Israel tuongatib tʋbtɛkir yɛla
11
1 Wina'am Siig la da ʋkimi keŋ Zugsɔb Pʋ'ʋsim Yir za'anɔɔr linɛ kpa' ya-tuona baba la. Za'anɔɔrin la dap pisi nɛ anu da zin' ani, ka m nyɛ Jaazanaya onɛ an Azur biig la nɛ Pelataya onɛ an Benaya biig la ka ba bɛɛ ba teŋsʋk, banɛ an nidib la tuongatib. 2 Zugsɔb la da yɛlim ye, Ninsaal biiga, nimbama gban'adnɛ gban'abɛ'ɛd, ka sa'an nidib la bugusim sa'alʋg tempʋʋg kaŋa ni. 3 Ba ye, Li pʋ kpɛlim bi'ela ka ti pin'il ya' mɛɛbɔ? Tempʋkaŋa anɛ dʋk kanɛ ka ba mɔri dʋgid, ka tinam an ni'im la.4 Alazug di'em m nɔɔr pian'ad linɛ ka m zɛrigi ba la tisi ba; pian'am, Ninsaal biiga.
5 Ka Zugsɔb Siig la kɛɛn m san'an na, ka Zugsɔb la ye m yɛlim ye, Zugsɔb la yɛl si'em nwa ye, Yanamɛ yɛt si'em nwa, Israel nidiba, amaa man mi' linɛ bɛɛ ya pʋtɛn'ɛrin. 6 Ya kʋ nidib bɛdegʋ tempʋkaŋa ni, ka suoraad la pɛ'ɛl nɛ kum.
7 “Alazug Zugsɔb onɛ an Paŋtita'ar Sɔb la yɛl si'em nwa ye, ‘Kum banɛ ka ya kʋʋ lɔbi digil la an ni'im la, ka tempʋʋg la an dʋk la, amaa m na kadi ya yisi li ni.’ 8 Zugsɔb onɛ an Paŋtita'ar Sɔb la yɛl ye, Ya zɔtnɛ sʋ'ʋg la, ka sʋ'ʋg la mɛn ka m ye m nɔki kʋʋ ya. 9 M na kadi ya yis teŋ la ni, ka nɔki ya tis teŋ zʋŋ nidib ka ba namisi ya. 10 Sʋ'ʋg la ye li kʋʋ ya, ka m kadi ya saria ka kɛ ka tɔɔg paae ya Israel teŋ titɔndigin; ka ya baŋ ye manɛ sid an Zugsɔb la. 11 Tempʋkaŋa kʋ an dʋkʋ tisi ya bɛɛ yanam an ni'imi li nii. Man na kadi ya saria ka namisi ya, Israel teŋ la titɔndis baba. 12 Ka ya baŋ ye manɛ sid an Zugsɔb la, bɔzugɔ ya pʋ siaki m zi'ela bɛɛ m wada la, amaa ya lɛɛ niŋidi wʋʋ sʋ'ʋlim banɛ giligi ya la niŋid si'em la nɔɔ.”
13 Tɔ, ka man da nan yɛt on ye m yɛlim si'el la, Pelataya onɛ an Benaya biig la da kpiya. Ka m luu avanba ka kaas kuŋ ye, “Aa! Zugsɔb onɛ an Paŋtita'ar Sɔba! Fʋ na kʋ Israel nimbanɛ kpɛlim la wʋsaa?”
Israel lɛbig la yɛla
14 Zugsɔb la pian'ad da kɛɛn m san'an na ye, 15 “Ninsaal biiga, fʋ ba'abiis la, ɛɛn fʋ ba'abibanɛ ka fʋn nɛ ban an ziim yinne la, nɛ Israel dim la wʋsa anɛ banɛ ka Jerusalem dim la yɛt ye ya lalli nɛ Zugsɔb la. Ka ye, ‘Tinam ka ba tis teŋ kaŋa ye ti sʋ'oe li.’ ”
16 Ka Zugsɔb da lɛn yɛlim ye, Alazugɔ yɛlimi ba ye Zugsɔb onɛ an Paŋtita'ar Sɔb la yɛl si'em nwa ye, La'am nɛ man mɔri ba keŋ lalli widigi ba kpɛn'ɛs sʋ'ʋlimnamin nɛ tɛɛnsin la, m bɛ nɛ ba zin'ikanɛ wʋsa ka ba keŋ.
17 Alazugɔ yɛlimi ba ye Zugsɔb onɛ an Paŋtita'ar Sɔb la yɛl si'em nwa ye, Man na la'asi ya sʋ'ʋlimnamin la ka zii ya yi tɛɛns banɛ ka ya widig la ni mɔri ya lɛb na, ka lɛn lɛbis Israel teŋ la tisi ya ya'as.
18 Ba na lɛbi li ni ka vɔn' bada nɛ wina banɛ ka man kis la. 19 M na tisi ba pʋtɛn'ɛr yinne linɛ ka ba kʋ bi'es mam, ka nɔk sipaaligi kpɛn'ɛsi ba pʋʋgin. M na yisi ba sʋnya linɛ kpi'em wʋʋ kugir la, ka tisi ba sʋnya linɛ bʋgʋs. 20 Ala ka ba na nyaŋi dɔlli m gban'ar ka gu'us ka dɔlli m wada la. Ba na aan m nidib, ka man na aan ba Wina'am. 21 Amaa banɛ nɔki ba sʋnya pɛsigi tisi ba wina nɛ bada banɛ ka man kis la, ban tʋm si'el wʋsa m na kɛ ka li lɛbi ba zugin na. Zugsɔb onɛ an Paŋtita'ar Sɔb la pian'ʋkʋ la.