Edom dim zɛrigir la yɛla
35
1 Zugsɔb la labaar da kɛɛn m san'an na ye, 2 Ninsaal biiga, zan'asim Seir zuor la ka di'e m nɔɔr pian'ad linɛ ka m zɛrigi ba la tisi ba, 3 ka yɛli ba ye, Zugsɔb onɛ an Paŋtita'ar Sɔb la yɛl ye, “M zan'asif, Seir zuorɛ, m na tiɛn m nu'ugʋ zab nɛf ka kɛ ka fʋ kilim dabɔɔd. 4 M na kɛ ka fʋ tempʋʋs la lieb dabɔɔd, lin ka ya na baŋ ye manɛ an Zugsɔb la.5 “Fʋn mɔr kʋdimin sa dataadʋg ka kʋ Israel dim saŋa kanɛ ka tɔɔg da paae ba la, saŋa kanɛ ka ba namisʋg la da tʋʋgi li bɛn la, 6 Alazug,” Zugsɔb onɛ an Paŋtita'ar Sɔb la pian'ʋkʋ nwa ye, “Asida sida ka m yɛti ya ye, m na nɔki ya niŋ ninkʋʋdib nu'usin, ka ninkʋʋdib na kati dɔlli ya. Yanamɛ sadigim pʋ zɔt ninkʋʋr la, li sid na dɔlli ya. 7 M na kɛ ka Seir zuor la lieb zaalim, ka sɔ' kʋ lɛn dɔl ani gaadɛ. 8 M na kɛ ka banɛ kpi la pɛ'ɛli fʋ zuoya la; banɛ ka ba kʋ zaba ni la na kpii digi ya zuoya la ni nɛ ya bɔn'ɔdin nɛ bɔn'ɔfalisin la. 9 M na kɛ ka fʋ lieb dabɔɔd hali saŋa linɛ ka' bɛnnɛ, sɔ' kʋ lɛm bɛɛ fʋ tɛɛnsin la. Ka ya na baŋ ye manɛ an Zugsɔb la.
10 “Yanam yɛl ye, ‘Tɛɛns ayi' nwa nɛ ba sʋ'ʋlim la wʋsa na aan ti din ka ti sʋ'ʋgi li,’ la'am nɛ man kanɛ an Zugsɔb la da bɛɛ ani la, 11 alazug,” Zugsɔb onɛ an Paŋtita'ar Sɔb la pian'ʋkʋ la, “asida sida ka m yɛti ya ye, m na maali ya wʋʋ fufum nɛ ɛndʋg nɛ kisidim kanɛ ka ya da maali ba la, ka tɛɛgi ya tʋbir. Ala ka m na kɛ ka ba baŋ man an sɔ'. 12 Ka ya na baŋ ye man onɛ an Zugsɔb la wʋm pian'ayaalis banɛ ka ya pian'adi zɛrigid Israel zuoya la. Ya yɛl ye, ‘Ba dignɛ zaalim, ka ba nɔki tisi ti ye ti di.’ 13 Ya nwɛ'ɛdi ya nyɔ'ɔg ka pian'adi zɛrigid mam ka pʋ zɔt dabiem, ka m wʋmmi li.” 14 Zugsɔb onɛ an Paŋtita'ar Sɔb la yɛl si'eli nwa ye, “Dunia wʋsaa maan sumalisim la, m na kɛ ka ya lieb zaalim. 15 Israel dim teŋ linɛ aan ba faar la da kilim zaalim ka ya maan sumalisim la, alazug m mɛ ye m maali ya nɛ, yanamɛ da maali ba si'em la. Seir zuorɛ, fʋ na lieb zaalim, fʋn nɛ Edom wʋsa. Ka ba na baŋ ye manɛ an Zugsɔb la.”