Ezikil
Bʋnvʋya nɛ Zugsɔb girima yɛla
1
1 Israel nidibi da an yammisi bɛ teŋ zʋŋ yʋma pistan' la, li nwadis anaasi la daba anu daar, ka mam Ezikil, da bɛ nɛ ba sieba banɛ bɛ Keba Kɔldaugin la, ka agɔl yɔ'ɔg ka Wina'am yɛla nie pa'alim.2 Li anɛ ban da gban'e Na'ab Jehoyakin n keŋ teŋ zʋŋ la yʋma anu la di nwadis anu la ni, 3 ka Zugsɔb pian' tis Ezikil onɛ an maanmaan ka o saam yʋ'ʋr buon Buzi, ka o bɛ Keba Kɔldaug la baba Babilon sʋ'ʋlimin la. Ani ka Zugsɔb la paŋ kɛɛn o san'an na. 4 Ka m gɔsi nyɛ ka sisi'etita'ar yi ya-datiuŋ baba kenna nɛ saŋgbantita'ar, ka saa ian'adi tansid panr-panr ka bugum nie nyain giligi li nyɛɛn. Ka si'el bɛ bugum la teŋsʋkʋ nyɛɛn pil-pil, 5 ka si'elnam bɛ bugum la pʋʋgin nwɛnɛ bʋnvʋya anaasi. Ba da nwɛnɛ ninsaal nɛ, 6 amaa ba yinne wʋsa da mɔri nindaas nɛ kpʋkpama anaas naas. 7 Ba nɔba da tiɛnnɛ sappi, ka ba nɔbpansimpana nwɛnɛ na'abil tafɛɛd nɛ, ka nyɛɛn wʋʋ kʋntzɛn'ug ka ba maali duus nɛ. 8 Ba da mɔri ninsaal nu'usi anaasi ka li bɛɛ ba kpʋkpama linɛ tabi ba lʋga anaasi la lɛuŋʋn. Baba anaasi la wʋsa da mɔri nindaas nɛ kpʋkpama. 9 Bʋnvʋya la wʋsa kpʋkpama da si'isidnɛ taaba, ka ba yinne wʋsa ya'a ye o keŋ ba la'asidnɛ ken vuguri ka pʋ fɛndigidi ba niŋgbinaa.
10 Ba nindaas la da nwɛn si'em nwa: bʋnvʋr wʋsa da mɔri nindaas anaasi; ninsaal nindaa linɛ bɛ tuon, nɛ gbigim nindaa linɛ bɛ datiuŋ, nɛ na'araug nindaa linɛ bɛ dagɔbʋg nɛ abaar nindaa linɛ bɛ nya'aŋ; 11 ba nindaasi da an si'em la. Ba da yadignɛ ba kpʋkpama dʋ'ʋs agɔla; ka bʋnvʋr wʋsa mɔr kpʋkpama ayi', ka kpʋkpauŋ wʋsa tiɛn si'isid bʋnvʋr kanɛ kpi'e nɛ o la kpʋkpauŋ, ka kpʋkpama ayi' banɛ kpɛlim la lusidi ba niŋgbina. 12 Yinne wʋsa da kpɛn kpa'ad o tuonnɛ ken. Siig la ken zin'isi'a wʋsa ba na keŋ ka pʋ fɛndigi ba mɛŋa. 13 Bʋnvʋya la da nwɛnɛ bugumsaana bɛɛ kʋtir bugum nɛ, ka li nyɛɛn hali giligid saŋa wʋsa. Bugum la da nienɛ ka tɔɔndi ian'ad bʋnvʋya la teŋsʋk wʋʋ saa nɛ. 14 Bʋnvʋya la da zɔti tɔ'ɔtɔ ken tuon ka lɛbid nya'aŋ wʋʋ saa ian'ad si'em la.
15 Man da gɔt bʋnvʋya anaasi la, m da nyɛ fiilnama anaasi ka li si'isid teŋi kpi'e ba yinne wʋsa. 16 Fiilnam la da an si'em nwa: anaasi la wʋsa da zemnɛ taaba, ka nyɛɛn nwɛnɛ gɔtiŋ nɛ. Fiilnam la da maal si'em la da nwɛnɛ ba nɔknɛ yinne nyaae li tiraan pʋʋgin nɛ, 17 ka li kɛ ka fiilnam la tun'e kpa' keŋ dunia lʋga anaasi la wʋsa, bʋnvʋya la ya'a ken zin'isi'a wʋsa, ba pʋ fɛndigidi ba mɛŋa. 18 Li fiilnam la da wa'am nɛ mɔr dabiem, ka li wʋsa mɔr nini. 19 Bʋnvʋya la ya'a ti ye ba keŋ, fiilnam la da dɛn'ɛnidi ba nɛ; ba ya'a lɛn ian'adnɛ agɔla li kpɛn dɛn'ɛnidi ba nɛ. 20 Siig la da ken si'el wʋsa ba na keŋ, ka fiilnam la mɛ dɛn'ɛnidi ba, bɔzugɔ bʋnvʋya la siig da bɛ nɛ fiilnam la ni. 21 Alazug saŋa kanɛ wʋsa ka bʋnvʋya la ken bɛɛ zi'e bɛɛ ian'ad, fiilnam la mɛ maannɛ ala nɔɔ, bɔzugɔ bʋnvʋya la siig bɛnɛ fiilnamin la.
22 Si'eli da yadig lammiri bɛɛ ba zutin n nyɛɛn hali nwɛnɛ gɔtiŋ nɛ, ka fʋ ya'a nyɛ ka li mɔr dabiem. 23 Bʋnlammir la lɛuŋʋn ba da yadignɛ ba kpʋkpama kpa' taaba, ka bas kpʋkpama ayi' lusi ba niŋgbina. 24 Bʋnvʋya la da ian'ad la, m da wʋm ka ba kpʋkpama la dammid wʋʋ atɛuk ku'om, bɛɛ Wina'am Onɛ an Paŋtita'ar sɔb la tansʋg vuud, ka lɛn nwɛnɛ zabzabidib bɛdegʋ na kenna. Ba ya'a da zi'en baanlimm ba sigisidnɛ ba kpʋkpama la teŋin. 25 Saŋkanɛ ka ba da zi'en ka sigisi ba kpʋkpama la m da wʋm kʋkɔri yi bʋnlammir linɛ bɛɛ ba zugin la.
26 Bʋnlammir linɛ bɛɛ ba zugin la, si'el da bɛɛ ani nwɛnɛ na'am kʋk linɛ ka ba nɔk gɔtiŋi maal, ka si'el zin' na'am kʋk la zugʋ nwɛnɛ ninsaal nɛ. 27 M da nyɛ lin naanɛ o siaa baba dʋt la ka li nyɛɛn nwɛnɛ ba zugudnɛ kʋnt bugumin. Ka lin yii ani sigid la nwɛnɛ bugum ka nɛɛsim tita'ar giligi li. 28 Li da nwɛnɛ saa na kʋ ka dindɛog buoɛn saŋgbana ni si'em la. Vɛnlim kaŋa da gilig o.
Ala ka li da nie nwɛnɛ Zugsɔb na'am pipilim girima nɛ. Man da nyɛ nɛ'ɛŋa la ka luu avanba, ka wʋm ka li pian'ad.