Zugsɔb girima la yi ka bas Pʋ'ʋsim Yir la yɛla
10
1 M da gɔsi nyɛ bʋnsi'a linɛ nwɛnɛ na'am kʋk ka li nyɛɛnnɛ nwɛnɛ gɔtiŋ nɛ bɛ linɛ an lammiri ka bɛ Kerubnam la zugin la. 2 Zugsɔb la da yɛl onɛ yɛ fupiel la ye, “Kem kpɛn' fiil banɛ bɛ Kerubnam la lɛuŋʋn la teŋsʋk ka gbin'e bugumsaana linɛ bɛ Kerubnam la teŋsʋk la pɛ'ɛli fʋ nu'us ka widigi li kpɛn'ɛs tempʋʋgin la.” Ka man nan gɔsid la ka o keŋ kpɛn' ani.3 Saŋkanɛ ka dau la kpɛn' la, Kerubnam la da zi'enɛ Pʋ'ʋsim Dɔɔgin la lɛbisid ya-dagɔbʋg baba, ka Zugsɔb girima la pɛ'ɛl zak la. 4 Zugsɔb girima la da yi Kerubnam la zugin keŋ paae Dɔɔg la za'ambɛŋin la, ka zin'ig la pɛ'ɛl nɛ Zugsɔb girima la vɛnlim. 5 Kerubnam la kpʋkpama da vuud Pʋ'ʋsim Dɔɔg la za'ambɛŋin la ka li wʋm paalʋ wʋʋ Wina'am Onɛ an Paŋtita'ar sɔb la ɛɛn pian' ka li an si'em la.
6 Saŋkanɛ ka Zugsɔb la da tis onɛ yɛ fupiel la nɔɔr ye o gbin'e bugum fiilnam la nɛ Kerubnam la teŋsʋk la, dau la da keŋ zi'enɛ kpi'en nɛ fiil yinne. 7 Ka Kerub yinne tiɛn o nu'ugʋ paae bugum kanɛ bɛɛ ba teŋsʋk la. O da gbin'e bugum la niŋ dau la nu'ugin, ka o mɔri lii yi yiŋ. 8 (Bʋnsi'a da bɛ Kerubnam la kpʋkpama lɛuŋʋn nwɛnɛ ninsaal nu'us nɛ.)
9 M da gɔsi nyɛ fiilnam anaasi kpi'e Kerubnam la, ka yinne wʋsa kpi'e bʋnvʋr yinne, nyɛɛn hali wʋʋ gɔtiŋ nɛ. 10 Ya'a kpɛlim ban nwɛn si'em yɛla, ba wʋsa da nwɛnɛ taaba, yinne wʋsa da nwɛnɛ ba nɔknɛ yinne nyaae li tiraan pʋʋgin nɛ. 11 Ka Kerubnam la ya'a ken dunia lʋga anaasi la wʋsa zin'isi'a fiilnam la dɔlnɛ ka li ka' ye ba fɛndigɛ, Kerubnam la ya'a ken zin'ikanɛ ka ba zug kpa' wʋsa, ba kennɛ ka pʋ fɛndigida. 12 Ba niŋgbina la wʋsa la'am nɛ ba nya'aŋ nɛ ba nu'us nɛ kpʋkpama wʋsa da anɛ nini ma'aa, la'am nɛ fiilnam anaasi la wʋsa. 13 Man da wʋm ka ba buon fiilnam la ye, “Fiilzɔta.” 14 Kerubnam la wʋsa da mɔri nindaas anaas naas. Nindaa yinne da nwɛnɛ Kerub nindaa, ka linɛ paas ayi' la nwɛnɛ ninsaal nindaa, ka linɛ paas atan' la nwɛnɛ gbigim nindaa, ka linɛ paas anaasi la nwɛnɛ abaar nindaa.
15 Kerubnam la da duoe dʋt agɔla. Bama da an bʋnvʋbanɛ ka m da dɛŋin nyɛ Keba kɔldaug la dɛn'ɛr la. 16 Kerubnam la ya'a da ken, fiil banɛ bɛɛ ba lʋga ni la mɛ kennɛ, ka ba ya'a ti yadigi ba kpʋkpama la ye ba iank teŋin dʋʋ agɔla, fiilnam la mɛ dɔlnɛ. 17 Kerubnam la ya'a ti zi'en baanlimm, li mɛ zi'enid nɛ, ka ba ya'a duoe ka li mɛ duoe, bɔzugɔ bʋnvʋya la siig da bɛ fiilnamin la.
18 Zugsɔb girima la da yi za'ambɛŋin la keŋ zi'en Kerubnam la zugin. 19 Man da nan gɔt la, ka Kerubnam la yadigi ba kpʋkpama ye ba iank teŋin dʋʋ agɔla, ka ban iank la ka fiilnam la mɛ ianki dɔlli ba. Ba da keŋ zi'en Pʋ'ʋsim Yir za'anɔɔr linɛ bɛ ya-nya'aŋ baba la, ka Israel Wina'am la girima bɛɛ ba zugin.
20 Bʋnvʋbama ka man da nyɛ Israel Wina'am la san'an Keba kɔldaug la baba la, ka m baŋ ye ba anɛ Kerubnam. 21 Ba wʋsa da mɔri nindaas anaas naas, nɛ kpʋkpama anaas naas ka si'el bɛɛ ba kpʋkpama lɛuŋʋn nwɛnɛ ninsaal nu'us nɛ. 22 Ba nindaas la da nwɛnɛ banɛ ka man nyɛ Keba kɔldaug baba la. Ba wʋsa da kpɛn kennɛ kpa'adi ba nindaa kpa' si'em la ken.