Kɔnbkpi'emis bɔn'ɔg
37
1 Zugsɔb la paŋ daa bɛɛ m san'an, ka o yisim nɛ o Siig la paŋi zi'elim bɔn'ɔg sʋʋgin; ka kɔnba ma'aa da pɛ'ɛl anina. 2 Ka o mɔrimi gilig bɔn'ɔg la wʋsa, ka m nyɛ kɔnba bɛdegʋ ka li dig bɔn'ɔgin la. Kɔnba la da kʋdignɛ hali. 3 Ka o bu'osim ye, “Ninsaal biiga, kɔnbbama na lɛn nyaŋi vʋ'ʋgɛɛ?”Ka m lɛbisi yɛl o ye, “Zugsɔb onɛ an Paŋtita'ar Sɔba, fʋn ma'aa mi'.”
4 Ani ka o yɛlim ye, “Di'emi m nɔɔr pian'adi tis kɔnba nwa ka yɛli ba ye, ‘Yanam kɔnba banɛ kʋdigɛ, kɛlisimi Zugsɔb la pian'ad! 5 Zugsɔb onɛ an Paŋtita'ar Sɔb la yɛt kɔnbbama si'em nwa: M na kɛ ka vʋ'ʋsʋm kpɛn' ya ni, ka ya na vʋ'ʋg. 6 M na kɛ ka ya giinla lɛb na, ka kɛ ka ya niŋgbina lɛb na, ka kɛ ka niŋgbina la gbauŋ lɛb na. M na niŋ vʋ'ʋsʋm ya ni, ka ya na vʋ'ʋg. Ala ka ya na baŋ ye manɛ an Zugsɔb la.’ ”
7 Ala ka m sid di'e o nɔɔr pian'adi tisi ba wʋʋ on yɛlim si'em la. Ka mam bɛɛ ani pian'ad la ka m wʋm ka li dammid nwɔnr-nwɔnr, ka kɔnba la la'as taaba ka kɔnbir wʋsa tɔ'ɔŋ nɛ o tiraan. 8 Ka m gɔsi nyɛ giinla nɛ niŋgbina nɛ niŋgbiŋ gbauŋ ka li lusi ba, amaa ka vʋ'ʋsʋm lɛɛ ka' ba pʋʋginɛ.
9 Ani ka o yɛlim ye, “Di'emi m nɔɔr pian'adi tis vʋ'ʋsʋm la; pian'am, Ninsaal biiga, ka yɛl ye, ‘Zugsɔb onɛ an Paŋtita'ar Sɔb la yɛl si'eli nwa ye, Vʋ'ʋsʋm! Yim dunia lʋga anaasi la na vʋ'ʋsi niŋ banɛ kpii dig nwa, ka ba nyɛ vʋm.’ ” 10 Ka m sid di'e o nɔɔr pian'adi tisi ba wʋʋ on yɛlim si'em la, ka vʋm kpɛn' ba ni; ka ba vʋ'ʋg ka duoe zi'en. Ba da anɛ dap banɛ zu'oe zemis zaba ken.
11 Ka o yɛlim ye, Ninsaal biiga, kɔnbbama anɛ Israel dim. Ba yɛl ye, Ti kɔnba kʋdig ya ka ti pʋ lɛm mɔr ti'irɛ; tinam yɛla naae ya. 12 Dinzugɔ, di'emi m nɔɔr pian'adi yɛli ba ye, Zugsɔb onɛ an Paŋtita'ar Sɔb la yɛl si'eli nwa ye, “M nidiba, m ye m yɔ'ɔsnɛ ya yaad ka yisi ya na. M na mɔri ya lɛb Israel teŋin na. 13 Lin ka m nidib la na baŋ ye manɛ an Zugsɔb la, m ya'a ti yɔ'ɔs yaad la ka yisi ya na. 14 M na nɔki m Siig la niŋi ya pʋʋgin ka ya na vʋe, ka m na zin'ili ya, ya mɛŋ teŋin. Lin ka ya na baŋ ye man Zugsɔb la sid pian' li ka tʋmi li.” Zugsɔb la pian'ʋkʋ la.
Juda nɛ Israel na an sʋ'ʋlim yinne
15 Zugsɔb pian'ad da kɛɛn m san'an na ye, 16 Ninsaal biiga, nɔkim duori sɔb ka li an Juda dim sʋ'ʋlim din. Nɔkim duor yinne ya'asi sɔb ka li an Israel dim sʋ'ʋlim din. 17 Nɔkimi ba tɔ'ɔŋ taaba ka li lieb yinne fʋ nu'ugin.
18 Fʋ teŋ la dim ya'a ti bu'osif ye, Fʋ kʋ yɛli ti nɛ'ɛŋa gbinnɛɛ? 19 Fʋn yɛlimi ba ye, Zugsɔb onɛ an Paŋtita'ar Sɔb la yɛl si'eli nwa ye, “M ye m nɔknɛ duor kanɛ zi'e Israel yɛla la la'as nɛ duor kanɛ zi'e Juda yɛla la. M na la'asi babayi' la ka li an duor yinne m nu'ugin.” 20 Mɔr duobanɛ ka fʋ sɔbi niŋi ba zug la na ka ba nini nyɛ 21 ka yɛli ba ye, Zugsɔb onɛ an Paŋtita'ar Sɔb la yɛl si'eli nwa ye, M na yis Israel dim tɛɛns banɛ ka ba bɛ la ni. M na la'asi ba zin'ibanɛ gilig la wʋsa mɔri ba na lɛbisi ba mɛŋ teŋin. 22 M na kɛ ka ba lieb buudi yinne bɛ teŋgbauŋʋn la, Israel zuoya la ni. Ba wʋsa na mɔr na'ab yinne, ka ba kʋ pʋdigi an tɛɛns ayi' bɛɛ sʋ'ʋlimnam ayi' ya'asɛ. 23 Ba kʋ lɛn dian'a ba mɛŋ nɛ ba bada la, nɛ linɛ ka ba ya'ab bɛɛ kpi'a la, bɛɛ ba tʋʋmbɛ'ɛd banɛ ka ba tʋm la. Bɔzugɔ m na faaɛn baa ba tʋʋmbɛ'ɛd linɛ kɛ ka ba lɛbid nya'aŋ la ni ka pie ba. Ka ba na aan m nidib, ka man na aan ba Wina'am.
24 “M tʋmtʋm David na aan ba na'ab, ka ba wʋsa na mɔr kɔnbkem yinne. Ba na dɔlli m wada la ka na gu'usid ka dɔlisidi m zi'ela la. 25 Ba na bɛ teŋ kanɛ ka m da tisim tʋmtʋm Jakob, ka ya yaanam da bɛ la. Ban nɛ ba biis nɛ ba yaas na bɛɛ ani saŋa wʋsa, ka David onɛ aan m tʋmtʋm la na aan ba na'ab saŋa wʋsa. 26 M na maal sumbʋgʋsʋm nɔnaar nɛ ba; li na anɛ nɔnaar linɛ bɛ saŋa wʋsa. M na zin'ili ba ka kɛ ka ba kal zu'oe, ka na zi'eli m Pʋ'ʋsim Yir la ba sʋʋgin saŋa wʋsa. 27 M bɛllim zin'ig na bɛɛ ba san'an. M na aan ba Wina'am, ka ba mɛ na aan m nidib. 28 Lin ka tɛɛns la na baŋ ye man Zugsɔb la maal Israel ka ba an kasi, m Pʋ'ʋsim Zin'ig la ya'a bɛɛ ba san'an saŋa wʋsa.”