Maalim nwɛnɛ onɛ ka ba gban'e ken teŋ zʋŋ nɛ
12
1 Zugsɔb pian'ad la da kɛɛn m san'an na ye, 2 “Ninsaal biiga, fʋ bɛ nɛ nimbanɛ tʋbaa ziank ka pʋ siakid sʋʋgin. Ba mɔr nini ka li nar ye ba nyɛt amaa ba pʋ nyɛta, ka mɔr tʋba ka li nar ye ba wʋm, amaa ba pʋ wʋmma, bɔzugɔ ba anɛ nimbanɛ ki'isid.3 “Alazug, Ninsaal biiga, la'asimi fʋ la'ad nintaŋ wʋʋ fʋ zɔtnɛ lɔ'ɔŋid teŋ zʋŋ ka ba nyɛtif, ka naan fʋn bɛ zin'isi'a la tɔɔm keŋ zin'isi'a. Ka daasi'erɛɛ ba na gban'e li gbin, la'am nɛ ban an nimbanɛ pʋ siakid la. 4 Bɛog ya'a nie, fʋn yisimi fʋ la'abanɛ ka fʋ lɔ wʋʋ fʋ ti'eb nɛ zɔti lɔ'ɔŋid teŋ zʋŋ la. Yisimi li paalʋ na ka ba nyɛ; ka zaam ya'a ma'ae fʋn yim wʋʋ banɛ ɛɛn ken teŋ zʋŋ ye ba an yammidi yit si'em la. 5 Ban nan gɔsid la, kibigim vɔɔnr zaŋguomin la ka zii fʋ la'ad la dɔl ani yi. 6 Nɔkim la'ad la pa'ali fʋ biankimpiiung zug ban nan gɔt la, ka fʋ zii lii yi sisɔbir win. Lusimi fʋ nindaa, linɛ na kɛ ka fʋ kʋ nyɛt teŋ laa, bɔzugɔ m ye m nɔknɛ fʋn ka fʋ an zanbinnɛ tis Israel nidib la.”
7 Alazug m da niŋ wʋʋ on tisim nɔɔr si'em la. Bɛog da nie ya ka m yisi m la'abanɛ ka m lɔ ye m keŋ teŋ zʋŋʋ an yammʋg la. Ka zaam ma'ae ka m nɔki m nu'usi kibig vɔɔnr zaŋguomin la. 8 Bɛog da nie ya ka Zugsɔb la pian' tisim ye, 9 Ninsaal biiga, Israel nimbanɛ an ki'isʋg dim la pʋ bu'osif ye, “Bɔɔ la ka fʋ maana?”
10 Yɛlimi ba ye, Zugsɔb onɛ an Paŋtita'ar Sɔb la yɛl ye, “Labakaŋa anɛ na'abiig kanɛ bɛ Jerusalem la nɛ Israel nimbanɛ bɛɛ ani la din.” 11 Yɛlimi ba ye, “Man anɛ zanbinnɛ tisi ya.” Man maal si'el la, lin nɔɔ ye li niŋi ba. Ba na keŋ teŋ zʋŋʋ lieb yammis. 12 Na'abiig kanɛ bɛ nɛ ba la na vaae o la'adi zii o biankimpiiung zug ka yii gaad, li ya'a ti an sɔb-sɔb la; ka ba na kibig zaŋguom la ka o dɔl ani gaad. O na ligil o nindaa linɛ na kɛ ka o kʋ nyɛt teŋ la. 13 M na yadigi m zulis la gban'e o, ka mɔr o keŋ Babilon linɛ an Kaldea dim teŋ la, amaa o kʋ nyɛɛ li, ani ka o na kpi. 14 Banɛ aan o tʋmtʋmnib nɛ o zabzabidib la wʋsa man na widigi ba ka dɔlisi kʋʋ ba.
15 Man ya'a ti widigi ba dunia wʋsa nɛ tɛɛns wʋsa ni la, ba na baŋ ye manɛ an Zugsɔb. 16 Amaa m na basi ba sieba ka kʋ kʋʋ ba, kɔ'ɔm nɛ tɔɔg la mɛ kʋ nyaŋi ba, ka linɛ na kɛ ka ban keŋ zin'isi'a wʋsa ba na tiɛn ba tʋʋmkisa la yɛla. Ka na baŋ ye manɛ an Zugsɔb.
17 Zugsɔb la da lɛm pian' tisim ye, 18 “Ninsaal biiga, dimmi fʋ diib la nɛ dabiem, ka fʋ ya'a nuudi fʋ ku'om la fʋn on kirim gba-gba-gba. 19 Yɛlim teŋ la nidib ye, ‘Zugsɔb onɛ an Paŋtita'ar Sɔb la yɛl si'em nwa zaŋi ken banɛ bɛ Jerusalem nɛ Israel teŋin la: Ba na dii ba diib la nɛ dabiem ka nuu ba ku'om la nɛ kikirʋg, bɔzugɔ ba teŋ la na kpɛlim zaalim ka li anɛ sɔ' wʋsa onɛ bɛ teŋ la zugʋ pʋ tʋm linɛ nar la zug. 20 Tɛɛns banɛ ka nidib pɛ'ɛl la na san'am, ka sʋ'ʋlimnam na kilim sian'anr. Lin ka ya na baŋ ye manɛ an Zugsɔb la.’ ”
21 Zugsɔb labaar da kɛɛn m san'an na ye, 22 “Ninsaal biiga, bɔ siiliŋʋ la ka ba mɔri siilim Israel teŋin la ye, ‘Dabisa la gat ka linɛ ka ba ye li na niŋ la wʋsa nam pʋ niŋɛ’? 23 Yɛlimi ba ye, ‘Zugsɔb onɛ an Paŋtita'ar Sɔb la yɛl si'em nwa ye, “Man ye m kɛnɛ ka siiliŋ kaŋa kpi, ka ba kʋ lɛn siilimi li ya'as Israel teŋinɛ.” Yɛlimi ba ye, “Saŋa la paae ya ka linɛ ka ba da yɛl ye li na niŋ la wʋsa sid na niŋ. 24 Bɔzugɔ, banɛ ma'ad ye ba nyɛt la nɛ ziri nɔdi'esidib la kʋ lɛm bɛ Israel nidib la san'an ya'asɛ. 25 Amaa man onɛ an Zugsɔb la na pian' linɛ ka m bɔɔd ye m maal, ka li sid na niŋ ka kʋ yuugɛ. Yanam banɛ ki'isidim la ya zʋmaaŋ nwa ni ka m na kɛ ka man yɛl si'el la wʋsa niŋ.” Zugsɔb onɛ an Paŋtita'ar Sɔb la yɛl ala.’ ”
26 Zugsɔb la labaar da kɛɛn m san'an na ye, 27 Ninsaal biiga, Israel nidib la yɛt ye man nie si'eli pa'alif la anɛ yʋma bɛdegʋ sa labaar, ka fʋ pian'adnɛ bɛog sa yɛla ma'aa.
28 Alazug yɛlimi ba ye, Zugsɔb onɛ an Paŋtita'ar Sɔb la yɛl si'em nwa ye, “Man pian' si'el la wʋsa kʋ lɛn yuugɛ ka tʋm, man yɛl si'el la wʋsa na tʋm. Zugsɔb onɛ an Paŋtita'ar Sɔb la pian'ʋkʋ la.”