onɛ an Paŋtita'ar Sɔb la yɛl si'eli nwa ye, ‘Fʋn Gog onɛ an Mesek nɛ Tubal na'atita'ar la, fʋ anɛ m dataa. 2 M na fɛndigif ka vuugi fʋ keŋ. M na mɔri fʋ yi ya-datiuŋ linɛ bɛ lalli la mɔri fʋ keŋ kpan'al nɛ Israel zuoya la. 3 Ani ka m na nwɛ' fʋ tiraug linɛ bɛɛ fʋ dagɔbʋg nu'ugin la, ka piema la naanɛ fʋ datiuŋ nu'ugin li. 4 Fʋn nɛ zabzabidib nɛ tɛɛns banɛ sʋŋidif la na kpi Israel zuoya la ni. M na kɛ ka ya niŋgbina lieb diibi tis niis nɛ sian'arin bʋnkɔnbid. 5 Ya na kpi paalʋ ni.’ Zugsɔb onɛ an Paŋtita'ar Sɔb la pian'ʋkʋ la. 6 ‘M na kɛ ka bugum la'aŋ Magog teŋ la nɛ banɛ bɛɛ atɛuk nɔɔrin ka yɛlsi'a pʋ daamidi ba la, ala ka ba na baŋ ye manɛ an Zugsɔb la.7 “ ‘M na kɛ ka Israel dim baŋi m yʋ'ʋr kanɛ an kasi la. M kʋ lɛn kɛ ka ba san'ami m yʋ'ʋrɛ, ala ka tɛɛns la na baŋ ye manɛ an Israel Zugsɔb onɛ an Kasi la. 8 Li kenna; li sid na maal.’ Zugsɔb onɛ an Paŋtita'ar Sɔb la pian'ʋkʋ la. ‘Dabiskaŋa yɛla la ka m pian' la. 9 Ala ka banɛ bɛ Israel tempʋʋsin la na vaae Gog nɛ o nidib la zaba la'ad la na ka li lɛbig bʋntuguda, ka nyu'oe gbanti'edis banɛ an bʋmbɛda nɛ bʋmbibis la. Ba na nyu'oe tiraad nɛ piema nɛ balaya nɛ kpana. Ba na nyɔ'ɔdi li yʋma ayɔpɔi. 10 Ba kʋ keŋ pi'is daad bɛɛ ba keŋ sian'arin nwa daadɛ, bɔzugɔ ba na zaŋ zaba la'ad la tugul bugum. Banɛ vaae ba la'ad la, ba mɛ na vaae ba la'ad, ka banɛ faaɛn ba la'ad, ba na faaɛn ba mɛn.’ Zugsɔb onɛ an Paŋtita'ar Sɔb la pian'ʋkʋ la.
11 “Daakan la ya'a ti paae, m na mum Gog Israel teŋin, Suokennib Bɔn'ɔg linɛ bɛ atɛuk nya'aŋ la. Li na vi' suokennib suor bɔzugɔ, ba na mum Gog nɛ o nidib la wʋsa anina. ‘Alazugɔ ba na buonnɛ li ye Hamon Gog Bɔn'ɔg la.’a
12 “Nwadis ayɔpɔi ka Israel dim na nɔki mumi ba, ye li sʋŋ ka teŋ la an nyain. 13 Nidib banɛ bɛ teŋin la wʋsa na mumi ba, ka daakanɛ ka m na nyɛ zun'or la na an dabistita'are tisi ba. Zugsɔb onɛ an Paŋtita'ar Sɔb la pian'ʋkʋ la.
14 “Nwadis ayɔpɔi la nya'aŋ, ba na bɔ dap ka ba maal teŋ la nyain, ba na kɛ ka dap sieba mɛ giligidi pi'isid banɛ kpii wɛɛl la mum. 15 Ban giligid teŋin la, onɛ wʋsa nyɛ ninsaal kɔnbir na sɛ si'eli maal zanbin ka bayaas la ti paae na nɔki mum Hamon Gog Bɔn'ɔgin la. 16 (Tempʋʋg kanɛ yʋ'ʋri buon Hamona la na bɛɛ ani.) Ka ba mɛ na maal teŋ kan la nyain.”
17 Zugsɔb onɛ an Paŋtita'ar Sɔb la yɛl si'eli nwa ye, “Ninsaal biiga, buolim niimis buudi wʋsa nɛ sian'anr bʋnkɔnbid la wʋsa, ye, ‘La'asimi na zi'enɛ gilig maan linɛ ka m ti'ebid ye m tisi ya, Israel zuoya la ni la. Ani ka ya na ɔnb ni'im ka nu ziim. 18 Ya na ɔnb nintitada ni'im ka nu teŋin la na'abiis ziim, ka li nwɛnɛ ba anɛ Basan pɛraad nɛ pɛbibis, nɛ bʋʋs nɛ na'araad banɛ nɔb la. 19 Maan linɛ ka m ti'ebid ye m tisi ya la, ya na ɔnb ni'im linɛ mɔr kpaam ka ya pʋya pid, ka nu ziim kʋʋl. 20 M diib zin'igin la, ya na ɔnb widi nɛ banɛ ban'adi ba la, nɛ nintitada nɛ soogianam nɛ ba buudi wʋsa.’ Zugsɔb onɛ an Paŋtita'ar Sɔb la pian'ʋkʋ la.”
21 “M na pa'alim na'am paŋ tɛɛns la sʋʋgin, ka tɛɛns la wʋsa na nyɛ namisʋg kanɛ ka m na mɔri kɛɛn ba zugin na nɛ m paŋ kanɛ ka m na tʋmi ba san'an la. 22 Lin yi daakanɛ ken la, Israel dim na baŋ ye manɛ aan ba Zugsɔb Wina'am la. 23 Ka tɛɛns la na baŋ ye Israel dim la tʋʋmbɛ'ɛdi kɛ ka ba lɔ'ɔŋ teŋ zʋŋ, ban da pʋ dɔllim nɛ sida la zug, ka m fɛndig ka basi ba, ka nɔki ba niŋi ba dataas nu'usin, ka ba kʋʋ ba wʋsa. 24 M maali ba nɛ wʋʋ ba dian'ad nɛ ba pɔ'ɔgiri an si'em la, lin ka m fɛndig ka basi ba.” 25 Dinzugɔ, Zugsɔb Onɛ an Paŋtita'ar Sɔb la yɛl si'eli nwa ye, “M yʋ'ʋn na mɔr Jakob nidib la lɛbis na, ka zɔ Israel dim la wʋsa nimbaanlig, ka na mɔr ya'amlɛog nɛ m yʋ'ʋr kanɛ an kasi la. 26 Ba ya'a ti lɛbi zin'inɛ ba teŋin la ka sɔ' kae na kpɛn'ɛsi ba dabiem. Ba na tami ba nyan la yɛla, nɛ ban da pʋ tisidi m sida si'em la. 27 M ya'a ti mɔri ba yi tɛɛnsin la lɛb na ka la'asi ba yi zin'ibanɛ ka ba widigi kpɛn' ba dataas san'an la, m na dɔlisi baa pa'alim mɛŋ ye m anɛ kasi tɛɛns la sʋʋgin. 28 Lin ka ba na baŋ ye manɛ aan ba Zugsɔb Wina'am la, la'am nɛ man da kadi ba kpɛn'ɛs sankpan'asim tɛɛns la sʋʋgin la, M na la'asi ba, ba mɛŋ teŋin, ka kʋ bas baa yinnee. 29 M kʋ lɛn fɛndig ka kɛɛ baa, bɔzugɔ m na kpa'ae m Siig la niŋ Israel dimin.” Zugsɔb onɛ an Paŋtita'ar Sɔb la pian'ʋkʋ la.