Kɔnbkemnib nɛ kɔnbid la yɛla
34
1 Zugsɔb la labaar da kɛɛn m san'an na ye, 2 Ninsaal biiga, di'emi m nɔɔr pian'ad linɛ ka m zɛrigid Israel kɔnbkemnib la tisi ba; pian'am yɛli ba ye, Zugsɔb onɛ an Paŋtita'ar Sɔb la yɛl si'em nwa ye, “Tɔɔg bɛɛ tis Israel kɔnbkemnib, banɛ ba'a bɛ nɛ ban mɛŋ yɛla ma'aa la! Kɔnbkemnib tʋʋm ka'anɛ ba gur kɔnbidɛɛ? 3 Ya dit ka nuud, ka mɔr bʋnkɔnbid la kɔnbidi maan fusʋma yɛɛd, ka kʋʋd bʋnkɔnbsʋma la ɔnbid, amaa ya lɛɛ pʋ gɔsid kɔnbid laa. 4 Ya ba'a ka' nɛ banɛ tadig la bɛɛ ya ti'eb banɛ bɛn'ɛd la bɛɛ pies banɛ pu'alim la fɛn'ɛdɛ. Banɛ bak la ya pʋ mɔri ba lɛb naa, bɛɛ iee banɛ bɔdig laa; ya mɔri banɛ nɛ bugusim ka maannɛ ba bɛ'ɛd hali. 5 Dinzug ka ba da widig, bɔzugɔ onɛ na kemi ba kae, ka ban da widig la ba da kilim diibi tis sian'arin bʋnkɔnbid. 6 M kɔnbid la da giligi keŋ zuoya nɛ kʋkʋna wʋsa ni. Ba da widigi gilig dunia wʋsa, ka sɔ' pʋ iee ba, bɛɛ gɔs ye ba bɛ yaanɛ.”7 Alazug yanam banɛ an kɔnbkemnib la, kɛlisimi Zugsɔb la pian'ad. 8 “Asida sida ka m yɛti ya,” Zugsɔb onɛ an Paŋtita'ar Sɔb la pian'ʋkʋ la, “Man pɛ'ɛs la ka' onɛ kemmi baa, ka ba gban'e ba nɛ paŋ ka ba kilim sian'arin bʋnkɔnbid diib, ka kɔnbkemnib la pʋ iee kɔnbid la, amaa ba ba'a bɛ nɛ ba mɛŋ yɛla ma'aa ka ka' kɔnbid la yɛlaa.” 9 Alazug, kɔnbkemniba, kɛlisimi Zugsɔb labaar: 10 Zugsɔb onɛ an Paŋtita'ar Sɔb la yɛl si'eli nwa ye, “M zan'as kɔnbkemnib la ka mɛ kɛ ka m kɔnbid la yɛla ziili ba zugin. M na kadi ba ka ba kʋ lɛn kemi m kɔnbid laa, ka li kɛ ka kɔnbkemnib la kʋ lɛn nyaŋi diisidi ba mɛŋa. M na faanm kɔnbid la yisi ba nɔɔrin, ka ba kʋ lɛn an diibi tisi baa.”
11 Zugsɔb onɛ an Paŋtita'ar Sɔb la yɛl ye, “Mam mɛŋ na iee m kɔnbid la ka guri ba. 12 Wʋʋ kɔnbkemmi na nyɛɛ o kɔnbid banɛ widig ka guri ba si'em la, ala ka m na gɔsi m pɛ'ɛs la. M na faaɛn ba ka mɔri ba yi zin'ikanɛ wʋsa ka ba da widigi kpɛn' dabisbɛ'og daar linɛ da an lik ma'aa la. 13 M na yisi ba tɛɛnsin la na, ka la'asi ba mɔri kɛɛn ba mɛŋ teŋin na. M na kemi ba Israel zuoya la nɛ bɔn'ɔfalisin nɛ zin'ig wʋsa linɛ bɛ teŋin la. 14 M na kemi ba yam sʋŋ zin'ig, ka Israel zuobɛda la ni na aan ba yaama ɔnbir zin'ig. Ani ka ba na digin teŋ sʋŋ zug, ka ɔnb yam sʋŋ Israel zuoya la ni. 15 Mam mɛŋ na kemi m kɔnbid la ka guri ba ka ba dig baanlimm.” Zugsɔb onɛ an Paŋtita'ar Sɔb la pian'ʋkʋ la. 16 “M na iee banɛ bɔdig la ka mɔr banɛ bak la lɛb na. Banɛ pu'alim la m na ti'ebi ba, ka gɔs banɛ tadig la, amaa banɛ nɔb ka kpi'em la m na kʋʋ ba. M na kemi ba nɛ sida.
17 “Ya'a kpɛlim nɛ yanam banɛ aan m kɔnbid la,” Zugsɔb onɛ an Paŋtita'ar Sɔb la yɛl si'em nwa, “M na bak pɛ'ɛs la nɛ pɛraad la nɛ bʋʋs la yinne-yinne. 18 Li pʋ sia'ali ya nɛ yanamɛ ɔnbid yam sʋma laa? Ka li lɛn anɛ tilas ye ya nɔ yaama banɛ kpɛlim la nɛ nɔbaa? Ya ya'a nu ku'okanɛ an nyain, li pʋ sia'ali yaa? Li nar ye ya nɔki ya nɔba gbɛndig ku'okanɛ kpɛlim la ka li kilim bian'arɛɛ? 19 Li nar ye m kɔnbid la ɔnb yaama banɛ nɔ nɛ nɔba la, ka nu ku'okanɛ gbɛndigi kilim bian'arɛɛ?”
20 Alazug Zugsɔb onɛ an Paŋtita'ar Sɔb la yɛti ba si'eli nwa ye, “Gɔsimi, mam mɛŋ mi' man na niŋ si'em nɛ pɛ'ɛs banɛ nɔb nɛ pɛ'ɛs banɛ waŋim la. 21 Yanamɛ zaŋi ya biankimpiind nɛ ya nyɔ'ɔd nɛ ya iila tuo pɛbanɛ ka' paŋ la hali ti nyaŋi kadi ba wʋsa la zug, 22 m na faanm pɛ'ɛs la ka ba kʋ lɛm gban'e baa. M na kad pɛ'ɛs la saria yinne-yinne ka bak pɛ'ɛsʋma la yis pɛbɛ'ɛdnam la ni. 23 M na kɛ ka kɔnbkem yinne guri ba, ka on na anɛ m tʋmtʋm David, ka onɛ na kemi ba, ka an ba kɔnbkem. 24 Man onɛ an Zugsɔb la na aan ba Wina'am, ka m tʋmtʋm David na an tuongati ba san'an.” Man kanɛ an Zugsɔb la pian'.
25 M na maal nɔnaar nɛ ba linɛ na an laafi nɛ sumbʋgʋsʋm, ka yis wɛog bʋnkɔnbid wʋsa ka ba na bɛ pipirigin la, ka gbis sian'arin la ka dabiem kae. 26 M na kɛ ka ba zin'ini giligi m zuor la, ka niŋi ba zug albareka. M na kɛ ka saa niid din nar ye di niid saŋa si'a. Di ye li anɛ bareka saa. 27 Tiis banɛ bɛ teŋin la na wali ba wala, ka teŋgbauŋ la na du'a zʋʋd; nidib la na bɛ nɛ laafi teŋ la zug. Ba na baŋ ye manɛ an Zugsɔb la, m ya'a kɔ'ɔgi ba yɔksin daug la, ka yisi ba banɛ gban'e ba maal yammis la nu'usin. 28 Tɛɛns la nidib la kʋ lɛn faaɛn baa, bɛɛ wɛog bʋnkɔnbidi gban'e baa. Ba na bɛ nɛ laafi, ka sɔ' kʋ lɛn kɛ ka dabiem mɔri ba. 29 M na tisi ba teŋ kanɛ sid du'ad zʋʋd, ka kʋ kɛ ka kɔ'ɔm bɛɛ ba teŋinɛ. Tɛɛns la nidib mɛ kʋ la'adi ba ka diisidi ba nyannɛ. 30 Ala ka ba na baŋ ye manɛ aan ba Zugsɔb Wina'am la, ka bɛ nɛ ba; ba mɛ na baŋ ye, ban Israel nidib la wʋsa anɛ m nidib. 31 “Yanam banɛ aan m pɛ'ɛsi bɛɛ m bʋlʋʋgin la, anɛ m nidib, ka man aan ya Wina'am.” Zugsɔb onɛ an Paŋtita'ar Sɔb la pian'ʋkʋ la.