<<    <     Ezikil     4     >    >> 
Ezikil pa'al dataasi na lɔbi gilig Jerusalem teŋ la si'em
4
1  Ka Wina'am da lɛn yɛl mam Ezikil ye, Ninsaal biiga, nɔkim birikiisi digili fʋ tuon ka buoɛn li zugini pa'al Jerusalem tempʋʋgʋ an si'em. 2 Mɛɛm dʋʋsa gilig tempʋʋg la ka nɔk gulungun'udi digili gilig ka niŋ wʋʋ dataasi ɛɛn lɔbi gilig teŋ si'em ye ba zab la. 3 Ka nɔk kʋnt gammi zi'el nwɛnɛ zaŋguom nɛ fʋn nɛ birikiisi la teŋsʋk, ka fɛndigi fʋ nindaa kpa' li ka li na bɛ sʋʋgin wʋʋ zabzabidibi lɔbi gilig nɛ ka fʋn na nwɛnɛ banɛ lɔbi giligi li la. Nɛ'ɛŋa na an zanbinnɛ tis Israel dim la.
4 Ka yʋ'ʋn diginɛ fʋ dagɔbʋg nu'ug zug, ka nɔk Israel dim tʋʋmbɛ'ɛd la wʋsa ziili fʋ mɛŋ. Fʋ na zii li hali ti paae dabisa banɛ ka fʋ dig la bɛn. 5 M na nɔk yʋʋm banɛ ka ba nɔki tʋm tʋʋmbɛ'ɛd la wʋsa tiaki li ka li lieb dabisa. Alazug dabisa kɔbistan' nɛ piswai (390) ka fʋ ye fʋ zi Israel dim tʋʋmbɛ'ɛd la.
6 Fʋ ya'a naae lin, fʋn on lɛn diginɛ fʋ datiuŋ nu'ug la zugʋ zi Juda dim tʋʋmbɛ'ɛd. M nɔknɛ dabisa pisnaasi (40) tisif. Dabisir wʋsa pa'an ye li anɛ yʋʋm yinne. 7 Fɛndigimi fʋ nindaa kpa' Jerusalem kanɛ ka fʋ buoɛn digil la, ka zian'am nu'ugʋ di'e m nɔɔr pian'ad linɛ ka m zɛrigi li la tisi li. 8 Man na lɔɔf nɛ nwiis ka fʋ kʋ nyaŋi biki lɛb zin'isi'aa, hali nɛ dabisa la bɛnnɛ na ti naae.
9 “Nɔkim mui nɛ bɛŋa nɛ ki niŋ dʋkʋn ka nɔki li maal diib ka dii li dabisa kɔbistan' nɛ piswai (390) saŋa kanɛ ka fʋ dig la. 10 Makim diibi dit daar wʋsa si'em nɛ saŋa kanɛ ka fʋ gban'e ye fʋ dit. 11 Ka mɛ mak ku'om bʋtiis ayi' nuud saŋa kan nɔɔ. 12 Dim diib la wʋʋ ma'asa ka fʋ ɔnbid nɛ; li anɛ tilas ye fʋ maal ma'asa la zin'ikanɛ ka nidib na nyɛt, ka nɔk ninsaal binkpi'emisi nyu'oe bugum maali li.” 13 Zugsɔb la da ye, “Nɛ'ɛŋa na pa'al Israel dimi na di dian'ad si'em, teŋ kanɛ wʋsa ka m ye m mɔri ba keŋ la.”
14 Ka m yɛl ye, “Ayei, Zugsɔb onɛ an Paŋtita'ar Sɔba! Man nan zi' di linɛ kis ka an dian'adɛ. M biilimin sa man nan zi' di bʋnkpiilʋŋ bɛɛ linɛ ka wɛog bʋn gban'e. Bʋnkpiilʋŋ ni'im nan zi' kpɛn' man nɔɔri nɛ.”
15 Ka o lɛbis ye, “Tɔ, li ka' yɛllɛ, m na kɛ ka fʋ nɔk na'ambinnɛ nyu'oe maal ka ka' ninsaal binnɛ.”
16 Ka o yʋ'ʋn yɛlim ye, “Ninsaal biiga, m na gu'oe ka kʋ lɛn tis Jerusalem dim diibɔ. Nidib la na di diib linɛ an fiin nɛ nyɛlʋg, ka nu ku'okanɛ an fiin nɛ dabiem, 17 bɔzugɔ diib nɛ ku'om na kar. Ba na lidigi gɔsid taaba ka waŋim kpii ba tʋʋmbɛ'ɛd la zug.”