Labaar linɛ zɛrigid Egipt teŋ la
29
1 Tinamɛ da an yammisi bɛ teŋ zʋŋ yʋma piiga la saŋa, li nwadis piiga la dabisa pii nɛ ayi' daar, ka Zugsɔb labaar la kɛɛn m san'an na ye, 2 “Ninsaal biiga, zan'asim Faaro onɛ an Egipt na'ab la, ka di'em m nɔɔr pian'ad linɛ ka m zɛrig o la tis o, on nɛ Egipt teŋ la wʋsa. 3 Pian'am tis o ka yɛl o ye, Zugsɔb onɛ an Paŋtita'ar Sɔb la yɛl ye,“Faaro onɛ an Egipt na'aba, manɛ zan'asif,
fʋn kanɛ an bandatita'ari digi fʋ kɔlisin la.
Fʋ yɛl ye, ‘Nail kɔldaug la anɛ man din;
Manɛ maali li tisim mɛŋ.’
4 Amaa m na nɔk gu'osi gban'e fʋ yiebaŋ la
ka kɛ ka zimbanɛ bɛɛ ani la ga' kpɛlimi fʋ ni.
M na vɛ'ɛgi fʋ yis kɔlʋgin la na,
la'am nɛ zimbanɛ ga'af la wʋsa.
5 M na basif pipirigin la,
fʋn nɛ zimbanɛ yit kɔlʋgin la wʋsa.
Fʋ na lu paalʋ teŋ la zug
ka ba kʋ nɔki fʋ mumm.
M na nɔkif ka fʋ an diibi
tis sian'arin bʋnkɔnbid
nɛ niimis banɛ ian'ad agɔla la.
6 Ani ka banɛ bɛ Egipt teŋin la wʋsa na baŋ ye manɛ an Zugsɔb la.
“Fʋ anɛ balapɔn'ɔsiri tis Israel nidib. 7 Ba da gban'af nɛ ba nu'us ka fʋ kɔ'ɔgi tuoɛn kʋnsi ba biankimpiindi aans; ka ba dɛllimif, ka fʋ kɔ' ka kɛ ka ba sies tɛnrig.”
8 Alazug Zugsɔb onɛ an Paŋtita'ar Sɔb la yɛl si'eli nwa ye, M na kɛ ka ba kena zab nɛf ka kʋʋ fʋ nidib nɛ fʋ bʋnkɔnbid la. 9 Egipt ye li liebnɛ dabɔɔd ka ba baŋ ye manɛ sid an Zugsɔb la.
Fʋ yɛl ye, “Nail la anɛ man din; manɛ maali li.” 10 Alazug m zan'asif ka zan'asi fʋ kɔlis la, ka na kɛ ka Egipt san'am ka lieb dabɔɔdi dig zaalim, lin pin'il Migdɔl n keŋ paae Ason hali ti paae Kus titɔndig bɛn. 11 Ninsaal bɛɛ bʋnkɔnbʋg nɔba kʋ lɛn dɔl ani gaadɛ, sɔ' mɛ kʋ bɛɛ ani hali ti paae yʋma pisnaasi. 12 M na kɛ ka Egipt teŋ la kpɛlim zaalim tembanɛ san'am la sʋʋgin, ka tempʋʋs la kpɛlim zaalim yʋma pisnaasi, tempʋbanɛ nwa' la teŋsʋk. Ka m na widig Egipt dim la sʋ'ʋlimnam la ni ka kpɛn'ɛsi ba tɛɛns la wʋsa ni.
13 La'am nɛ wala Zugsɔb onɛ an Paŋtita'ar Sɔb la yɛl si'em nwa ye, “Yʋma pisnaasi la nya'aŋ m na la'as Egipt dim ban widigi bɛ zin'isi'a la wʋsa. 14 M na mɔri ba yi teŋ zʋŋ la nii lɛb naa zin'il Egipt Teŋin Linɛ bɛ zugin la, ba yaanam teŋin la. Ani ba na an sʋ'ʋlim kanɛ ka' kpi'euŋɔ. 15 Ba na an sʋ'ʋlim kanɛ kʋ mɔr kpi'euŋ baa fiin sʋ'ʋlimnam la wʋsa nii, ka ba kʋ lɛm maligim dʋ'ʋsi ba mɛŋi gaad sʋ'ʋlim banɛ kpɛlim laa. M na kɛ ka ba tadig hali ka kʋ lɛn nyaŋi sʋ'ʋg sʋ'ʋlimnam la. 16 Egipt kʋ lɛn an teŋ kanɛ ka Israel nidib na nɔki ba mɛŋi dɛlla, amaa li na anɛ zin'ikanɛ na tɛɛnsidi ba, ban da tʋm tʋʋmbɛ'ɛd ka fɛndigi lɛb o san'anɛ bɔɔd sʋŋir la. Ka ba na baŋ ye manɛ an Zugsɔb onɛ an Paŋtita'ar Sɔb la.”
17 Yʋma pisi nɛ ayɔpɔi la ni, nwadkanɛ pin'in yiiga la dabisir yinne daar, Zugsɔb labaar la da kɛɛn m san'an na ye, 18 “Ninsaal biiga, Babilon na'ab Nebukadnɛza da nɔk o zabzabidibi keŋ zab nɛ Taya teŋ; ka ba zi la'ad hali ka ba zut kɔn ka ba biankimpiind wʋsa pie ka kɛ kɔnba. La'am nɛ wala on nɛ o nidib la wʋsa pʋ nyɛ nyɔɔd zabkanɛ ka ba keŋ zab nɛ Taya la. 19 Alazug Zugsɔb onɛ an Paŋtita'ar Sɔb la yɛl ye, ‘M ye m kɛnɛ ka Babilon na'ab Nebukadnɛza na sʋ'ʋg Egipt, ka zii ba arezak la wʋsa keŋ. O na fan' ka sʋ'ʋg teŋ la ka li an yɔɔdi tis o zabzabidib la. 20 M na nɔk Egipt n tis o ka li an o yɔɔd on mɔ si'em la zug, bɔzugɔ on nɛ o zabzabidib la tʋmi lii tisim. Zugsɔb onɛ an Paŋtita'ar Sɔb la pian'ʋkʋ la.
21 “ ‘Daakan la m na kɛ ka iil busi tis Israel dim, linɛ pa'an paŋ, ka kɛ ka fʋn Ezikil pian' ka sɔ' wʋsa wʋm. Ka ba na baŋ ye manɛ an Zugsɔb la.’ ”