Wina'am n zɛrig ba'amaannib la yɛla
14
1 Israel kpɛɛmnam la sieba da kɛɛn m san'an naa zin'inɛ m tuon. 2 Ka Zugsɔb labaar la kɛɛn m san'an na ye, 3 Ninsaal biiga, nimbama nɔknɛ ba sʋnya tis bada, ka nɔk bugusim pʋtɛn'ɛr ka li vi' ba suor. Li nar ye m kɛ ka bama baŋ linɛ na yii m san'an na bɛɛ? 4 Alazug pian'am tisi ba ka yɛli ba ye, Zugsɔb onɛ an Paŋtita'ar Sɔb la yɛl si'eli nwa, “Israel nid sɔ' ya'a nɔk o sʋnfʋ tis bada, ka nɔk pʋtɛn'ɛbɛ'ɛd ka li vi' o suor, ka keŋ nɔdi'es san'an bɔɔd ye o baŋ si'el, mam mɛŋ na yɛl o ka li dɔl wʋʋ o bada la bɔɔdim nar si'em la. 5 M na niŋ ala ka li sʋŋ ka m nyaŋi maligim paam nimbanɛ wʋsa bɛ Israel ka bas mam ka dɔl bada la.”6 Dinzug yɛlim Israel nidib la ye, Zugsɔb onɛ an Paŋtita'ar Sɔb la yɛl si'em nwa, “Tiakimi! Basimini ya bada la nɛ tʋʋmkisa banɛ wʋsa ka ya tʋm la!
7 “Israel nid sɔ', bɛɛ saan kanɛ bɛ nɛ ya, ya'a yis o mɛŋ man san'an ka nɔk o sʋnfʋ dɔl bada ka nɔk pʋtɛn'ɛbɛ'ɛd ka li vi' o suor ka keŋ nɔdi'es san'an ye o baŋ o yɛl gbin, man mɛŋ na lɛbis o pian'ʋk. 8 M sʋnf na duoe nɛ ninkaŋa sɔb hali ka li na an sa'alʋgʋ tis sieba. M na yis o m nidib la san'an. Ka ya na baŋ ye manɛ an Zugsɔb la.
9 “Ka o ya'a nyaŋi bɛlis nɔdi'es la ka o yɛl o si'el, li anɛ manɛ pan'as nɔdi'es kan la, ka m na yis nɔdi'es kan la m nimbanɛ an Israel dim la sʋʋgin. 10 Ba na zii ba mɛŋ taal ka li kpanb nɔdi'es la nɛ onɛ kɛɛn o san'an na la. 11 Ka li kɛ ka Israel nidib la kʋ lɛm bas mam, bɛɛ budimi ba mɛŋ nɛ ba tʋʋmbɛ'ɛd la wʋsaa. Ba na aan m nidib ka man na aan ba Wina'am.” Zugsɔb onɛ an Paŋtita'ar Sɔb la pian'ʋkʋ la.
Tɔɔg linɛ ka sɔ' kʋ pɔnsɛ
12 Zugsɔb la da pian' tisim ye, 13 “Ninsaal biiga, teŋ si'a dim ya'a tʋm bɛ'ɛdi san'ami m sʋnf ka li anɛ ye ba ka'anɛ sida dima, ka m gban'e ye m namisi ba ka ba kʋ nyɛ diibɔ, ka kɛ ka kɔ'ɔm lu teŋ la zugʋ kʋʋ ba nidib nɛ ba bʋnkɔnbid, 14 hali baa Noa nɛ Daniel nɛ Job ya'a pʋn bɛ teŋ kan la ni, ba na nyaŋi faaɛn ba mɛŋ ka li anɛ ba pʋpielim la zug.” Man Zugsɔb la pian'ʋkʋ la. 15 Bɛɛ m ya'a kɛ ka wɛog bʋnkɔnbid kpɛn' teŋ kan ni kʋ sɔ' wʋsa ka li kpɛlim zaalim, ka sɔ' kʋ nyaŋi dɔl ani gaadɛ, ka li anɛ bʋnkɔnbid la yɛla, 16 man Zugsɔb onɛ an Paŋtita'ar Sɔb la yɛt ye asida sida, hali baa nidiba atan' nwa ya'a bɛ teŋ kan la ni, ba kʋ nyaŋi faaɛn ba mɛŋ biribis nɛ bipumisɛ. Bam mɛŋ ma'aa na paam faangir amaa teŋ la na kpɛlim zaalim.
17 Bɛɛ m ya'a kɛ ka zaba lu teŋ kan ni ka yɛl ye, Li tiigim teŋ la wʋsa, ka kʋ nidib nɛ ba bʋnkɔnbid wʋsa, 18 Zugsɔb onɛ an Paŋtita'ar Sɔb la yɛt ye asida sida, hali baa nimbama atan' nwa ya'a bɛ teŋ kan ni, ba kʋ nyaŋi faaɛn ba mɛŋ biribis nɛ bipumisɛ. Bam mɛŋ ma'aa na paam faangir.
19 Bɛɛ m sʋnf ya'a pɛlig ka m kɛ ka ban'abɛ'ɛd lu teŋ la zugʋ kʋʋd dap nɛ bʋnkɔnbid, 20 Zugsɔb onɛ an Paŋtita'ar Sɔb la yɛt ye, asida sida, hali baa Noa nɛ Daniel nɛ Job ya'a bɛɛn teŋ kan la ni, ba kʋ nyaŋi faaɛn ba mɛŋ biribis nɛ bipumisɛ. Ba na faaɛnnɛ ba mɛŋ ma'aa ba pʋpielim la zug.
21 Zugsɔb onɛ an Paŋtita'ar Sɔb la yɛl ye, “M ya'a ti tʋm na'amistitada anaasi banɛ an zaba nɛ kɔ'ɔm nɛ wɛog bʋnyuos nɛ ban'abɛ'ɛd Jerusalem tempʋʋgin la na ka li kʋ nidib nɛ ba bʋnkɔnbid wʋsa, li na tɔi gaad ala. 22 La'am nɛ wala sieba na tilig; biribis nɛ bipumis na yii li pʋʋgin na. Ba na kɛɛn ya san'an na, ka ya ya'a nyɛɛ ba bɛllim nɛ ba tʋʋma, li na bʋgʋli ya sʋnya zaŋi ken san'auŋ kanɛ ka m kɛ ka li paae Jerusalem la. 23 Ya ya'a nyɛɛ ba bɛllim nɛ ba tʋʋma li na bʋgʋli ya sʋnya ka ya baŋ ye linɛ ka m maal la wʋsa, gba'ari bɛ ka m niŋ ala.” Zugsɔb onɛ an Paŋtita'ar Sɔb la pian'ʋkʋ la.