Zugsɔb labaar linɛ zɛrigid Ammon dim
25
1 Zugsɔb labaar da kɛɛn m san'an na ye, 2 “Ninsaal biiga, zaŋimi fʋ nini kpa Ammon dim baba ka di'e m nɔɔr pian'adi zɛrigi ba. 3 Yɛlimi ba ye, ‘Wʋmmi Zugsɔb onɛ an Paŋtita'ar Sɔb la labaar. Zugsɔb onɛ an Paŋtita'ar Sɔb la yɛl si'em nwa ye: Ban da san'ami m Yir la ka gban'e Juda nidib la keŋ teŋ zʋŋ ka Israel teŋ la kpɛlim dabɔɔd ka ya maan sumpielim la zug, 4 m na kɛ ka nimbanɛ bɛ ya-nya'aŋ la kena gban'e ya, ba na la'asi ya teŋ la pʋʋgin ka ti' ba sʋga kpɛlim ani; ba na dii ya tiis la wala ka nuu ya bin'isim la. 5 M na kɛ ka Rabba teŋ lieb zin'ikanɛ ka yʋgʋma na ɔnbid yaama ka Ammon lieb zin'ikanɛ ka kɔnbid na digi vʋ'ʋsid. Ka ya na baŋ ye manɛ an Zugsɔb la.’ ” 6 Bɔzugɔ Zugsɔb onɛ an Paŋtita'ar Sɔb la yɛl si'em nwa ye, “Yanamɛ nwɛ' nu'us ka kimis nɔba ka maan sumalisim nɛ bɛ'ɛd linɛ ka ya gban'e ya sʋnfʋn Israel teŋgbauŋ yɛla la. 7 Dinzug m na basi ya, ka sʋ'ʋlimnam la faaɛn ya. M na yisi ya nyain tɛɛns la ni, ka san'ami ya, ka ya baŋ ye manɛ sid an Zugsɔb la.”Zɛrigir linɛ ken Moab dim san'an
8 Zugsɔb onɛ an Paŋtita'ar Sɔb la yɛl si'eli nwa ye, “Moab nɛ Seir dimi sadigim yɛl ye, ‘Gɔsimi Juda yʋ'ʋn nwɛnɛ sʋ'ʋlim banɛ kpɛlim la wʋsa,’ 9 alazug m na bas suori tis dataas ka ba kpɛn' Moab teŋ titɔndigin la, lin yii li tempʋʋs la tuon Bet-Jesimof nɛ Baal Meon nɛ Kiriafaim linɛ an teŋ la girima zin'ig la. 10 M na nɔk Moab nɛ Ammon dim la tis ya-nya'aŋ dim, ka ba nyaŋ nidib la ka sʋ'ʋgi ba, ka li kɛ ka sʋ'ʋlimnam la kʋ lɛn tiɛn Ammon yɛla ya'asɛ; 11 ka m kɛ ka tɔɔg lu Moab dim zug. Ka ba na baŋ ye manɛ an Zugsɔb la.”
Labaar linɛ zɛrigid Edom dim la
12 Zugsɔb onɛ an Paŋtita'ar Sɔb la yɛl si'em nwa ye, “Edom dim daa yɔ Juda dim sam ka li kɛ ka ba lieb tʋʋmbɛ'ɛd dim ban niŋ ala la zug. 13 Alazug Zugsɔb onɛ an Paŋtita'ar Sɔb la yɛl si'em nwa ye, ‘M na namis Edom dim ka kʋʋ ba nidib nɛ ba bʋnkɔnbid. M na kɛ ka li kpɛlim zaalim, ka kʋ nidib la lin yi Teman teŋin hali ti paae Dedan teŋin. 14 M na kɛ ka Israel dim yɔ Edom dim samme tisim, ka ba na tʋm Edom dim nyɔnbid wʋʋ m sʋnf duor nɛ m tʋbtɛɛgiri an si'em la; ba na baŋi m sam yɔɔbi an si'em.’ Zugsɔb onɛ an Paŋtita'ar Sɔb la pian'ʋkʋ la.”
Labaar linɛ zɛrigid Filistia dim la
15 Zugsɔb onɛ an Paŋtita'ar Sɔb la yɛl si'em nwa ye, “Filistia dim la yɔ sam, ka niŋ linɛ dɔl gban'abɛ'ɛd linɛ bɛɛ ba sʋnfʋn nɛ kʋdimin sa dataadʋg linɛ ka ba ye ba dɔlisi san'am Juda la zug. 16 Zugsɔb onɛ an Paŋtita'ar Sɔb la yɛl si'em nwa ye, ‘M na zab nɛ Filistia dim la, ka yis Keret dim la nyain ka san'am banɛ kpɛlim atɛuk nɔɔrin la. 17 M na yɔɔ ba sam bɛdegʋ ka tɛɛgi ba tʋbiri m sʋnf duor la pʋʋgin. M ya'a kɛ ka tɔɔg luu ba zugin na ala ka ba na baŋ ye manɛ an Zugsɔb la.’ ”