Li bɛn paae ya
7
1 Zugsɔb la yɛlim ye, 2 “Ninsaal biiga, Zugsɔb onɛ an Paŋtita'ar Sɔb la yɛt si'eli nwa tisid Israel teŋ la ye, ‘Li bɛn paae ya! Li bɛn paae tis teŋgbauŋ la lʋga anaasi la wʋsa. 3 Li bɛnnɛ yʋ'ʋn paae la zug, m na kpa'ae m sʋnpɛɛn la niŋif. M na kadif saria ka li dɔlli fʋ tʋʋma. Tʋʋmkisa banɛ ka fʋ tʋm la wʋsa m na yɔɔ fʋ li yɛla. 4 M kʋ zɔɔf nimbaanlig bɛɛ basi fɔ; m sid na yɔɔ fʋ zʋgbɛ'ɛd nɛ tʋʋmkisa banɛ ka fʋ tʋm la lɛbis. Ala ka fʋ na baŋ ye manɛ sid an Zugsɔb la.’ ”5 Zugsɔb onɛ an Paŋtita'ar Sɔb la yɛl ye san'auŋ linɛ ka ya nan zi' nyɛ na paae ya. 6 Li bɛn paae ya! Li bɛn sid paae ya! Li duoe li mɛŋi gɛɛli ya. Li kena! 7 San'auŋ kɛɛn ya zugin na, yanam banɛ bɛ teŋin la. Saŋa la paae ya, dabisir la li'el ya, dabiem na bɛ zuoya la zug, ka li kʋ lɛn an sumalisim. 8 Li kʋ yuugɛ, m na kpa'ae m sʋnpɛɛn la niŋi ya zugin; m na kadi ya saria ka li dɔlli ya tʋʋma an si'em, ka lɛbisi yɔɔ ya tʋʋmkisa banɛ ka ya tʋmmi ya sʋʋgin la. 9 M kʋ zɔɔ ya nimbaanlig bɛɛ basi yaa. M na lɛbisi yɔɔ ya, ka li dɔlnɛ ya bɛllim nɛ tʋʋmkisa banɛ ka ya tʋm la. Ala ka ya na baŋ ye man onɛ an Zugsɔb la tʋmi li.
10 Dabisir la nwa! Li paae na! San'auŋ tansi yi paalʋ na, ka zabbɔɔdib la busid wʋʋ tutuud nɛ, ka tita'alim nɔbigid wʋʋ mɔɔd puum! 11 Nɔŋgbannwa'ar yʋ'ʋn nɔbignɛ kilim balaar ye li bʋ' bugusnamɛ namisi ba; nidib la baa yinne kʋ pɔnsɛ; banɛ la'asi maan tʋkpiidʋg la nɛ ba areza'as nɛ ba la'asʋma wʋsa kʋ pɔnsɛ. 12 Saŋa la paae ya, dabisir la paae ya. Onɛ da'ad la da mɔr sumalisim, ka onɛ mɛ kuosid la da mɔr sʋnsa'aŋa, bɔzugɔ san'auŋ la na paae sɔ' wʋsa. 13 Onɛ kuosid la kʋ lɛm paam paalʋ kanɛ ka o kuos la ba wʋsa vʋm saŋaa, bɔzugɔ nier linɛ pa'an nidib yɛla la kʋ tiakɛ. Ba tʋʋmbɛ'ɛd la zug, ba nid baa yinne kʋ tiligɛ. 14 La'am nɛ ban pieb na'atan ka ba ti'eb la, sɔ' kʋ yi zabirɛ, bɔzugɔ m sʋnpɛɛn paae nidib la wʋsa.
15 Zaba la bɛ nɛ yiŋ, ka wiim nɛ kɔ'ɔm bɛ teŋ la pʋʋgin; banɛ bɛ teŋ la yiŋ la na kpi zaba ni, ka kɔ'ɔm nɛ wiim mɛ kʋ banɛ bɛ teŋ la pʋʋgin. 16 Banɛ nyaŋi zɔɔ pɔns la na bɛ zuoya la ni kaasid wʋʋ sian'anr dawana, ba wʋsa na kaasidi ba mɛŋ tʋʋmbɛ'ɛd zug. 17 Nu'us wʋsa na kpi zɛba, ka duma wʋsa nyɔsid ka bʋk wʋʋ gungum nɛ. 18 Ba na yɛ bɔto fuud sʋnsa'aŋ zug ka dabiem gban'e ba. Nyan na kpɛn' ba ka ba pʋni ba zut. 19 Ba na nɔki ba anzurifa lɔbi bas suoraadin, ka sanlima lieb wʋʋ sa'ad nɛ. Daakanɛ ka Zugsɔb sʋnpɛɛn na luna la, ba anzurifa nɛ ba sanlima la kʋ nyaŋi faaɛn ba. Li kʋ tun'e ma'ae ba kɔ'ɔm bɛɛ pɛ'ɛli ba pʋʋrɛ, bɔzugɔ li anɛ linɛ kɛ ka ba tʋm tʋʋmbɛ'ɛd. 20 Ba da dʋ'ʋsidi ba mɛŋ nɛ ba niŋgɔnkɔris nɛ ba bʋnvɛnla la wʋsa zug, ka nɔki li kud bada nɛ wina banɛ ka man kis. Alazug man na tiaki li ka li lieb dian'ad bunnɛ tisi ba. 21 M na kɛ ka teŋ zʋŋ dim di'e li wʋsa zaba ni, ka dunia nimbɛ'ɛdnam na faaɛn ba la'ad la wʋsa, ka kɛ ka di lieb dian'ad. 22 M na fɛndigi m nindaa ka kʋ lɛn gɔsi baa, ka kɛ ka ba nɔk man zin'ig linɛ an kasi la maal yalis yalisi. Na'ayiis na kpɛn' ani maal linɛ ka' suorɛ.
23 “Ieemi baans, bɔzugɔ teŋ la pɛ'ɛli nɛ ninkʋʋr ka tempʋʋg la pɛ'ɛl nɛ taawai. 24 M na kɛ ka teŋ kanɛ mɔr bugusim gat sɔ' wʋsa la kena sʋ'ʋgi ba ya'. Ya nimbɛda la nyɛɛsim na naae, ka ba na san'ami ba pʋ'ʋsim dɔɔd la. 25 Mugusʋg ya'a ti kena kpɛn'ɛsi ba dabiem, ba na bɔɔd sumbʋgʋsʋm amaa ka kʋ nyɛɛ. 26 Yɛla nɛ lababɛ'ɛd na ta'a-ta'a taaba kena. Ba na bɔɔd ye nɔdi'esidib la yɛli ba linɛ na maal bɛog sa, amaa ba na mɔɔ gɛn; Zugsɔb wada linɛ ka maanmaannib la pa'an la kʋ lɛm bɛɛ, ka kpɛɛmnam sa'alʋg la mɛ kʋ lɛm bɛɛ. 27 Na'ab la na kaas kʋʋr, ka na'abiis la sʋnf san'am, ka teŋ la nidib wʋsa nu'us na kirid. Man na tɛɛgi ba tʋbir ka li dɔlli ba tʋʋma an si'em. Ba mɛŋ zi'esim an si'em la, ala ka m ye m dɔlisi kadi ba saria. Ala ka ba na baŋ ye manɛ sid an Zugsɔb la.”