Na'aziinr tiig linɛ bɛ Lebanon la yɛla
31
1 Tinamɛ da an yammisi bɛ teŋ zʋŋ la yʋma pii nɛ yinne la ni, nwadis atan' la dabisir yinne la daar ka Zugsɔb la labaar kɛɛn m san'an na ye, 2 Yɛlim Faaro onɛ an Egipt na'ab la nɛ o nimbanɛ zu'oe hali la ye,Anɔ'ɔnɛ na nyaŋi mak o mɛŋ nɛ fʋ na'am pʋʋginɛ?
3 Gɔsim Asiria:
Saŋkanɛ da gaad la, o da nwɛnɛ na'aziinr tiig Lebanon teŋin,
ka mɔr wil vɛnla linɛ ma'asim pil sian'anr la wʋsa
ka wa'am hali,
ka wa'ami gat tiis wʋsa nɛ li vaand la.
4 Ku'om da kɛ ka li nɔbig,
ka ku'okanɛ bɛ teŋin la kɛ ka o wa'am;
kɔlis la da pʋbidnɛ
giligid o gbin,
ka maal ku'osuoya
ka li kennɛ paad tibanɛ bɛ la wʋsa.
5 Linzug li da nɔbigi wa'am hali
gat tibanɛ wʋsa bɛ la.
Li wila da maligim paas bɛdegʋ
ka wa'am hali,
ka tɔɔndi yadigid, ku'om bɛ bɛdegʋ la zug.
6 Niimis banɛ bɛ wʋsa da maal tɛɛd wila la ni,
ka bʋnkɔnbid wʋsa banɛ bɛ teŋ la zug
kena du'a li gbinnin.
Sʋ'ʋlim titada la wʋsa da bɛ nɛ li ma'asim.
7 Li vɛnlim la da ka' tiraana,
nɛ li wila linɛ yaarim-yaarim la,
bɔzugɔ li nya'a la da signɛ teŋin hali
ti paae ku'okanɛ ka' bɛnnɛ.
8 Na'aziinr linɛ bɛ Wina'am lɔmbɔn'ɔgin la
da kʋ nyaŋi mak nɛ li,
bɛɛ tibɛda banɛ bɛ tempʋʋsin la
nyaŋi mak nɛ li wila la.
Tiig da kae Wina'am lɔmbɔn'ɔgin la
mɔr vɛnlim nwɛnɛ li.
9 Manɛ da maali li ka li vɛnl
ka mɔr wila bɛdegʋ.
Tikanɛ wʋsa da bɛ Eden
Wina'am lɔmbɔn'ɔg la pʋʋgin la da bɛn'ɛd o nɛ fufum.
10 Alazug Zugsɔb onɛ an Paŋtita'ar Sɔb la yɛl si'em nwa ye, Lin da wa'am hali ka li vaand wa'ami gat si'el wʋsa ka mɔr nyɛɛsim li wa'alim la zug la, 11 m nɔki li tis tɛɛns la tuongat la, ye o tɛɛgi li tʋbir wʋʋ li bugusim tʋʋma kanɛ ka li tʋm la nar si'em. M yisi li m san'an, 12 ka teŋ zʋŋ sʋ'ʋlim linɛ mɔr pʋtɔɔgʋ gat sɔ' wʋsa la na nwaae lii bas ka li vaand la sʋʋgi lu zuoya zug nɛ bɔn'ɔdin; ka li wila la kɔɔ dig bɔn'ɔfalis banɛ bɛ teŋin la. 13 Niimis banɛ bɛ la wʋsa da ya'an tiliilʋŋ la zug, ka bʋnkɔnbid la wʋsa mɛ da bɛɛ li wila linɛ li la sʋʋgin. 14 Alazug tisi'a kʋ lɛn duoe agɔla nɛ nyɛɛsim kɔlʋg la nɔɔrin, ka wa'ami gat tiis wʋsa nɛ li vaandɛ. Tiig kae na lɛm paam ku'om bɛdegʋ ka duoe wɔkʋʋ. Li zi'eli tisi ba wʋsa ye ba kpii sig teŋin wʋʋ ninsaal nɛ, ka la'as nɛ banɛ bɛ yaʋgʋn la.
15 Zugsɔb onɛ an Paŋtita'ar Sɔb la yɛl si'em nwa ye, Daakanɛ ka tiig la da sig kpi'im teŋ la, ku'otitada linɛ bɛ teŋin la da maal sʋnsa'aŋ, ka m da giŋi li ku'osuoya la, ka li ku'otita'ar la wʋsa kpiɛn. Linzug ka m pil Lebanon nɛ lik, ka tiis banɛ bɛ teŋ la zug la wʋsa kʋdig. 16 Sʋ'ʋlimnam la da wʋm ka o lu ka li dam si'em la, m da kɛ ka ba kiridi li dammir la zug, saŋkan ka m da sigis o yaʋgʋn nɛ banɛ pʋn dɛŋi sig teŋin la. Ka tiis banɛ bɛ Eden la wʋsa nɛ tisʋma nɛ tivɛnla banɛ bɛ Lebanon la wʋsa, tibanɛ da paam ku'om sʋ'ʋŋa ka pʋn dɛŋi sig teŋ la teŋir la na paam sumalisim o liig la zug. 17 Banɛ da bɛɛ o ma'asim nɛ banɛ da la'as o sʋ'ʋlimin la, da dɔl o sig yaʋgʋn la'am nɛ banɛ ka ba kʋʋ ba zaba ni la.
18 “Tiig kae Eden nii na nyaŋi mak nɛ fʋ vɛnlim nɛ fʋ na'am la. La'am nɛ wala fʋn mɛ na la'am lu teŋin nɛ Eden tiis la, fʋ na la'asi digin nɛ banɛ zi' Wina'am la, nɛ banɛ kpi zaba ni la.
“Nɛ'ɛŋa anɛ Na'ab Faaro nɛ o nimbanɛ kalli ka' bɛn la.” Zugsɔb onɛ an Paŋtita'ar Sɔb la pian'ʋkʋ la.