Wina'am buol Ezikil
2
1 Ka o yɛlim ye, “Ninsaal biiga, duom zi'en ka m pian' tisif.” 2 On pian' naae la, ka Siig la kpɛn'ɛm ka duoe mɛ zi'el, ka m wʋm ka o pian'adi tisidim. 3 O yɛlim ye, “Ninsaal biiga, m tʋmif nɛ Israel dim san'an. Ba anɛ banɛ pʋ siakida ka ki'isidi m nɔɔr. Ban nɛ ba yaanam ki'isi m nɔɔr hali ti paae zina. 4 Nimbanɛ ka m tʋmmi fʋ ba san'an la anɛ banɛ zuti kpi'em ka ba pʋ tiakid na'anaa. Yɛlimi ba ye Zugsɔb onɛ an Paŋtita'ar Sɔb la yɛl si'eli nwa. 5 Ba ya'a siak bɛɛ pʋ siakɛ, fʋn yɛlimi ba, ka ba pʋn anɛ nimbanɛ ki'isid. La'am nɛ ala, ba na baŋ ye Wina'am nɔdi'es sid mi' naanɛ ba sʋʋgin. 6 Amaa fʋn, Ninsaal biiga, da zɔti ba dabiem bɛɛ fʋ zɔɔ ba pian'ad. Da zɔti ba dabiem la'am nɛ ban nwɛnɛ gɔn'ɔs nɛ gɛnda giligif ka fʋ bɛ namis sʋʋgin la. La'am nɛ ban an nimbanɛ ki'isid la, da zɔt dabiem ban na yɛl si'el bɛɛ kɛ ka fʋ ya'am ian'adi ba yɛlaa, la'am nɛ ban an nimbanɛ pʋ siakid la. 7 Asɛɛ fʋ yɛli ba man yɛlif si'el la, ba ya'a kɛlis bɛɛ zan'asɛɛ, ba pʋn anɛ banɛ ki'isid. 8 Amaa fʋn, Ninsaal biiga, kɛlisim man yɛlif si'el la. Da ki'isim wʋʋ nimbama. Ya'ami fʋ nɔɔr ka di'e man tisidif si'el la ɔnb.” 9 Ani ka m gɔsi nyɛ nu'ugʋ tieli m san'an na ka gbauŋ kpilim bɛ nu'ug la pʋʋg. 10 Ka o idigi li m tuon, ka li tuon nɛ li nya'aŋ wʋsa sɔb fabʋlʋg nɛ sʋnsa'aŋ nɛ tɔɔg yɛla.