Labaar linɛ zɛrigid Taya la yɛla
26
1 Tinamɛ da an yammisi bɛ teŋ zʋŋ la yʋʋm pii nɛ yinne saŋa, nwadig la pin'ilʋg daar, ka Zugsɔb labaar la kɛɛn m san'an na ye, 2 “Ninsaal biiga, Taya la'ad Jerusalem ye, ‘Hahaa! Yaŋir kanɛ ka ba dɔlli kpɛn'ɛd sʋ'ʋlimnamin la kɔ' ya, ka li kʋlis gbɛlli kpa' mam. Nannanna on yʋ'ʋn dig si'em wʋʋ dabɔɔd la, m na paam kpan'am.’ 3 Alazugɔ Zugsɔb onɛ an Paŋtita'ar Sɔb la yɛl si'em nwa ye, ‘Taya, fʋ anɛ m dataa, ka m na kɛ ka sʋ'ʋlim bɛdegʋ la'asi kena giligif wʋʋ atɛukʋ duosidi li ku'opila si'em la. 4 Ba na nwa'ae Taya zaŋguoma ka da'ae zin'ibanɛ ka ba dʋti gur teŋ la bas; m na kɔɔns titan la wʋsa ka kɛ tampinzaal. 5 Atɛuk la pʋʋgin o na an zin'ikanɛ ka ba na dɛligid zulis’ Man Zugsɔb onɛ an Paŋtita'ar Sɔb la pian'ʋkʋ la. Sʋ'ʋlimnam la na kenna faand o la'ad, 6 ka ba na zabi kʋʋ o nimbanɛ bɛɛ o teŋkpɛmis linɛ bɛ atɛuk nɔɔrin la. Ka ba na baŋ ye manɛ an Zugsɔb la.”7 Zugsɔb onɛ an Paŋtita'ar Sɔb la yɛl si'em nwa ye, “Man na kɛ ka sɔ' yi ya-datiuŋ baba na ka o na zab nɛ Taya; on sɔb anɛ Nebukadnɛza, onɛ an Babilon na'ab nɛ na'anam na'ab la, o na mɔr o widi nɛ zaba tɛrekonam nɛ wiedban'adib nɛ zabzabidib bɛdegʋ kena. 8 O na kʋ banɛ wʋsa zin' teŋ la gʋʋr la. O na maali gu' gilig teŋ la, ka digil tanni maal zaba dʋʋsa ka li dʋ hali ti paae zaŋguoma la bɛn, ka nɔk o gbanti'edis la gu' gilig ka zab nɛf. 9 O na kɛ ka ba nɔk gulungun'udi nwɛ' fʋ zaŋguoma la, ka nɔk o zaba la'adi nwa'a zin'ibanɛ ka ba dʋt ani gu'ud teŋ la. 10 O widi la na zu'oe galis ka ba uusʋg ma'aa ligilif. Zaba widi la dammir ma'aa na kɛ ka zaŋguoma la mi'im. O la'ad tɛrekonam nɛ zaba tɛrekonam na dɔlli kpɛn' teŋ la pʋʋg wʋʋ nidibi na dɔlli kpɛn' teŋ kanɛ ka li zaŋguoma lu si'em la. 11 O widi la na gilig teŋ la suoya la wʋsa, o na kʋʋ fʋ nidib la wʋsa, ka fʋ zaŋguom kpi'ema la lu teŋin. 12 O na faaɛn fʋ areza'as ka zuu fʋ kpikpinkpinnib la la'ad; ba na da'ae ya zaŋguoma la bas ka nwa'ae ya ya' vɛnla la, ka lɔb kuga la nɛ daad nɛ tan la wʋsa bas atɛukʋn. 13 M na kɛ ka yʋʋm kanɛ ka ya yʋ'ʋmmi maan tʋkpiidʋg la gu'oe, ka sɔ' kʋ lɛn wʋmi ya bʋnnwɛ'ɛda la yʋʋma ya'asɛ. 14 M na kɛ ka fʋ lieb tampiing kanɛ dig paalʋ, ka an zin'ig kanɛ ka ba dɛligid zulis. Ba kʋ lɛm maligim mɛɛf ya'asɛ, bɔzugɔ man kanɛ an Zugsɔb la pian'.” Zugsɔb onɛ an Paŋtita'ar Sɔb la pian'ʋkʋ la.
15 Zugsɔb onɛ an Paŋtita'ar Sɔb la yɛl si'em nwa zaŋi keŋ Taya yɛla: “Ba ya'a ti zabi nyaŋif ka nimbanɛ bɛ ku'om nɔɔrin la wʋm ka banɛ pu'alim la ʋʋnsid, dabiem na kpɛn' ba fʋ luug la yɛla. 16 Ani ka tɛɛns banɛ bɛ atɛuk nɔɔrin la na'anam wʋsa na sigi ba na'am gbana zug ka yidigi ba sialɔɔdis ka yɛɛsi ba na'am fuudi digil kpikpɛŋ. Dabiem ya'a kpɛn' ba, ba na zin'in teŋin kirid saŋa wʋsa, ka gigilim gɔsidif. 17 Ba na yʋ'ʋm kʋʋr yʋʋma fʋ yɛla yɛtif ye,
“Gɔsim ban san'amif si'em,
tempʋkanɛ da ka' tiraana,
ka nidib keŋ zin'in ani kpi'en atɛuk nɔɔrin la!
Fʋn nɛ fʋ nidib la da mɔr paŋ atɛukʋn la,
fʋ da kpɛn'ɛsid banɛ wʋsa da bɛ ani la dabiem.”
18 Nannanna tembanɛ bɛ atɛuk nɔɔrin la kiridnɛ
lin pin'il daakanɛ ka fʋ lu la;
tembanɛ bɛ atɛuk teŋsʋk la
dabiem gban'e ba nɛ fʋn lu nyain si'em la.
19 Zugsɔb onɛ an Paŋtita'ar Sɔb la zɛrig Taya ka yɛl o si'em nwa ye, “M na kɛ ka fʋ tempʋʋg la kpɛlim dabɔɔd, ka li nwɛnɛ tempʋʋgʋ nan bɛɛ ani, ka m lɛn kɛ ka atɛuk ku'om kena pilif. 20 Saŋkan la ka m na sigisi fʋ paas banɛ kpi ka bɛ kpi'im teŋ la, ka kɛ ka fʋ paae nimbanɛ da gaad kʋdim-kʋdim sa la. M na kɛ ka fʋ sig teŋ la teŋir, nwɛnɛ kʋdimin dabɔɔd la bɛ teŋin si'em la, paas nɛ banɛ bɛ yaʋgʋn la, ka fʋ kʋ lɛn lɛb na bɛɛ nyaŋi zin'in nɛ banɛ vʋe dunia la. 21 M na kɛ ka fʋ naar an bɛ'ɛd bɛ'ɛdi ka fʋ kʋ lɛn vʋe ya'asɛ. Ba na ieef amaa ba kʋ maligim nyɛɛf ya'asɛ.” Zugsɔb onɛ an Paŋtita'ar Sɔb la pian'ʋkʋ la.