3
1 Ka Wina'am yɛlim ye, “Ninsaal biiga, ɔm gbauŋ linɛ bɛɛ fʋ tuon la, ka keŋ pian' tis Israel nidib la.” 2 Ka m ya'ae m nɔɔr ka o tisim gbauŋ la ka m ɔnb. 3 Ka o yɛlim ye, “Ninsaal biiga, ɔm gbauŋ kanɛ ka m tisidif la pɛ'ɛli fʋ pʋʋr.” Ka m ɔnbi li ka li malis hali wʋʋ siind nɛ m nɔɔrin. 4 Ka o yɛlim ye, “Ninsaal biiga, kem Israel nidibin la nannanna tu'asi m yɛla tisi ba. 5 M pʋ tʋmif nimbanɛ pian'ad pian'azʋŋ dinɛ baŋiri na tɔi tisi fɔ, amaa Israel nidibin ka m tʋmif. 6 M pʋ tʋmif nɛ nimbanɛ zu'oe ka ba pian'ad tɔi ka ba buudi kpi'em ka ba pian'ad ka fʋ kʋ gban'e li gbin la san'anɛ. Sida, hali baa m ya'a tʋmi nɛf nimban buudi san'an ba naan wʋm tisi nɛf. 7 Amaa Israel dim la kʋ wʋm tisi fɔ, bɔzugɔ ba pʋ bɔɔd ye ba kɛlis mam mɛŋa. Ba wʋsa anɛ zukpi'euŋ dim ka pʋ nanna. 8 Amaa m na kɛ ka fʋ mɛ an onɛ pʋ siakid na'anaa ka an zukpi'euŋ sɔb nwɛnɛ ban an si'em la. 9 M na kɛ ka fʋ zug kpi'em gaad kutiŋgbinnig. Da zɔti ba dabiem bɛɛ fʋ ya'am ianki ba yɛlaa, ba pʋn anɛ ki'isʋg dim.”10 Ka o lɛn yɛlim ye, “Ninsaal biiga, kɛlisim sʋ'ʋŋa ka tɛnr man yɛlif si'el la wʋsa ka zaŋi niŋi fʋ pʋtɛn'ɛrin. 11 Kemi fʋ teŋ nimbanɛ ka ba gban'e ba keŋ teŋ zʋŋ la ni, tu'asi tisi ba. Yɛlimi ba ye, ‘Zugsɔb onɛ an Paŋtita'ar Sɔb la yɛlim ye m yɛli ya si'eli nwa,’ ba ya'a siak bɛɛ ba ya'a pʋ siakɛ fʋn yɛlimi ba.”
12 Ka Siig la ʋkim agɔla, ka m wʋm ka kʋkɔtita'ar vuudi m nya'aŋi yɛt ye, “Zugsɔb onɛ bɛ arezana la na paam wɔ'ɔgir o bɛllim zin'igin la!” 13 Ka m wʋm ka bʋnvʋya kpʋkpama nwɛ'ɛd agɔla si'isid taaba ka tɛreko fiilnam dammid nwa'am-nwa'am nwɛnɛ teŋi mi'im nɛ. 14 Ka Siig la ʋkim agɔla mɔri keŋ sa. Ka m keŋ nɛ ɛndʋg hali nɛ sʋnsa'aŋ ka Zugsɔb la paŋ bɛɛ m san'an. 15 M da paae m taab banɛ da bɛ Tel Abib teŋin linɛ kpi'e nɛ Keba kɔldaug la ka li pakim hali ka m zin'in ani daba ayɔpɔi.
Israel dim sa'alʋg
16 Daba ayɔpɔi la naar daar la, ka Wina'am pian' tisim ye, 17 Ninsaal biiga, mam maalif nɛ yigur ka fʋ na gur Israel nidib la. Wʋm man yɛtif si'el la nɛ nimmua ka tu'asi kpa'asi ba tisim. 18 M ya'a yɛl tʋʋmbɛ'ɛd sɔb ye o na kpi, ka fʋ pʋ yɛl o ka o bas o tʋʋmbɛ'ɛd la ka nyɛ faangirɛ, ninkan sɔb na kpii o tʋʋmbɛ'ɛdin, amaa o ziim na bɛɛ fʋ zugin. 19 Amaa fʋ ya'a yɛl tʋʋmbɛ'ɛd sɔb ye o basim tʋʋmbɛ'ɛd la ka o pʋ siakɛ, o na kpii o tʋʋmbɛ'ɛdin la, amaa fʋn na faaɛn fʋ mɛŋ.
20 “Pʋpielim sɔb ya'a bas tʋʋm sʋma ka pin'ili tʋm tʋʋmbɛ'ɛd ka fʋ pʋ yɛl o, m na kɛ ka yɛlbɛ'og gban'e o ka o tu'ugi lii kpi. Li ya'a niŋ ala, m kʋ tɛnr tʋʋm sʋma banɛ ka o tʋm la, ka o ziim mɛ na bɛɛ fʋ zug. 21 Amaa fʋ ya'a yɛl pʋpielim sɔb ye o da tʋm tʋʋmbɛ'ɛdɛ ka o siak, o na vʋe on wʋm nɛ nimmua tisif la zug, ka fʋn mɛ na faaɛn fʋ mɛŋ.”
22 Zugsɔb la paŋ da bɛɛ m san'an zin'ikan la, ka o yɛlim ye, “Duom keŋ paalʋ kanɛ an sassi la ni, ka m na pian' tisif.” 23 Ka man paae zin'ikan la, m nyɛ ka Zugsɔb la girima nie nyain wʋʋ man da nyɛɛ li si'em Keba kɔldaug baba la. Ka m luu avanba.
24 Ka Siig la kɛɛn m san'an na ʋkim agɔla zi'el ka pian' tisim ye, “Kem yɔɔ fʋ mɛŋi fʋ yin. 25 Ka fʋn Ninsaal biiga, ba na lɔɔf nɛ nwiis ka bɔbigif ka fʋ kʋ nyaŋi yii fʋ nidibin la naa. 26 M na kɛ ka fʋ zilim tabin ka fʋ kʋ nyaŋi pian' tis nimbanɛ zugʋ kpi'em la. 27 Amaa m ya'a lɛm pian' tisif, m na kɛ ka fʋ zilim lak ka fʋ yɛli ba mam Zugsɔb Paŋtita'ar Sɔb la yɛlif si'el. Banɛ na siak ban siak, banɛ zan'as ban on zan'as, ka m pʋn mi' ba zukpi'euŋ la yɛla.”