Gog yɛla
38
1 Zugsɔb la pian'ad da kɛɛn m san'an na ye, 2 Ninsaal biiga, ʋkimi fʋ nindaa kpa' Gog onɛ bɛ Magog teŋin la, ka o anɛ na'atita'ar kanɛ sʋ'oe Mesek nɛ Tubal tɛɛns la. Di'emi m nɔɔr pian'ad linɛ ka m zɛrig o la tis o 3 ka yɛl ye, Zugsɔb onɛ an Paŋtita'ar Sɔb la yɛl si'eli nwa ye, “Gog, m anɛ fʋ dataa. 4 M na fɛndigif, ka nɔk gu'osi gban'e fʋ yieri mɔri fʋ yis na, fʋn nɛ fʋ zabzabidib la wʋsa, banɛ an widi nɛ wiedban'adib banɛ ti'eb zaba sʋ'ʋŋa la, nɛ zabzabidib banɛ zu'oe ka yɛ zaba fuud ka mɔr gbanti'edis linɛ an bʋmbɛda nɛ bʋmbibis la, ka ba wʋsa ti'eb nɛ ba zaba sʋ'ʋs. 5 Pesia dim nɛ Kus dim nɛ Put dim na bɛ nɛ ba, nɛ ba gbanti'edis nɛ ba kʋnt zupibis. 6 Goma dim nɛ ba zabzabidib wʋsa na bɛ, nɛ Bet Togama dim banɛ bɛ ya-datiuŋ baba lalli la nɛ ba zabzabidib wʋsa; tɛɛns bɛdegʋ bɛɛ fʋ san'an.7 “Ti'ebim, fʋn nɛ nimbanɛ la'asi giligif la, ka tisi ba nɔɔr. 8 Yʋma bɛdegʋ nya'aŋ, ba na buoli ya ye ya yim zaba na. Yʋma banɛ na ti kena la, fʋ na kpɛn' teŋ kanɛ ka ba da zabi nyaŋi ba ka ba yʋ'ʋn paam yɔlisim la. Ba da bas teŋ kaŋa ka li yuug, ka nidib yʋ'ʋn la'as tɛɛns bɛdegʋ nii lɛb Israel zuoya la ni na. Ba mɔri ba yis tɛɛnsin la na, ka ba yʋ'ʋn bɛ nɛ sumalisim nannanna. 9 Fʋn nɛ fʋ zabzabidib la wʋsa, nɛ tɛɛns bɛdegʋ banɛ la'as nɛf la, na keŋ ani kpɛn'ɛd tɔ'ɔtɔ wʋʋ sisi'em nɛ, ka ya na nwɛnɛ saŋgbana lusi ba teŋ la.”
10 Zugsɔb onɛ an Paŋtita'ar Sɔb la yɛl si'eli nwa ye, “Daakan la ya'a paae, pʋtɛn'ɛsi'a na kɛɛn fʋ san'an na, ka fʋ na gban'e gban'abɛ'ɛd. 11 Fʋ na yɛl ye, ‘M na zab nɛ teŋkpɛmis nɛ tembibis banɛ pʋ mɔr zaŋguoma la. M na zab nɛ teŋ kanɛ zin' baanlimm nɛ sumalisim, nɛ nimbanɛ pʋ mɔr ti'ir si'a ka ba tɛɛns la pʋ mɔr zaŋguoma nɛ za'anɔya kparid la. 12 M na faaɛn ka vaae la'ad ka zab nɛ banɛ lɛbi zin'in dabɔɔdin la, nɛ banɛ ka ba la'asi ba yi tɛɛnsin la lɛbis na la, ka ba mɔr bʋnkɔnbid nɛ la'ad ka zin' teŋ la teŋsʋk la.’ 13 Seeba teŋ dim nɛ Dedan teŋ dim nɛ Tarsis dim banɛ kpiisid la nɛ ba tembibis la na bu'osif ye, ‘Fʋ kena ye fʋ zu ka faan? Fʋ la'asi fʋ nidib la ye ya zu ka vaae anzurifa nɛ sanlima, ka kad bʋnkɔnbid ka fan' ka vaae la'ad bɛdegʋʋ?’ ”
14 Dinzugɔ, Ninsaal biiga, tu'asim nɔdi'es antu'a tis Gog ye, Zugsɔb onɛ an Paŋtita'ar Sɔb la yɛl si'eli nwa: Lin saŋa la, Israel dim ya'a ti bɛ nɛ sumalisim, fʋ na baŋ. 15 Fʋn nɛ tɛɛns bɛdegʋ na yi ya-datiuŋ baba kena. Nidib la na zu'oe ka an zabzabidib banɛ kpi'em, ka ba wʋsa ban'ad widi. 16 Ya na zabid nɛ m nidib Israel dim la, ka ya na nwɛnɛ saa nɛ saŋgbana na pil teŋgbauŋ la nɛ. Gog, saŋa kenna ka m na kɛ ka fʋ zab nɛ m teŋ la ka tɛɛns la baŋim, m ya'a ti pa'al ye m anɛ kasi ka li yinɛ fʋn san'an na ka ba nini nyɛ. 17 Zugsɔb onɛ an Paŋtita'ar Sɔb la yɛl si'eli nwa ye, Ka' fʋn ka m da dɛŋi pian' tisim nɔdi'esidib banɛ bɛ Israel ka ba pian' fʋ yɛla laa? Ba da pian' ye saŋa kenna ka m na kɛ ka fʋ zab nɛ ba. 18 Daakanɛ ka Gog duoe zab nɛ Israel teŋ la, m sʋʋnr na duoe. Zugsɔb Paŋtita'ar Sɔb la pian'ʋkʋ la. 19 M nini ya'a ti mu'oe ka m sʋnf duoe, Israel teŋ la na dam hali. 20 Zimi banɛ bɛ atɛukʋn la, nɛ niis banɛ ian'ad agɔla, nɛ bʋnkɔnbid banɛ ken teŋin la, nɛ bʋnvuuda banɛ vuud teŋin la nɛ nimbanɛ bɛ teŋgbauŋ la zug la wʋsa na kiridi m tuon. Zuoya la na tʋlig, ka zuobanɛ an gbɛʋʋ la kɔɔ li na, ka zaŋguoma wʋsa lii paae teŋ. 21 M na kɛ ka ba zab nɛ Gog m zuoya la ni wʋsa. Zugsɔb onɛ an Paŋtita'ar Sɔb la pian'ʋkʋ la. Ka sɔ' wʋsa na zabid nɛ o ba'abiig. 22 M na namis o ka kɛ ka ban'as nɛ kum paae o; m na kpa'ae saa nɛ sisi'em nɛ sakuga nɛ kidibir linɛ nyɛligid la niŋ on nɛ o zabzabidib la zugin nɛ tɛɛns bɛdegʋ banɛ kpɛn'ɛd o zug la. 23 Ala ka m na pa'alim kpi'euŋ nɛ man an kasi si'em, ka kɛ ka tɛɛns bɛdegʋ baŋim. Lin ka ba na baŋ ye manɛ an Zugsɔb la.