Labaar kanɛ zɛrigid Taya Na'ab la yɛla
28
1 Zugsɔb la da pian' tisim ye, 2 Ninsaal biiga, yɛlim Taya tuongat la ye, Zugsɔb onɛ an Paŋtita'ar Sɔb la yɛl si'em nwa ye,Nyɛɛsim linɛ bɛɛ fʋ sʋnfʋn la zug
ka fʋ ye, “Mam anɛ win;
m zin'inɛ win na'am kʋk zug
atɛuk la teŋsʋk.”
Amaa fʋ anɛ ninsaal ka ka' win nɛ,
la'am nɛ fʋn tɛn'ɛs ye fʋ mɔri ya'am nwɛnɛ win la.
3 Fʋ ya'am gat Daniel nɛ bɛɛ?
Ka yɛlsu'adir kae na nyaŋi su'a nɛ fɔɔ?
4 Ya'am nɛ yɛla gbin gban'ar kanɛ ka fʋ mɔr la
kɛnɛ ka fʋ paam kpan'am tisi fʋ mɛŋ
ka la'as sanlima nɛ anzurifa
su'a fʋ la'ad dɔɔdin la.
5 Fʋ mi'ilim linɛ ka fʋ mɔri zaŋi ken kpiisʋg zin'igin la
kɛ ka fʋ arezak la nɔbig,
ka fʋ arezak la zug kɛ
ka fʋ yʋ'ʋn lieb nyɛɛsim sɔb.
6 Alazug Zugsɔb onɛ an Paŋtita'ar Sɔb la yɛl si'em nwa ye,
Fʋn tɛn'ɛs ye fʋ mɔri ya'am
wʋʋ winne mɔr ya'am si'em la zug,
7 m ye m kɛnɛ ka saam kena zab nɛf,
sʋ'ʋlim kanɛ nidibi tɔi gat sɔ' wʋsa.
Ba na fuoe ba zaba sʋ'ʋgʋ san'ami fʋ vɛnlim nɛ baŋir la
ka kʋnsi fʋ vɛnlim linɛ nyɛɛn pil-pil la.
8 Fʋ na kpi kum kpi'euŋ
atɛuk ku'om la teŋsʋk,
ka ba na mɔri fʋ sig yaʋgʋn.
9 Fʋ na lɛn yɛl ye, “Man anɛ win,”
nimbanɛ kʋʋf la san'anɛɛ?
Ayei, fʋ na anɛ ninsaal, ka ka' win,
nimbanɛ kʋʋf la tuonnɛ.
10 Fʋ na kpi nwɛnɛ baa nɛ
banɛ an saam la nu'usin.
Man Zugsɔb onɛ an Paŋtita'ar Sɔb la pian'ʋkʋ la.
11 Zugsɔb labaar la da kɛɛn m san'an na ye, 12 “Ninsaal biiga, kaasim kʋʋr Taya na'ab yɛla ka yɛl o ye, Zugsɔb onɛ an Paŋtita'ar Sɔb la yɛl si'em nwa ye,
“Fʋ da anɛ onɛ ka sɔ' ya'a bɔɔd ye o nyaŋi maal si'el
asɛɛ ka o paaf;
fʋnɛ mɛ da gat sɔ' wʋsa nɛ ya'am nɛ vɛnlim.
13 Fʋ da bɛ nɛ Eden linɛ an Wina'am lɔmbɔn'ɔg la ni;
kugvɛnliŋ banɛ da nyɛɛn wʋʋ gɔtiŋ
ka an bʋmpielis nɛ bʋnzɛn'is nɛ bʋnsabilis
ka ba ligidi zu'oe hali la wʋsa,
da paasidi fʋ vɛnlim.
Li wʋsa ba da nɔknɛ sanlima maali li;
daakanɛ ka ba da maalif la ka ba da pʋn la'asi ba digil.
14 Ba da bu'oe malʋŋ kpaam niŋif ka fʋ an Kerub kanɛ gur,
ala ka m gaŋi fʋ zi'el.
Fʋ da bɛ nɛ Wina'am zuor linɛ an kasi la ni
ka ken kugbanɛ nyɛɛn pil-pil la teŋsʋkʋ giligid.
15 Linɛ ka fʋ da maan wʋsa gba'ar da kae;
lin pin'il daakanɛ ka ba da maalif la
ti paae saŋa kanɛ ka ba yʋ'ʋn nyɛt bɛ'ɛdi fʋ san'an la.
16 Fʋ da kpimisi gilig zin'ig wʋsa
ka li da kɛ ka zaba ma'aa pɛ'ɛlif,
ka fʋ tʋm tʋʋmbɛ'ɛd.
Ka m kadi fʋ yis Wina'am zuorin la nɛ nyan,
fʋn Kerub onɛ gur la, ka m da kadi fʋ yis
kugbanɛ nyɛɛn pil-pil la teŋsʋk.
17 Nyɛɛsim ma'aa da pɛ'ɛli fʋ sʋnf
fʋ vɛnlim la yɛla.
Ala ka m lɔbi fʋ bas teŋin
ka li pa'al na'anam la ya'am.
18 Fʋ tʋʋmbɛ'ɛd nɛ fʋ zam kpikpiŋ la
kɛ ka fʋ san'ami fʋ winpʋ'ʋsʋm dɔɔd la,
lin ka m kɛ ka bugum yii fʋ mɛŋ san'an naa kanbif,
ka m sief hali ka fʋ ti lieb wʋʋ tampɛligim dig teŋin
nimbanɛ da gɔtif la wʋsa nini ni.
19 Tembanɛ wʋsa da mi'if la maannif nɛ siaa.
Fʋ ye fʋ ba'asnɛ yɔri
ka kʋ lɛm bɛ baa bi'elaa.”
Sidon labaar linɛ zɛrigid o la yɛla
20 Zugsɔb labaar la da kɛɛn m san'an na ye, 21 “Ninsaal biiga, zan'asim Sidon dim la, ka di'em m nɔɔr pian'ad linɛ ka m zɛrigi ba la tisi ba 22 ka yɛl ye, Zugsɔb onɛ an Paŋtita'ar Sɔb la yɛl si'eli nwa ye,
“Sidon, m na zab nɛf ka paam yʋ'ʋri li ni.
M ya'a kɛ ka tɔɔg luu fʋ zugin
ka pa'alim mɛŋi fʋ san'an ye m anɛ kasi
li na kɛ ka ba baŋ ye manɛ an Zugsɔb la.
23 M na tʋm ban'asi fʋ san'an
ka kɛ ka ziim pʋbigi fʋ pala la zug.
Banɛ ka ba kʋ la na digi fʋ teŋsʋk,
ba na yi zin'is wʋsa kena giligif.
Ala ka ba na baŋ ye manɛ an Zugsɔb la.”
24 “Israel nidib la kʋ lɛm mɔr kpi'es banɛ an nimbɛ'ɛdnam banɛ tɔi wʋʋ gɛnda banɛ mɔr gɔn'ɔs, nɛ gɔn'ɔs banɛ pʋlim hali ka kunsid la. Ani ka ba na baŋ ye manɛ an Zugsɔb onɛ an Paŋtita'ar Sɔb la.”
25 Zugsɔb onɛ an Paŋtita'ar Sɔb la yɛl si'em nwa ye, “M ya'a la'as Israel nidib la yi sʋ'ʋlim banɛ wʋsa ni ka ba da widigi bɛ la, m na pa'alim mɛŋ ye m anɛ kasi ba san'an sʋ'ʋlim wʋsa nini ni. Ka ba na bɛɛ ba mɛŋ teŋin, zin'ikanɛ ka m da nɔki tisim tʋmtʋm Jakob la. 26 Ba na bɛɛ ani nɛ laafi ka mɛɛ ba mɛŋ ya', ka sɛ tiwanna ba pɔɔdin; m ya'a kɛ ka tɔɔg paae ba kpi'es banɛ da namisidi ba la ba na bɛ nɛ laafi. Ka ba na baŋ ye manɛ an Zugsɔb onɛ aan ba Wina'am la.”