Zugsɔb la zɛrig ziri nɔdi'esidib
13
1 Zugsɔb la pian'ad da lɛn kɛɛn m san'an na ye, 2 Ninsaal biiga, di'emi m nɔɔr pian'ad linɛ ka m zɛrig Israel nɔdi'esidib banɛ pian'ad linɛ na maal bɛog sa la tisi ba. Pian'am tis banɛ pian'adi ba mɛŋi tɛn'ɛs si'el la ye, Kɛlisimi Zugsɔb la pian'ad! 3 Zugsɔb Onɛ an Paŋtita'ar Sɔb la yɛl si'eli nwa ye, Tɔɔg na paae nɔdi'esidib banɛ an zɔn ka dɔlisidi ba mɛŋi tɛn'ɛsid si'el ka sid pʋ nyɛ si'el la! 4 Israel dima, ya nɔdi'esidib la nwɛnɛ wɛbaas banɛ bɛ dabɔɔdin nɛ. 5 Ya pʋ keŋi mɛ' zaŋguom la zin'ibanɛ mɔr wɛn la lɛbis ka Zugsɔb zaba dabisir la daar ya'a ti paae, li na zi'e kiŋ-kiŋ nɛ. 6 Ban pian'ad si'el la anɛ ziri ka ban gɔsidi nyɛt si'el ka yɛt la an faad. Ba yɛt ye, “Zugsɔb la pian'ʋkʋ la!” Amaa mam pʋ tʋmi ba. Nɛ lin wʋsa ba yɛt ye ba pian'ad la na niŋ asida. 7 Yanamɛ pian'ad si'el nɛ yanamɛ gɔsidi nyɛt si'el ka yɛt ye, “Zugsɔb pian'ʋkʋ la, ka li ka' ala la, li ka'anɛ zirii?”8 Dinzugɔ, Zugsɔb Onɛ an Paŋtita'ar Sɔb la yɛl si'eli nwa ye, “Ya ziri pian'ad nɛ yanamɛ pʋ nyɛta ka faad la zug ka m zɛrigi ya.” Zugsɔb Onɛ an Paŋtita'ar Sɔb la pian'ʋkʋ la. 9 M na zan'as nɔdi'esidib banɛ pian'ad ziri ka faad linɛ saa na maal bɛog sa yɛla la. Ba kʋ la'as nɛ m nidib la bɛɛ ba yʋda sɔbi paas Israel dim la ni, bɛɛ ba kpɛn' Israel teŋinɛ. Ala ka ya na baŋ ye manɛ an Zugsɔb Onɛ an Paŋtita'ar Sɔb la.
10 Ba kpɛn'ɛsidi m nidib la mɔɔg, ka yɛt ye, “Sumbʋgʋsʋm bɛ” ka sumbʋgʋsʋm lɛɛ kae. Ba ya'a mɛ' zaŋguom ka li pʋ mɔr paŋa, ba nɔkid gɔɔrpielli bʋligidi li. 11 Dinzugɔ, yɛlim banɛ bʋligi li nɛ gɔɔrpiel la ye li na li. Saa na ni ka sisi'em nɛ sakuga da'ae li bas teŋin. 12 Zaŋguom la ya'a ti li, nidib kʋ bu'osi ya li yɛlaa? Ba sid na bu'os ye, “Gɔɔrpiel la ka ya daa buligi li la bɛ yaanɛ?”
13 Alazug Zugsɔb onɛ an Paŋtita'ar Sɔb la yɛl si'em nwa ye, M sʋʋnr ya'a ti duoe, m na kɛ ka sisi'etita'ar kena, ka m sʋnpɛɛn saŋa, m kɛ ka sakʋdʋg ni ka sakuga luna san'ami li wʋsa. 14 Man na nwa'ae zaŋguom kanɛ ka ya nɔk gɔɔrpielli bʋlig la nyain ti paae li ɛɛnbir la; ka ɛɛnbir la mɛŋ nie paalʋ, ka li liig la pʋʋgin yanam mɛ na kpi, ka ba baŋ ye manɛ sid an Zugsɔb la. 15 Linzug zaŋguom la na nyɛ tɔɔg la'am nɛ banɛ nɔk gɔɔrpielli buligi li la. M na yɛli ya ye, “Zaŋguom la gaad ya, la'am nɛ banɛ buligi li la, 16 nɔdi'esidib banɛ bɛ Israel ka yɛt Jerusalem dim ye si'el wʋsa an nɛ sumbʋgʋsʋm ka li mɛ ka' sumbʋgʋsʋm la.” Zugsɔb onɛ an Paŋtita'ar Sɔb la pian'ʋkʋ la.
17 Nannanna, Ninsaal biiga, fɛndigimi fʋ nindaa kpa' pu'a banɛ pian'ad nɔdi'esʋg pian'ad nɛ ba mɛŋ ya'am la, ka di'e m nɔɔr pian'ad linɛ ka m zɛrigi ba la 18 tisi ba ye, Zugsɔb onɛ an Paŋtita'ar Sɔb la yɛl ye, “Tɔɔg bɛ pu'a banɛ nɔk sɔɔng nɛ tima nɛ piena linɛ wa'alim pʋ zem taabaa ligili ba zut ye ba bɛlis nidibi nyaŋi ba la. Ya na san'am man nidib la nyɔvʋr ka yanam din lɛɛ bɛɛ? 19 Diib bi'ela zug ka ya san'am man yʋ'ʋr nidib la san'an. Ya ma'ad ziri tisid nimbanɛ kɛlisid ziri pian'ad la, ya kʋ banɛ pʋ nar ye ba kpii, ka bas banɛ pʋ narin ye ba vʋe la.”
20 Alazug Zugsɔb onɛ an Paŋtita'ar Sɔb la yɛl ye, “M sʋnf pʋ malis nɛ ya yuomʋg tiim linɛ ka ya mɔri yuomid nidib ka li nwɛnɛ niimis ka ba gban'e ba kpɛn'ɛs tiita ni la. M na aansi ba yisi ya kpʋkpama la ni, ka tis nimbanɛ ka ya yuomi ba la yɔlisim wʋʋ niimis nɛ. 21 M na aansi ya piena la ka faanm nidib la yisi ya nu'usin, ka ya paŋ la kʋ lɛn nyaŋi ba. Ala ka ya na baŋ ye manɛ an Zugsɔb la. 22 La'am nɛ man da pʋ kɛ ka sʋnsa'aŋ kena la, ya ma'ad pʋpielnam la nɛ ya ziri pian'ad, ka kpɛmisid tʋʋmbɛ'ɛd dim ye ba da bas tʋʋmbɛ'ɛd ka faaɛn ba nyɔvʋrɛ. 23 Alazug ka ya kʋ lɛn nyɛt ka yɛt linɛ an ziri, bɛɛ bʋgʋdi yɛt linɛ ka' sidaa. M na faanm nidib la yisi ya nu'usin. Ka ya na baŋ ye manɛ sid an Zugsɔb la.”