Sʋnsa'aŋ yʋʋma Taya yɛla
27
1 Zugsɔb labaar da kɛɛn m san'an na ye, 2 Ninsaal biiga, yʋ'ʋmim kʋʋr yʋʋma Taya yɛla. 3 Yɛlim Taya linɛ bɛ suor nɔɔrin ka ba dɔlli ken atɛukʋn la, ka yɛl kpikpinkpinnib bɛdegʋ banɛ bɛ atɛuk nɔɔrin la ye, Zugsɔb onɛ an Paŋtita'ar Sɔb la yɛl si'em nwa ye,Taya teŋa, fʋ yɛt ye,
“Man vɛnlim la tiraan kae.”
4 Fʋ sʋ'ʋlim da bɛ nɛ atɛuk teŋsʋk;
banɛ da mɛɛf la da kɛ ka fʋ vɛnlim la aan amɛŋa.
5 Fʋ nwɛnɛ anrintita'ar nɛ.
Ba da bɔ dasʋma maalif,
daad banɛ bɛ Hemon zuorin la;
ba da nɔk na'aziinr daadi yi Lebanon teŋin na
ye ba maal tuuta dawɔkʋ tisif.
6 Ka lɛn nɔk tikpi'ema daad Basan teŋin tisif
ka fʋ maal anrʋŋ dabanɛ ka ba mɔri gaad ku'omin la;
ka nɔk dakpi'ema linɛ yi Saipuros teŋin linɛ bɛɛ atɛuk sʋʋgin la na
maali fʋ teŋir la ka zaŋ wabʋg nyina niŋi li zug.
7 Pien sʋŋ ka ba da' yi Egipt na
sɛɛn li ya'al anrʋŋ dawɔk la zug
ka sisi'em da'adi li ka anrʋŋ la ken,
ka lin lɛn aan fʋ tuuta.
Fʋ fuud linɛ ligin nintaŋ nɛ saa la anɛ bʋlʋ nɛ pipɛl-zɛn'ug
ka li yinɛ Elisea teŋ kanɛ bɛɛ atɛuk nɔɔrin la.
8 Sidon nɛ Arivad tɛɛns dap la an banɛ dɔribidi fʋ anrʋŋ la.
Taya, fʋ dap banɛ mi' tʋʋma kɔn'ɔb-kɔn'ɔb la
da bɛ anrʋŋ la pʋʋgin.
9 Banɛ da mi' kpi'eb sʋ'ʋŋa da bɛ anrʋŋ la pʋʋgin
ka an banɛ bi'ed anrʋŋ la ka ku'om pʋ kpɛn'ɛda;
ba da anɛ ninkʋda banɛ yi Gebal teŋin na.
Anrimbanɛ bɛɛ atɛuk pʋʋgin la wʋsa, nɛ banɛ mɔri ba ken la,
da kena ye ba kpiis nɛ fʋ nidib la nɛ la'abanɛ ka ba mɔr la.
10 Dap banɛ yi Pesia nɛ Lidia nɛ Put la
da bɛɛ fʋ zabzabidib la sʋʋgin.
Ba nɔk gbanti'edis la nɛ kʋnt zupibis la ya'ali fʋ zaŋguoma la zug,
ka fan' la'ad bɛdegʋ mɔri kena tisif.
11 Arivad nɛ Helek zabzabidib la'asi
giligi fʋ zaŋguoma la zin'ig wʋsa.
Gammad dap
da dʋ yanamɛ dʋt si'eli gu'ud teŋ la.
Ba da nɔk gbanti'edis la ya'ali gilig zaŋguoma la;
ka kɛ ka fʋ vɛnlim la nie paalʋ.
12 Tarsis teŋ da kpiisid nɛf, ka li anɛ fʋn da mɔr la'ad bɛdegʋ la yɛla; ba da mɔr anzurifa nɛ kʋntnam buudi wʋsa n kpiisid nɛ fʋ kpikpinkpinnib la.
13 Fʋn nɛ Girik nɛ Tubal nɛ Mesek tɛɛns la da da'ad taaba la'ad; ba nɔkid yammis nɛ kʋntzɛn'ug la'adi tiakidi fʋ la'ad la.
14 Bet Togama dap da mɔr widi banɛ tʋm tʋʋma, nɛ zaba widi, nɛ wiedbʋmisi kpiisid nɛ fʋ nidib la.
15 Roda dim da kpiisid nɛf, ka tɛɛns bɛdegʋ banɛ bɛɛ atɛuk nɔɔrin la nidib aan ya da'adis, ba da mɔri wabʋg nyina nɛ dasabila banɛ kpi'em.
16 Aram dim da kenna kpiisid ka li anɛ yanamɛ mɔr la'ad bɛdegʋ la yɛla; ban da nɔkidnɛ kugsʋma nɛ pien vɛnla nɛ la'abanɛ ligidi zu'oe buudi wʋsa tisi fʋ kpikpinkpinnib la.
17 Juda nɛ Israel n da kpiisid nɛf la; ba da nɔk ki linɛ yit Minnif teŋin nɛ disʋma nɛ siind nɛ kpaam nɛ kpasɔɔndim tiakid nɛ la'abanɛ ka fʋ mɔr la.
18 Fʋn mɔr la'ad nɛ arezak bɛdegʋ la zug ka Damaskus dim kpiisid nɛ fʋ ziid daam yit Helbon teŋin na ka ziid pɛ'ɛs kɔnbidi yit Zaha teŋin na.
19 Dan dim nɛ Girik dim banɛ yi Uzal na la da' ya kpikpinkpinnib la nɛ, ka nɔkid kʋnt nɛ kasiya nɛ kikan'asiindi tiakid nɛ ya la'ad la.
20 Dedan dim da kpiisid nɛ ya nɛ pien banɛ ka ba mɔri pa'an wief zug ka ban'ad la.
21 Arabia nɛ Kedar tuongatib la wʋsa da anɛ fʋ da'adis; ba da mɔri pɛbibis nɛ pɛraad nɛ bʋʋsi kuosid.
22 Seeba nɛ Raama da'abiis da kpiisid nɛ ya, ba da mɔri zɛɛnd nɛ li buudi wʋsa nɛ kugvɛnla nɛ sanlima ti'ad nɛ ya.
23 Haran nɛ Kannɛ nɛ Eden nɛ Seeba kpikpinkpinnib nɛ Asuor nɛ Kilimad dim da tɔlim nɛ fʋ. 24 Fʋ da' la ni ba mɔr fusʋma nɛ pien linɛ an bʋlʋ nɛ fuud linɛ ka ba ʋg sʋ'ʋŋa kuoɛn li nɔɔr la nɛ futusa linɛ pɔnri vɛnl la kenna kuosid.
25 Anrima banɛ yi Tarsis la tʋʋm
anɛ ba ziidi fʋ la'ad la.
Fʋ ziidi la'atɛbisa bɛdegʋ
atɛuk la teŋsʋk.
26 Banɛ mi' anrʋŋ gaab la da nɔki fʋ
keŋ atɛuk teŋsʋk.
Amaa ka ya-nya'aŋ sisi'em kena aansif zɔra-zɔra ani.
27 Fʋ kpan'am nɛ kuosim nɛ la'ad,
nɛ banɛ gaad atɛuk
nɛ banɛ tʋm ani nɛ banɛ maan anrima,
nɛ fʋ da'abiis nɛ zabzabidib,
nɛ banɛ wʋsa bɛ anrʋŋ la zug la
na sim atɛuk la pʋʋgin
daakanɛ ka anrʋŋ la ye li aansi aans ku'om la zug la.
28 Atɛuk la nɔɔrin teŋgbauŋ na dam
ka fʋ nimbanɛ tʋmm atɛukʋn la kaas kuŋ.
29 Banɛ gaad anrima la wʋsa
na basi ba anrima la;
banɛ maan anrima nɛ banɛ tʋm atɛukʋn la
na zi'en atɛuk la nɔɔrin.
30 Ba na dʋ'ʋsi ba kʋkɔya agɔla
kaas nɛ sʋnsa'aŋi fʋ yɛla.
Ba na bugi ba zut nɛ titan sʋnsa'aŋ zug
ka bilim tampɛligimin.
31 Ba na pʋni ba zuti fʋ yɛla
ka na yɛ bɔtkɛnda.
Ba na kummi fʋ yɛla nɛ sʋnsa'aŋ tita'ar hali
ka maal sʋnsa'aŋ bɛdegʋ.
32 Ka ban kaasid kuŋ ka fabinnɛ fʋ yɛla la,
ba na kaasid kʋʋr kaasʋgʋ fʋ yɛla ye,
“Anɔ'ɔnɛ da an wʋʋ Taya,
onɛ ka atɛuk ku'om giligɛ?
Amaa nannanna li fɔnnɛ baanlimm.”
33 Fʋ da'abiis la da yii atɛukʋn la,
fʋ da kɛ ka sʋ'ʋlim wʋsa nyɛ on bɔɔd si'el;
nɛ fʋ arezak tita'ar nɛ fʋ la'ad la
kɛ ka dunia na'anam kilim bʋndaannam.
34 Nannanna atɛuk la aansif zɔra-zɔra;
fʋ tʋmtʋmnib la nɛ fʋ la'ad la wʋsa
la'as nɛ fʋ sim ku'ozulʋŋ la pʋʋgin.
35 “Banɛ bɛɛ atɛuk nɔɔrin la wʋsa
gigilimnɛ gɔsidif.
Dabiem gban'e ba na'anam la nɛ, ka ba sʋnf san'am
ka dabiem kɛ ka ba nindaa wʋsa san'am.
36 Da'abiis banɛ bɛ teŋin la maannif nɛ siaa
ye fʋ ba'asnɛ yɔri
ka kʋ lɛm bɛ baa bi'elaa.”