Israel zuoya la yɛla
36
1 Ninsaal biiga, di'emi m nɔɔr pian'ad linɛ ka m zɛrig Israel zuoya la tisi ba ye, Yanam Israel zuoya, kɛlisimi Zugsɔb la pian'ad. 2 Zugsɔb onɛ an Paŋtita'ar Sɔb la yɛl si'eli nwa: “Dataa la yɛli ya yɛla ye, ‘Ha haa! Kʋkʋn kʋda la yʋ'ʋn anɛ ti bʋn.’ ” 3 Dinzugɔ, pian'am yɛl ye, Zugsɔb onɛ an Paŋtita'ar Sɔb la yɛl si'eli nwa ye, “Ban da dɔlli ya zin'ig wʋsa zabidi faandi ya, ka kɛ ka tɛɛns banɛ kpɛlim la sʋ'ʋgi ya, ka kɛ ka nidib kɛɛndi ya ka san'amidi ya yʋ'ʋr la. 4 Alazug, Israel zuoya, wʋmmi Zugsɔb Onɛ an Paŋtita'ar Sɔb la pian'ad. Zugsɔb onɛ an Paŋtita'ar Sɔb la mɔr yɛlsi'a tisid zuoya nɛ kʋkʋna la nɛ ku'osuoya nɛ bɔn'ɔd nɛ dabɔɔd banɛ ka nidib kae, nɛ tempʋbanɛ ka dataas faaɛn ka ba zɔ ka bas, ka tɛɛns banɛ giligi ba la wʋsa la'adi ba la. 5 Zugsɔb onɛ an Paŋtita'ar Sɔb la yɛl si'eli nwa ye, ‘M sʋnfʋ la'aŋ bugum la zug ka m pian' tɛɛns nwa yɛla, la'am nɛ Edom dim wʋsa, ba sʋnfʋ ma'ae ka ba kisigi ya, ka nɔki m teŋ la maali ba din ka faaɛn teŋ la zin'ibanɛ mɔr yaama sʋ'ʋŋa la zug.’ ” 6 Dinzugɔ, di'emi m nɔɔr pian'adi tis Israel teŋ la, ka yɛl zuoya nɛ zuobibis la, yɛlim ku'osuoya nɛ bɔn'ɔd la ye, “Zugsɔb onɛ an Paŋtita'ar Sɔb la yɛl si'eli nwa ye, ‘M pian'adnɛ nɛ fufum nɛ sʋnpɛɛn, tɛɛns banɛ bɛ la tʋ'ʋdi ya si'em la zug.’ 7 Dinzugɔ, Zugsɔb onɛ an Paŋtita'ar Sɔb la yɛl si'eli nwa ye, ‘M pɔ ya, tɛɛns banɛ giligi ya la na namis nɛ tʋ'ʋd mɛn.’8 “Amaa yanam banɛ an Israel zuoya la, ya na tɔn wila ka wal wala tisim nimbanɛ an Israel dim la, bɔzugɔ li kʋ yuugɛ ka ba kul yin na. 9 M ba' bɛɛ ya san'an, ka m na sʋŋi ya ka ya na kua ka bʋd ya'as, 10 ka na kɛ ka ya nidib kal zu'oe teŋin la, hali li na anɛ Israel dim mummi. Tempʋʋs la na mɔr nidib ka ba na lɛbisi mɛ dabɔɔd la. 11 M na kɛ ka ya nidib nɛ ya bʋnkɔnbid la zu'oe, ba na wiak ka ba kal zu'oe. M na kɛ ka nidib zin'in teŋin la wʋʋ saŋa kanɛ da gaad la da an si'em la, ka si'el wʋsa na an sʋ'ʋŋa gaad lin da an si'em la. Ala ka ya na baŋ ye manɛ an Zugsɔb la. 12 M na kɛ ka m nimbanɛ an Israel dim la nɔɔdi ya zugʋ ken. Ba na sʋ'ʋgi ya, ka ya na liebi ba faar; ya kʋ lɛn faaɛn ba biis ya'asɛ.”
13 Zugsɔb Onɛ an Paŋtita'ar Sɔb la lɛn yɛl Israel teŋ zuoya nɛ kʋkʋna la si'eli nwa ye, “Nidib yɛti ya ye, ‘Ya kʋʋd nidib ka kɛ ka ya nidib la kɔ'ɔŋi ba biis.’ 14 Dinzugɔ, ya kʋ lɛn kʋ nidib ka kɛ ka ba kɔ'ɔŋi ba biisɛ.” Zugsɔb Onɛ an Paŋtita'ar Sɔb la pian'ʋkʋ la. 15 “M kʋ lɛn kɛ ka ya wʋm ka tɛɛns nɛ'ɛsidi yaa, ya mɛ kʋ lɛn wʋm ka nidib la'adi ya bɛɛ kɛ ka teŋ la nidib kɔ'ɔŋi ba biisɛ.”
16 Zugsɔb la pian'ad kɛɛn m san'an na ya'as ye, 17 Ninsaal biiga, Israel dim la da bɛɛ ba mɛŋ teŋin la, ba tʋʋma nɛ ba itʋŋ pʋʋgin da kɛ ka teŋ la an dian'ad. Ba dian'ad la da an si'em man san'an nwɛnɛ nwadig-nwadig ka pu'a nyɛt pier ka li an si'em la. 18 M da kpa'ae m sʋnpɛɛn la yɛɛli ba bɔzugɔ ba da kɛ ka teŋ la pɛ'ɛl nɛ ziim, nɛ ban nɔki ba bada la miligi li la zug. 19 M widigi ba kpɛn'ɛs tɛɛnsin la, ka ba widigi kpɛn' sʋ'ʋlimnamin la, M kadi ba saria ka li dɔlli ba tʋʋma nɛ ba itʋŋʋ an si'em. 20 Ban keŋ zin'isi'a wʋsa kpɛn' tɛɛnsin la, nidib san'amidi m yʋ'ʋri yɛt ye, “Bama anɛ Zugsɔb la nidib, la'am nɛ wala ka o kɛ ka ba yi ka bas o teŋ la.” 21 M ba'a bɛ nɛ m yʋ'ʋr kanɛ an kasi la yɛla, linɛ ka Israel dim san'ami li tɛɛns la sʋʋgin la, ban keŋ zin'isi'a wʋsa ba san'amidi li nɛ.
22 Dinzugɔ yɛlim Israel dim ye, Zugsɔb onɛ an Paŋtita'ar Sɔb la yɛl si'eli nwa ye, Israel dima, li ka' yanam yɛla ka m ye m niŋ nɛ'ɛnama, amaa li anɛ m yʋ'ʋr kanɛ an kasi la zug, linɛ ka ya san'ami li tɛɛns banɛ wʋsa ka ya kpɛn' ba ni la. 23 M na pa'alim yʋ'ʋtita'ar la an kasi si'em, linɛ ka ba san'ami li tɛɛns la sʋʋgin la, yʋ'ʋr kanɛ ka ya san'ami li ba sʋʋgin la. Ala ka tɛɛns la na baŋ ye manɛ an Zugsɔb la, Zugsɔb onɛ an Paŋtita'ar Sɔb la pian'ʋkʋ la. M na dɔlisi ya san'anɛ pa'al ye m anɛ kasi ka ba nini nyɛ.
24 Bɔzugɔ m na yisi ya tɛɛns la sʋʋgin, ka la'asi ya tɛɛnsin la, mɔri ya lɛbi ya mɛŋ teŋin na. 25 M na nɔk ku'okanɛ an nyain zu'asi ya, ka ya na an nyain. M na pie ya dian'ad la wʋsa yis ka la'am yisi ya bada la. 26 M na yisi ya sʋnya la ka lɛbis bʋmpaala kpɛn'ɛs, m na nɔk sipaaligi kpɛn'ɛsi ya pʋʋgin, ka yisi ya sʋnya linɛ kpi'em wʋʋ kugir la ka tisi ya sʋnya linɛ bʋgʋs. 27 M na kpɛn'ɛsi m siig la ya sʋnfʋn, ka kɛ ka ya dɔlli m gban'ar la ka ya na gu'usid ka dɔlisidi m wada la. 28 Ya na bɛ teŋ kanɛ ka m da tisi ya yaanam la ni. Ya na aan m nidib, ka mam mɛ na aan ya Wina'am. 29 M na faaɛn ya yisi ya dian'ad wʋsa pʋʋgin. M na kɛ ka zʋʋd bɛ bɛdegʋ ka kɔ'ɔm kʋ lɛn lii ya san'anɛ. 30 M na kɛ ka ya tiis la wal bɛdegʋ ka ya pɔɔd la du'a zʋʋd pamm, ala ka ya kʋ lɛn dit nyan tɛɛns la sʋʋgin ka li anɛ kɔ'ɔm yɛlaa. 31 Ani ka ya na tiɛn ya tʋʋmbɛ'ɛd nɛ bugusim tʋʋma la yɛla, ka kisigi ya mɛŋi ya tʋʋmbɛ'ɛd nɛ yɛlkisa banɛ ka ya da tʋm la yɛla. 32 M bɔɔd ye ya baŋ ye, li ka' yanam yɛla ka m niŋid nɛ'ɛŋaa. Zugsɔb onɛ an Paŋtita'ar Sɔb la pian'ʋkʋ la. “Israel dima, kɛlli ka nyan mɔri ya ka ya zut ziidi ya itʋŋ la yɛla!” 33 Zugsɔb onɛ an Paŋtita'ar Sɔb la yɛl si'eli nwa ye, Daakanɛ ka m pie ya tʋʋmbɛ'ɛd wʋsa bas la, m na maali ya zin'ili ya, ya tempʋʋsin la ka kɛ ka ya lɛbi mɛ dabɔɔd la. 34 Zin'ikanɛ ka ba bas ka sɔ' kae la, ba na kua li, ka li kʋ lɛn dig zaalim ka nidib dɔlli ani gat ka gɔsidaa. 35 Ba na yɛl ye, “Zin'ikaŋa nwaa da dig zaalim la, li yʋ'ʋn nwɛnɛ Eden lɔmbɔn'ɔg nɛ; tempʋbanɛ da san'am-san'am an dabɔɔdi digi ka sɔ' ka' anina la yʋ'ʋn mɔr kpi'euŋ ka nidib bɛɛ li pʋʋgin.” 36 Ala ka tɛɛns banɛ kpɛlim giligi ya la na baŋ ye man Zugsɔb la lɛbisi mɛ' linɛ da san'am la, ka lɛbis zin'ikanɛ ka nidib da ka' anina la li zin'igin. Man Zugsɔb la pian' ka na tʋmi li.