Wina'am gaŋ Ezikil ye o gur la yɛla
33
1 Zugsɔb labaar la da kɛɛn m san'an na ye, 2 Ninsaal biiga, pian'am tisi fʋ teŋ dim la ka yɛli ba ye, “Man ya'a ti kɛ ka tanp lu teŋ si'a, ka teŋ la nidib gaŋi ba dap la yinne ye o an onɛ guri ba; 3 ka o nyɛ ka tanp ken teŋ la zug na, ka pieb na'atan ye nidib la baŋ, 4 sɔ' ya'a wʋm ka na'atan la pieb ka pʋ sa'al o mɛŋa nɛ nimmua, ka tanp la kena ka o kpi, o ziim na bɛ nɛ o mɛŋ zugin. 5 On sadigim wʋm ka na'atan la pieb ka o pʋ sa'al o mɛŋ nɛ nimmua la, o ziim ye li bɛ nɛ o mɛŋ zug. O ya'a sa'alin o mɛŋ nɛ nimmua, o naan faaɛn o mɛŋi bas. 6 Amaa onɛ gur la ya'a nyɛ ka zaba kenna ka o pʋ pieb na'atan la kɛ ka nidib la baŋɛ ka zaba la paae na ka sɔ' kpi, o sɔba na ba'asi kpi o tʋʋmbɛ'ɛdin, amaa m na kɛ ka o ziim ziil onɛ gur la zug.”7 Tɔ, “Ninsaal biiga, man maalif nɛ teŋ gur ye fʋ gur Israel nidib la; alazug kɛlisim man pian'ad si'el la, ka yɛli ba sa'alʋg kanɛ yiti m san'an na la. 8 M ya'a yɛl bugus ye, ‘Bugusim sɔba, fʋ sid na kpi,’ ka fʋ pʋ sa'al o sɔb nɛ nimmua ye o basim o suoyɔɔd la, bugusim sɔb la na kpi o tʋʋmbɛ'ɛd la yɛla, ka m na kɛ ka o ziim ziilif. 9 Amaa fʋ ya'a sa'al bugusim sɔb la ye o basim o suoyɔɔd la, ka o ya'a pʋ tiakɛ, o na kpi o tʋʋmbɛ'ɛdin la, amaa fʋn na yisi fʋ mɛŋ yɛla ni.
10 “Ninsaal biiga, yɛlim Israel nidib la ye, ‘Ya yɛt ye, Ti yidigir nɛ ti tʋʋmbɛ'ɛd la diinli ti nɛ, ka ti kpiidi li yɛla. Ti ye ti niŋ wala vʋ'ʋgɛ?’ ” 11 Yɛlimi ba ye, Zugsɔb la yɛl ye, Sida-sida ka m yɛti ya ye, bugusim sɔb ya'a kpi li pʋ malisi ma, man bɔɔd si'el anɛ ba bas bugusim tʋʋma ka vʋe. Fɛndigimi! Fɛndigim yii ya suobɛ'ɛdin la! Israel nidiba, bɔ ka ya ieed kum?
12 Alazug, Ninsaal biiga, yɛlimi fʋ teŋ nidib la ye, Pʋpielim sɔb ya'a ti pin'ili ki'isid, o pʋpielim kanɛ ka o dɛŋi tʋm la kʋ faaɛn o, ka bugusim sɔb ya'a tiak ka pʋ lɛn tʋm tʋʋmbɛ'ɛdɛ, o tʋʋmbɛ'ɛd kanɛ ka o dɛŋi tʋm la mɛ kʋ lɛn kɛ ka o luu. Pʋpiel ya'a tʋm bɛ'ɛd, ba kʋ kɛ ka o vʋe on da tʋm tʋʋm sʋŋ sieba la zugɔ. 13 M ya'a yɛl pʋpielim sɔb ye o sid na vʋe ka o ti'e o pʋpielim linɛ ka o pʋn dɛŋi tʋm la zug ka pin'ili tʋm bɛ'ɛd, tʋʋm sʋma banɛ ka o pʋn tʋm la wʋsa sɔ' kʋ lɛn tiɛn lii, o na kpi tʋʋmbɛ'ɛd linɛ ka o tʋm la zug. 14 M mɛ ya'a yɛl bugus ye, “Fʋ sid na kpi,” daasi'erɛɛ o na bas bugusim tʋʋma ka tʋm linɛ nar. 15 O ya'a lɛbis linɛ ka sɔ' nɔki digil o san'an ka pɛ'ɛŋ ligidi, ka lɛbis linɛ ka o zu, ka dɔlis suobanɛ tisid vʋm ka pʋ tʋm bɛ'ɛdɛ, o na vʋe ka kʋ kpii. 16 Tʋʋmbɛ'ɛd banɛ ka o dɛŋi tʋm la wʋsa la kʋ lɛn nɔki ziil oo. O ya'a tʋm linɛ an sʋm ka nar, o sid na vʋe.
17 Amaa fʋ nidib la yɛt ye, “Sida kae Zugsɔb la suoya la anii!” Amaa li lɛɛ anɛ ban suoya la ni ka sida kae. 18 Pʋpielim sɔb ya'a bas pʋpielim tʋʋma, ka tʋm tʋʋmbɛ'ɛd, o na kpii li yɛla. 19 Ka tʋʋmbɛ'ɛd sɔb ya'a bas tʋʋmbɛ'ɛd ka tʋm tʋʋm sʋma nɛ linɛ dɔl suor, o na vʋe on tʋm ala la zug. 20 La'am nɛ wala, Israel dima, ya yɛt ye Zugsɔb la suoya pʋ dɔl sidaa. Amaa m na kad sɔ' wʋsa saria ka li dɔl nɛ on tʋm si'em.
O pa'al Jerusalem na lu si'em
21 Tinamɛ da an yammisi bɛ teŋ zʋŋ la, yʋʋm pii nɛ ayi' saŋa, nwadis piiga la dabisa anu la daar, ka dau sɔ' onɛ da zɔɔ pɔns Jerusalem teŋin la kena yɛlim ye, “Tempʋʋg la luya!” 22 Dau la saa na kɛn wʋʋ bɛog na la, li zaam ka Zugsɔb la paŋ da kɛɛn m san'an na, ka m zilim lak, ka dau la nyaan kɛɛn m san'an bɛkɛung na. Ka m lɛn ka' gika ka ya'ae m nɔɔr ka pian'ad.
23 Ka Zugsɔb labaar kɛɛn m san'an na ye, 24 Ninsaal biiga, nimbanɛ bɛ teŋ kanɛ lu la ni yɛt ye, “Abraham da anɛ dau yinne, la'am nɛ wala o da sʋ'ʋg teŋ la. Amaa tinam zu'oya, li anɛ sida ye ba pʋn nɔk teŋ la tisi ti ye li aan ti faar.” 25 Dinzug yɛlimi ba ye, Zugsɔb onɛ an Paŋtita'ar Sɔb la ye, “Yanamɛ sadigim nan ɔnbid ni'im linɛ mɔr ziim ka ti'e ya bada, ka kʋʋd nidib la; li sʋm ye ya sʋ'ʋg teŋ laa? 26 Ya ti'enɛ ya paŋ, ka tʋm tʋʋmkisa, ka dig nɛ taaba pu'ab. Li sʋm ye ya sid sʋ'ʋg teŋ laa?”
27 Yɛlimi ba ye, Zugsɔb onɛ an Paŋtita'ar Sɔb la yɛl ye, “Sida-sida ka m yɛti ya ye, banɛ kpɛlim tɛɛns banɛ ka ba nwa' ba la ni na kpi zaba ni; banɛ zɔɔ kpɛn' mɔɔgin la, m na kɛ ka wɛog bʋnkɔnbid gban'e ba; banɛ bɛ teŋ kpi'ema ni nɛ tampinyɔ'ɔdin la, ban'as na kʋʋ ba. 28 M na kɛ ka teŋ la kpɛlim dabɔɔd, ka paŋ kanɛ ka ba mɔr nyɛɛsim li yɛla la kilim zaalim, ka Israel zuoya la na kpɛlim zaalim ka sɔ' kʋ lɛn dɔl ani gaadɛ. 29 Ka m ya'a kɛ ka teŋ la kpɛlim dabɔɔd ka li anɛ tʋʋmkisa banɛ ka ba tʋm la zug, ba na baŋ ye manɛ an Zugsɔb la.”
30 Ninsaal biiga, ya'a kpɛlim nɛ fʋ, fʋ teŋ nidib la pian'adi fʋ yɛla dɔkpina ni nɛ ya' za'anɔya nii yɛt taaba ye, “Kemi na ka ti wʋm labaar linɛ yi Zugsɔb la san'an na.” 31 Man nidib la kennɛ fʋ san'an na wʋʋ ban ɛɛn pʋn niŋid si'em la. Ba na zin'ini fʋ tuon ye ba kɛlisi fʋ pian'ad, amaa ba pʋ tʋm wʋʋ fʋn yɛt si'em laa. Ba nɔkidi ba nɔɔri pian'ad wʋʋ ba pɛsigi ba mɛŋi tis mam nɛ, amaa ba sʋnf la pɛ'ɛl nɛ filʋŋ ka ba bɔɔd ye ba paam linɛ ka' ba dinnɛ. 32 Nɛ lin wʋsa ba gɔsidifnɛ nwɛnɛ onɛ yʋ'ʋmmi sɛnlimmi ba nɛ nɔmalisiŋ ka nwɛ'ɛd bʋnnwɛ'ɛda sʋ'ʋŋa, bɔzugɔ ba wʋmmi fʋ pian'ad ka pʋ maan fʋn yɛt si'el laa.
33 “Nɛ'ɛnam wʋsa ya'a sid ti niŋ; li mɛ sid na niŋ ka ba na baŋ ye nɔdi'es sid mi' bɛɛ ba san'an.”