Egipt kʋʋr kaasig yɛla
30
1 Zugsɔb labaar la da kɛɛn m san'an na ye, 2 “Ninsaal biiga,” di'emi m nɔɔr pian'ad ka yɛl ye, Zugsɔb onɛ an Paŋtita'ar Sɔb la yɛl si'eli nwa ye,Kaasim kuŋ ka yɛl ye,
“Kaasimi dabiskan la yɛla!”
3 Bɔzugɔ dabisir la mirnɛ,
Zugsɔb dabisir la li'el ya.
Dabisir la na anɛ zibisʋg dabisir,
saŋa linɛ an yɛla tis sʋ'ʋlimnam la.
4 Zaba na bɛ Egipt teŋgbauŋʋn,
ka yɛla bɛdegʋ na kɛn Kus teŋin na.
Ba ya'a kʋ nidib Egipt teŋin,
ba na zii li arezak la gaad
ka nwa'a li ɛɛnbir la wʋsa bas.
5 “Kus nɛ Put nɛ Lidia nɛ Arabia teŋ la wʋsa, nɛ nimbanɛ bɛ Nɔnaar Teŋin la, ba wʋsa na la'am kpi nɛ Egipt dim la.”
6 Zugsɔb onɛ an Paŋtita'ar Sɔb la yɛt si'eli nwa ye,
“Banɛ ti'e Egipt la wʋsa na kpi
ka ba paŋ nɛ ba nyɛɛsim na ba'as yɔri
lin pin'il Migdɔl n ti paae Ason la
ba na kʋʋ ba digil ani.”
Zugsɔb onɛ an Paŋtita'ar Sɔb la pian'ʋkʋ la.
7 “Ba na kpɛlim zaalim
tɛɛns banɛ kpɛlim zaalim la sʋʋgin,
ka ba tɛɛns la na digi
paas tempʋbanɛ an dabɔɔd la.
8 M ya'a ti nyu'oe Egipt nɛ bugum
ka kʋ banɛ sʋŋid o la wʋsa
ka ba na baŋ ye manɛ an Zugsɔb la.
9 “Daakan la, nidib na yii m san'anɛ anrima keŋ vɔlis Kus nimbanɛ pʋ zɔt si'el la. Egipt san'auŋ daar la dabiem na gban'e ba, bɔzugɔ li anɛ tilas ye li kena.”
10 Zugsɔb onɛ an Paŋtita'ar Sɔb la yɛl si'em nwa ye,
“M na kɛ ka Egipt dim banɛ zu'oe la naae
ka li na yinɛ Babilon na'ab Nebukadnɛza paŋin.
11 On nɛ o zabzabidib banɛ tɔi hali gat dunia dim wʋsa la;
ban ka o ye o mɔri ba na ka ba san'am teŋ la.
Ba na kʋ Egipt dim
ka teŋ la pɛ'ɛl nɛ banɛ ka ba kʋ la.
12 M na kɛ ka Nail kɔlis ku'om la kpiɛn
ka m kuos teŋ la tis nimbɛ'ɛdnam;
m ye m kɛnɛ ka saam kena zab nɛ teŋ la
ka teŋ la nɛ bʋn linɛ bɛɛ li ni wʋsa san'am.”
Man kanɛ an Zugsɔb la pian'.
13 Zugsɔb onɛ an Paŋtita'ar Sɔb la yɛl si'eli nwa ye,
“M na san'am bada la
ka kɛ ka ba'ar kʋ lɛm bɛ Memfis teŋinɛ.
Tuongat mɛ kʋ lɛm bɛ Egipt teŋin ya'asɛ;
m na kɛ ka dabiem giligi paae teŋ la wʋsa.
14 M na kɛ ka Egipt Teŋ Linɛ Bɛ Zugin la kpɛlim zaalim,
ka nyu'oe Zoan tempʋʋg nɛ bugum
ka kɛ ka tɔɔg paae Tebɛs teŋ la.
15 M na kpa'ae m sʋntɔɔgʋ niŋ Pelusium,
Egipt teŋkpi'euŋ la,
ka kɛ ka Tebɛs arezak linɛ zu'oe la naae.
16 M na nyu'oe Egipt nɛ bugum;
Pelusium na nwɛɛlim nɛ tɔɔg.
Ba na zabi nyaŋ Tebɛs tempʋʋg la;
Memfis na paam yɛla saŋa wʋsa.
17 Heliopolis nɛ Bubastis dasam
na kpi zaba ni, ka tɛɛns la wʋsa lieb yammis.
18 M ya'a san'am Egipt dim paŋ la
lik na lu Tapenɛs teŋ la zug nintaŋ;
ani ka paŋ linɛ tisid o nyɛɛsim la na naae.
Saŋgbana na ligil o,
ka o teŋkpɛmis la nidib na lieb yammis.
19 M na kɛ ka tɔɔg paae Egipt,
ka ba na baŋ ye manɛ an Zugsɔb la.”
20 Tinamɛ da an yammisi bɛ teŋ zʋŋ la yʋma pii nɛ yinne la ni nwadkanɛ pin'in la daba ayɔpɔi daar, Zugsɔb la labaar da kɛɛn m san'an na ye, 21 “Ninsaal biiga, m kɔ'ɔg Faaro onɛ an Egipt na'ab la nu'ug. Ba pʋ lɔɔ li ye li tug bɛɛ bɔ si'elnamɛ bɔb ye li paam paŋi nyaŋi zanl sʋ'ʋgɔ.” 22 Alazug Zugsɔb onɛ an Paŋtita'ar Sɔb la yɛl si'eli nwa ye, “M zan'as Faaro onɛ an Egipt na'ab la. M na kɔɔ o nu'us ayi' la wʋsa, linɛ nan pʋ kɔ' la nɛ linɛ pʋn kɔ' sa la wʋsa, ka kɛ ka sʋ'ʋg la naan o nu'ugin la lu teŋin. 23 M na widig Egipt dim la kpɛn'ɛs tɛɛns la wʋsa ni. 24 M na kɛ ka Babilon na'ab la paam paŋ ka m nɔki m sʋ'ʋg la niŋ o nu'ugin, amaa m na kɔ' Faaro nu'us, ka o na ʋʋnsidi o tuon wʋʋ ninsaali na pu'alim nɛ. 25 M na kɛ ka Babilon na'ab paam paŋ, amaa Faaro nu'us na nwɛlig. M na nɔk sʋ'ʋg la niŋ Babilon na'ab la nu'ugin ka o nɔki zab nɛ Egipt. Ka ba na baŋ ye manɛ an Zugsɔb la. 26 M na widig Egipt dimi kpɛn'ɛs tɛɛnsin la wʋsa. Ka ba na baŋ ye manɛ an Zugsɔb la.”