Ezikil 5

1 Wina'am da lɛn yɛl mam Ezikil ye, Ninsaal biiga, nannanna nɔkim sʋ'ʋkanɛ dit nwɛnɛ barigi pʋni fʋ zuobid nɛ fʋ tieŋ. Ka nɔk linɛ makid tɛbisim mak, ka pʋdig zuobid la zin'is atan'. 2 Dabisa banɛ ka fʋ dig la bɛn ya'a paae, fʋn nɔk zuobid la pʋdigir yinne nyu'oe tempʋʋg la pʋʋgin, ka nɔk yinne fuoe sʋ'ʋgʋ fi'idi li giligid teŋ la. Ka nɔk yinne la yɛlig pɛbisʋgin. Ka m na fuoe m sʋ'ʋgʋ kati ba. 3 Amaa nɔkim zuobid la fiin lɔɔ fʋ fuug nɔɔr, 4 ka yisi li bi'ela nɔki lɔs bugumin ka li kanb. Bugum na naan ani tiigi paae Israel dim wʋsa.

5 Zugsɔb onɛ an Paŋtita'ar Sɔb la yɛl si'em nwa ye, Jerusalem kaŋa ka man ye m nɔki zi'el dunia teŋsʋk ka tɛɛns bɛdegʋ gilig o. 6 O bugusim la zug ka o zan'asi m wada nɛ m zi'ela la gaad tembanɛ gilig o la. O zan'asnɛ ka pʋ dɔlli m wada nɛ m zi'ela la.

7 Alazug Zugsɔb onɛ an Paŋtita'ar Sɔb la yɛl si'em nwa: Ya tʋʋmbɛ'ɛd gat tembanɛ giligi ya la ka ya pʋ dɔlli m zi'ela bɛɛ m wada la. Hali ya dɔlnɛ tembanɛ giligi ya la zi'ela.

8 Dinzug Zugsɔb onɛ an Paŋtita'ar Sɔb la yɛl si'eli nwa: Mam mɛŋ kis yanam Jerusalem dim nɛ, ka na kɛ ka namisʋg paae ya ka dunia wʋsa nyɛ. 9 Ya bada banɛ ka m kis ka ya sin ka maan la zug, m na maali ya bʋn linɛ ka m nan zi' maalɛ ka mɛ kʋ lɛm maali li buudii. 10 Alazug ya tempʋʋgin la, saamnam na ɔnbi ba biis, ka biis ɔnbi ba saamnam. M na kɛ ka tɔɔg paae ya, ka banɛ pʋ kpi la m na widigi ba gilig dunia wʋsa. 11 Alazug man Zugsɔb onɛ an Paŋtita'ar Sɔb la pɔya ye yanamɛ dian'a mam Pʋ'ʋsim Yir, nɛ ya bada banɛ ka ya ya'ab ka m kis la, m kʋ lɛn sʋŋi ya. M mɛ kʋ lɛn zɔɔ ya nimbaanlig bɛɛ bas ka ya pɔnsɛ. 12 Ya nidib la pʋdigir zin'is atan' yinne na kpi nɛ tɔɔg bɛɛ kɔ'ɔm. Ba mɛ na kʋ pʋdigir yinne nɛ sʋ'ʋg teŋ la yiŋ, ka m fuoe m sʋ'ʋgʋ kad banɛ kpɛlim la ka ba widigi keŋ dunia wʋsa.

13 Linɛ na kɛ ka ɛndʋg nɛ sʋnpɛɛn linɛ ka m gban'e ba yɛla la niŋ lamm. Ala ka ba na baŋ ye man Zugsɔb sid pian'anɛ nɛ sʋntɔɔg.

14 M na kɛ ka ya san'am ka lieb bʋnla'adir nimbanɛ giligi ya la teŋsʋk, ka banɛ wʋsa gat na gɔsidi ya zaalim. 15 Ba na pɔ'ɔgi ya ka maali ya siaa. M ya'a kɛ ka tɔɔg nɛ mugusʋg paae ya, li na an nimmua sa'alʋgʋ tis tembanɛ giligi ya la. Man onɛ an Zugsɔb la yɛl ala. 16 M ya'a ti tɔɔn ya nɛ kɔ'ɔm wʋʋ piim kanɛ mɔr yabid nɛ, li na kʋʋ ya. M na kɛ ka kɔ'ɔm tɔllʋ kena ka ya kʋ nyɛ diibɔ. 17 M na kɛ ka kɔ'ɔm nɛ wɛog bʋnkɔnbid tʋ'ʋsi ya naae ya biis wʋsa. Tɔɔg nɛ zaba na gɛɛli ya, ka m kɛ ka ba zab nɛ ya. Man onɛ an Zugsɔb la yɛl ala.