Zugsɔb la zɛrig Israel dim la yɛla
6
1 Zugsɔb la da yɛlim ye; 2 Ninsaal biiga, ʋkimi fʋ nindaa kpa' Israel zuoya la; ka zɛrigi ba tisim. 3 Yɛlimi ba ye, Israel zuoya, wʋmmi Zugsɔb Paŋtita'ar Sɔb la labaar. Zugsɔb onɛ an Paŋtita'ar Sɔb la yɛl si'em nwa tisid zuoya nɛ kʋkʋna la nɛ bɔn'ɔd la wʋsa: M bɔɔd ye m zab nɛ ya, ka san'am san'ami ya teŋgbana la wʋsa. 4 Bimbim banɛ ka ya maan maana ka nyɔ'ɔd bʋnnyubisa la wʋsa m na nwa'a ba, ka kʋʋ ya nidib la ya bada la tuon. 5 M na dɛlig Israel nidib la niŋgbina ba bada la tuon, ka widigi ya kɔnba la giligi ya bimbima la. 6 Yanamɛ bɛ zin'isi'a wʋsa tɛɛns la na lieb zaalim ka ya teŋgbana la san'am, ka ya bimbima la san'am lieb zaalim, ka ba na nwa'a ya bada la bas, la'am nɛ ya bʋnnyubisa bimbima la; ka yanamɛ maal si'el wʋsa na bɔdig. 7 Ba na kʋʋ ya nidib la ya teŋsʋk, ka li kɛ ka ya baŋ ye manɛ sid an Zugsɔb la.8 “Amaa m na tiligi ya sieba, bɔzugɔ ya sieba na nyaŋi zɔɔ pɔns, ka widigi keŋ buudi nɛ tɛɛns bɛdegʋ ni. 9 Tɛɛns banɛ ka ba gban'e ba maal yammis la, banɛ pɔns la na tiɛn man yɛla ka baŋ man sʋnfʋ san'ami ba yɛla si'em. Ka li anɛ ba pʋtɛn'ɛr linɛ ka sida kae la, kɛ ka ba fɛndig ka bas mam, wʋʋ sɔ' na bas o pu'a ka bɔɔd pu'a sɔ', ba nini nyɛti ba bada la kɛ ka kʋkɔma'asim kpɛn' ba. Ba na kisigi ba mɛŋ tʋʋmbɛ'ɛd nɛ tʋʋmkisa banɛ ka ba tʋm la yɛla. 10 Ka ba na baŋ ye manɛ an Zugsɔb la, ka man da ye yɛla na kena la, m da pʋ vɔlisidnɛ nɛ nɔɔr pian'ad ma'aanɛ.”
11 Zugsɔb onɛ an Paŋtita'ar Sɔb la yɛl si'em nwa, ye, “La'asimi fʋ nu'us ayi' bibig zug ka kimis nɔba ka ki'e kuŋ, tʋʋmbɛ'ɛd nɛ tʋʋmkisa banɛ ka Israel dim tʋm la zug. Linɛ na kʋʋ ba anɛ zaba nɛ kɔ'ɔm nɛ tɔɔg. 12 Onɛ lal la, tɔɔg la na kʋʋ o; ka onɛ bɛ yammin, zaba la na kʋʋ o; ka onɛ pɔns ka pʋ kpii, kɔ'ɔm la na kʋʋ o. Ala ka m sʋnpɛɛn la na luu ba zug. 13 Ka ba na baŋ ye manɛ an Wina'am, ba ya'a nyɛ ka ba kʋʋ ba nidib la ka ba digi tɛri giligi ba maan bimbima nɛ ba bada zin'isin la nɛ teŋgban wʋsa ni nɛ zuor wʋsa zug nɛ titita'ar wʋsa gbinnin, zin'ibanɛ ka ba nyɔ'ɔd maana nɛ bʋnnyubisa tisidi ba bada la. 14 M na kɛ ka ba teŋ la lieb zaalim, lin pin'il pipirigin la ti paae Dibila teŋin nɛ ban bɛ zin'isi'a wʋsa. Ka ba baŋ ye manɛ sid an Zugsɔb la.”