Ban kʋ ba'amaannib la yɛla
9
1 M da wʋm ka Wina'am tans nɛ kʋkɔtita'ari yɛl ye, “La'asimi banɛ gur tempʋʋg la kpɛla na, ka kɛ ka sɔ' wʋsa mɔr o zaba la'ad o nu'ugin!” 2 Ka m nyɛ dapa ayuobʋ ka ba yi ya-datiuŋ baba za'anɔɔr kanɛ bɛ zugin la kenna, ka mɔr zaba la'abɛda ba nu'usin. Sɔ' da paasi dɔlli ba yɛ fupiel ka zanl si'el linɛ ka o na nyaŋi sɔbi li zug ka li lab o sakpidir. Ba da kpɛn' na zi'enɛ kpi'en nɛ kʋntzɛn'ug maan daka la. 3 Ka Israel Wina'am la na'am pipilim da naan Kerubnam la zugin, lin da pʋn dɛŋi bɛ zin'isi'a la, dʋʋ agɔla ka keŋ ban dɔl zin'isi'a kpɛn'ɛd Pʋ'ʋsim Dɔɔgin la. Ka Zugsɔb buol onɛ yɛ fupiel ka zanl linɛ sɔbid ka li lab o sakpidirin la 4 ka yɛl o ye, “Kem kaae gilig Jerusalem tempʋʋg la wʋsa ka zanbil banɛ wʋsa sid kum ka fabin tʋʋmkisa banɛ wʋsa tʋm teŋ la pʋʋgin la gbɛ'ɛlaas.”5 Man da kɛlisid la, ka wʋm ka o yɛl bama la ye, “Dɔlli nɛ o gilig teŋ la wʋsa kʋ nidib la. Da zɔɔe sɔ' nimbaanlig bɛɛ mɔr nyɔɔg nɛ sɔ'. 6 Kʋʋmi bʋnkʋt nɛ dasam nɛ pu'asada nɛ pu'ab nɛ biis, amaa da si'isi onɛ wʋsa mɔr zanbinnɛ o gbɛ'ogʋnɛ. Pin'ilimi Pʋ'ʋsim Dɔɔg la pʋʋgin.” Ba sid da pin'il nɛ kpɛɛmnam banɛ bɛ Pʋ'ʋsim Dɔɔg la tuon la.
7 Wina'am da yɛli ba ye, “Miligimi Pʋ'ʋsim Dɔɔg la ka li da lɛn an kasii, ka kʋ nidibi pɛ'ɛl za'as la. Kemi!” Ka ba sid yi ka pin'il kʋʋb teŋ la wʋsa pʋʋgin. 8 Ban da pin'ili kʋʋd la ka man kpɛlimi m kɔn' ani, ka m luu avanba ka kaas kuŋ ye, “Aa, Zugsɔb onɛ an Paŋtita'ar Sɔba! Anwa ka fʋ ye fʋ mɔr tɔɔg linɛ ka fʋ lɔbi bas Jerusalem teŋ zug la san'am Israel nimbanɛ kpɛlim la wʋsaa?”
9 Ka o lɛbisi yɛlim ye, “Israel nɛ Juda nidib la tʋmnɛ tʋʋmbɛ'ɛtita'ar hali. Teŋgbauŋ la pɛ'ɛli nɛ ziim ka sida lɛn kae tempʋʋgin laa. Ba yɛt ye, ‘Zugsɔb la tam teŋ la yɛla nɛ: Zugsɔb la pʋ nyɛtaa.’ 10 Alazug man kʋ zɔɔ ba nimbaanlig bɛɛ kɛ ka sɔ' pɔnsɛ, amaa ban maal si'el la wʋsa, m na kɛ ka li lɛbi ba zugin na.”
11 Ka dau kanɛ yɛ fupiel ka zanl linɛ sɔbid o sakpidirin la lɛb na yɛt ye, “Man tʋm wʋʋ fʋn yɛlim si'em la naae.”