Kʋʋr kukuma Na'ab Faaro yɛla
32
1 Tinamɛ da an yammisi bɛ teŋ zʋŋ la saŋa, li yʋʋm pii nɛ ayi' la ni, nwadis pii nɛ ayi' la ni, dabisir yinne daar ka Zugsɔb labaar kɛɛn m san'an na ye, 2 Ninsaal biiga, kaasim kʋʋr Faaro onɛ an Egipt na'ab la yɛla ka yɛl o ye,Fʋ nwɛnɛ gbigim nɛ sʋ'ʋlimnam la sʋʋgin;
fʋ nwɛnɛ bandatita'ari bɛ kɔlisin
lugidi giligid kɔldaugin la,
gudigid ku'om la nɛ fʋ nɔba
ka ku'om la wʋsa an bian'ar.
3 Zugsɔb onɛ an Paŋtita'ar Sɔb la yɛl ye,
M ye m nɔknɛ nidib bɛdegʋ,
ka nɔki m zulis la lɔbi gɛɛlif,
ka ba tɛɛgi fʋ dʋ'ʋs na.
4 Man na yisi fʋ lɔb gbɛog
ka dɛligif paalʋ.
M na kɛ ka dunia niimis wʋsa la'as na diif
ka bʋnkɔnbid banɛ bɛ dunia wʋsa kena ɔnbif.
5 M na nɔki fʋ ni'imi yadig tampiing zug
ka kɛ ka fʋ niŋgbina la pɛ'ɛl bɔn'ɔd la.
6 M na kɛ ka fʋ ziim pʋbigi pɛ'ɛl teŋgbauŋ la
hali ti paae zuoya la,
ka fʋ niŋgbina la pɛ'ɛl bɛɛnna la.
7 M ya'a fɛɛnsi fʋ yis, m na pil saŋgbana la
ka kɛ ka nwadbibis la lieb lik.
M na nɔk saŋgbauŋʋ pil winnig
ka nwadig la kʋ lɛn tis o nɛɛsim ya'asɛ.
8 Linɛ wʋsa bɛɛ agɔlli tisid nɛɛsim la
m na kɛ ka li lieb liki fʋ san'an;
m na kɛ ka lik kɛɛn fʋ teŋin la na.
Zugsɔb onɛ an Paŋtita'ar Sɔb la pian'ʋkʋ la.
9 M ya'a tɛɛgi ya tʋbir tɛɛns la sʋʋgin,
ka zii ya keŋ teŋ zʋŋ zin'ikanɛ ka ya nan zi' keŋɛ,
li na pak nidib bɛdegʋ ka kɛ ka ba sʋnf san'am.
10 M ya'a ʋki m zaba sʋ'ʋg la ba tuon
li na kɛ ka nidib bɛdegʋ lidigi fʋ yɛla
ka dabiem na kɛ ka ba na'anam gigilimi fʋ yɛla.
Daakanɛ ka fʋ na lu la
sɔ' wʋsa niŋgbina na dammid saŋa wʋsa
o nyɔvʋr yɛla.
11 Bɔzugɔ Zugsɔb onɛ an Paŋtita'ar Sɔb la yɛl ye,
Babilon na'ab la na kena zab nɛf.
12 M na kɛ ka fʋ nidib bɛdegʋ kpi;
banɛ an dapkpi'ema ka tɔi hali
gat sɔ' wʋsa tɛɛnsin la na zabi kʋʋ ba.
Ba na kɛ ka Egipt nyɛɛsim la wʋsa naae,
ka nyaŋ o nimbanɛ an bɛdegʋ la wʋsa.
13 M na kʋʋ o niigi la wʋsa
banɛ dɛn'ɛd ku'om bɛ zin'isi'a wʋsa.
Nid kʋ lɛn nɔk o nɔbiri gbɛndigi li ya'asɛ
bɛɛ niigi la nɔki ba nɔba gudig ka li kilim bian'arɛ.
14 Ka m yʋ'ʋn na kɛ ka o ku'om la tisig
ka kɛ ka o bɛɛnna la pʋbid wʋʋ kpaam nɛ.
Zugsɔb onɛ an Paŋtita'ar Sɔb la pian'ʋkʋ la.
15 M ya'a kɛ ka Egipt kilim dabɔɔd
ka yis linɛ wʋsa bɛɛ ba teŋ la zug,
m mɛ ya'a ti kʋ onɛ wʋsa bɛɛ ani
ba na baŋ ye manɛ sid an Zugsɔb la.
16 “Kʋʋr kukuma kaŋa ka ba na kum tis o. Tɛɛns la pu'ab na kum Egipt nɛ o nidib bɛdegʋ la yɛla; ba na kumi ba yɛla. Zugsɔb onɛ an Paŋtita'ar Sɔb la pian'ʋkʋ la.”
17 Yʋʋm pii nɛ ayi' la ni, pin'ilʋg nwadig la, li dabpii nɛ anu la daar, Zugsɔb la labaar da kɛɛn m san'an na ye, 18 Ninsaal biiga, kaasim kuŋ Egipt nimbanɛ an bɛdegʋ la yɛla. Sigisimi ba wʋsa teŋin nɛ teŋ titada dim la, ye ba la'as nɛ banɛ bɛ yaʋgʋn la wʋsa. 19 Bu'osimi ba ye, “Ya mɔr vɛnlim gati ya taabaa? Sigimi yaʋgʋn la'as nɛ banɛ zi' Wina'am la. 20 Ba na la'as nɛ banɛ kpi zaba ni la kpi. Sʋ'ʋg la fuoe ya, kɛl ka ba tɛɛg Egipt nɛ o nimbanɛ an bɛdegʋ la wʋsa gaadi keŋ. 21 Yaʋg la pʋʋgin tuongatib banɛ an kpi'emnam la na yɛl Egipt dim nɛ banɛ paasi ba zug la ye, Ba sigim na la'am dig nɛ Wina'am, nɛ banɛ kpi zaba ni la!”
22 Asiria bɛɛ ani nɛ o zabzabidib la wʋsa, banɛ ka ba kʋ la wʋsa yaad la gilig o, nɛ banɛ wʋsa kpi zaba ni la. 23 Ba yaad la bɛ nɛ teŋin sa ka o zabzabidib la digi gilig o yaʋg la. Banɛ wʋsa da kpɛn'ɛsid banɛ vʋe teŋ la ni dabiem la kpiya, ba kʋʋ ba zaba ni.
24 Elam bɛɛ ani nɛ o nimbanɛ an bɛdegʋ la wʋsa, ka ba gilig o yaʋg la. Banɛ wʋsa da kpɛn'ɛsid banɛ vʋe teŋ la ni dabiem la da sig teŋin ka pʋ baŋ Wina'am. Ba di nyan ka kpii la'as nɛ banɛ bɛ yaʋgʋn la. 25 Ba maalnɛ gadʋgʋ digil o ka li bɛ nimbanɛ kpi la teŋsʋk, ka o nimbanɛ an bɛdegʋ la wʋsa digi gilig o yaʋg la, ba wʋsa zi' Wina'am, ka ba kʋʋ ba zaba ni, bɔzugɔ ba daamʋg da tiig teŋ la zug. Ba di nyan ka kpii la'as nɛ banɛ bɛ yaʋgʋn la.
26 “Mesek nɛ Tubal bɛɛ ani nɛ ba nimbanɛ an bɛdegʋ la wʋsa ka ba giligi ba yaad la. Ba wʋsa zi' Wina'am, ka ba kʋʋ ba zaba ni, bɔzugɔ ba da mugusid nidib dunia zug. 27 Ba mɛ dig nɛ zabzabidib banɛ kpi ka zi' Wina'am, ka sig yaʋgʋn nɛ ba zaba la'ad, ka ba nɔki ba zaba la'ad la kʋki ba zut yaʋgʋn la. Ba tʋʋmbɛ'ɛd yɔɔd la bɛɛ ba kɔnba ni, bɔzugɔ ba mugusʋg la da tiig dunia zug.
28 “Na'ab Faaro, fʋ mɛ na kpi keŋ la'as nɛ banɛ zi' Wina'am la, nɛ banɛ kpi zaba ni la.
29 “Edom bɛɛ ani nɛ o na'anam nɛ o tuongatib. La'am nɛ ban da mɔr paŋ la, ba la'asi ba digil yaʋgʋn nɛ banɛ zi' Wina'am ka kpi zaba ni la.
30 “Tuongatib banɛ bɛ ya-datiuŋ la wʋsa nɛ Sidon dim la mɛ bɛɛ ani; ba kpi nɛ nyan, ka ba la'asi ba nɛ banɛ ka ba kʋ la, la'am nɛ ban da mɔri ba paŋ la vɔlisid nidib si'em la. Ba dig nɛ banɛ zi' Wina'am la zaba ni, ka mɛ di nyan nɛ banɛ bɛ yaʋgʋn la.
31 “Na'ab Faaro nɛ o zabzabidib la wʋsa na nyɛɛ ba, ka li bʋgʋl o sʋnf nɛ o nimbanɛ an bɛdegʋ ka ba da kʋʋ ba zaba ni la.” Zugsɔb onɛ an Paŋtita'ar Sɔb la pian'ʋkʋ la. 32 “La'am nɛ man da kɛ ka o kpɛn'ɛs nidib la dabiem la, Faaro nɛ o nidib la wʋsa na la'as nɛ banɛ zi' Wina'am ka kpi zaba ni la.” Zugsɔb onɛ an Paŋtita'ar Sɔb la pian'ʋkʋ la.