Ba'ar linɛ bɛ Pʋ'ʋsim Yin la yɛla
8
1 Saŋa kanɛ ka ti da an yammisi bɛ teŋ zʋŋ la, yʋma ayuobʋ la ni, li nwadis ayuobʋ la dabisa anu daar la, ka man nɛ Israel kpɛɛmnam zin' m yin, ka Zugsɔb onɛ an Paŋtita'ar Sɔb la paŋ kɛɛn m san'an na. 2 M da nyɛ si'el ka li zi'e nwɛnɛ nid. Ka lin yii o siaa baba sig la nwɛnɛ bugum nɛ, ka o siaa la baba dʋt la nyɛɛn wʋʋ kʋnt nɛ. 3 O da tiɛn si'el ka li nwɛnɛ nu'ug nɛ gban'e m zuobid. Ka Siig la ʋkim agɔla mɔrimi keŋ Jerusalem zak linɛ bɛ pʋʋgin la za'anɔɔr linɛ lɛbid ya-dagɔbʋg baba la. Ani ka ba'ar linɛ duod Wina'am sʋʋnr la da zi'e.4 Ani ka m nyɛ Israel Wina'am girima la, wʋʋ man da nyɛɛ li si'em Keba kɔldaug paalʋ ni la.
5 Ka o yɛlim ye, “Ninsaal biiga, gɔsim kpa' ya-dagɔbʋg baba!” Ka m gɔsi nyɛ maan daka linɛ bɛ ya-dagɔbʋg za'anɔɔrin la, ka ba'ar linɛ duod Zugsɔb sʋnf la zi'e ani.
6 Ka o yɛlim ye, “Ninsaal biiga, fʋ nyɛ ban maan si'elaa? Li anɛ tʋʋmkisa banɛ ka Israel dim tʋm kpɛla, bʋmbanɛ na kɛ ka man lal nɛ m Pʋ'ʋsim Yin la. Hali fʋ na nyɛ yɛlkisa linɛ gaad ala.”
7 Ka o yʋ'ʋn mɔrimi kɛn Pʋ'ʋsim Yin la za'ambɛŋ za'anɔɔrin na, ka m gɔs ka zaŋguom la mɔr vɔɔnr. 8 Ka o yɛlim ye, “Ninsaal biiga, nannanna tʋʋm vɔɔnr zaŋguom la ni.” Ka m sid tu ka nyɛ za'anɔɔr ka li bɛɛ ani.
9 Ka o yɛlim ye, “Kpɛn'ɛm gɔs bugusim nɛ tʋʋmkisa linɛ ka ba tʋm kpɛla.” 10 Ka m sid kpɛn' nyɛ ka ba gʋli gʋl bʋnkɔnbid banɛ vuud nɛ bʋnkɔnbkisa nɛ Israel dim bada la wʋsa tabil zaŋguom la. 11 Israel kpɛɛmnam pisyɔpɔi da zi'e ani, ka Jaazanaya onɛ an Safan biig la mɛ la'am zi'e nɛ ba. Sɔ' wʋsa da zanli linɛ ka ba nyu'od bʋnnyubisa ani la ba nu'usin, ka nyɔ'ɔs zɔɔnd. 12 Wina'am da bu'osim ye, “Ninsaal biiga, fʋ nyɛ Israel kpɛɛmnam la tʋm si'el likinɛɛ? Sɔ' wʋsa zi'enɛ o ba'ar tuon. Bɔzugɔ ba gban'e ba pʋtɛn'ɛrin ye, ‘Zugsɔb la pʋ nyɛti tii; o tam teŋ la yɛla nɛ.’ ” 13 Ka o lɛn yɛlim ye, “Fʋ na nyɛ ka ba tʋm si'elnam ka li an bɛ'ɛdi gat nɛ'ɛnam.”
14 O da mɔrimi keŋ za'anɔɔr kanɛ bɛ ya-datiuŋ baba Zugsɔb Pʋ'ʋsim Yin la, ka m nyɛ pu'ab ka ba zi'e ani kaasid Tamuz onɛ an ba'ar la kʋʋr. 15 Ka o bu'osim ye, “Fʋ nyɛ nɛ'ɛŋaa? M na pa'alif tʋʋmbɛ'ɛd linɛ gaad fʋn nyɛt si'el la.”
16 O da mɔrimi kpɛn' Pʋ'ʋsim Yin zak linɛ bɛ pʋʋgin la. Ka dap wʋʋ ban pisi nɛ anu zi'e Pʋ'ʋsim Dɔɔg za'ambɛŋ nɛ maan daka la teŋsʋkʋ bid kudugʋ tis Dɔɔg la. Ba da kpa'anɛ ya-nya'aŋi wɔ'ɔgid winnig saŋkanɛ ka o tansid na la.
17 O da bu'osim ye, “Ninsaal biiga, fʋ nyɛ nɛ'ɛŋa wʋsaa? Li pʋ pak Juda dim nɛ ban tʋm tʋʋmfɛn'ɛsa laa? Hali ba lɛn ieed zaba ken nidib la sʋʋgin na ka li kɛ ka m sʋnf duoe nɛ ba. Gɔsim ban tʋ'ʋdim nɛ tʋ'ʋtita'ar si'em! 18 Alazug man na pa'ali ba ye m sʋnf duonɛ; m kʋ zɔɔ ba nimbaanlig bɛɛ basi baa. La'am nɛ ban kpiidi m tʋba nii bɛllim la, m kʋ wʋm tisi baa.”