Dʋk la yɛla
24
1 Tinamɛ da an yammisi bɛ teŋ zʋŋ la yʋma awai saŋa li nwadis piiga la ni, dabpiiga daar ka Zugsɔb labaar kɛɛn m san'an na ye, 2 “Ninsaal biiga,” sɔm dabiskaŋa digil, dabiskaŋa nɔɔ, bɔzugɔ dabiskaŋa daar ka Babilon na'ab nɛ o nidib la kena diginɛ gu' gilig teŋ la. 3 Yɛlim nimbanɛ ki'isid la siiliŋ kaŋa ye, Zugsɔb onɛ an Paŋtita'ar Sɔb la yɛl ye,“Nɔkim dʋk la sʋn'ʋl bugum zug
ka gbin'e ku'om niŋi li pʋʋgin.
4 Gaansim ni'im sʋma
banɛ an gbɛya nɛ ban'ad la wʋsa;
la'asimi lii niŋ dʋkʋn la.
Pɛ'ɛlimi li nɛ kɔnba linɛ an sʋm;
5 gaansim kɔnbsʋma la ni'im.
Kpan'alim dʋk la gbin nɛ daad
ka niŋ bugum ka li lɛ'ɛg
ka dʋg kɔnba banɛ bɛɛ ani la.”
6 Bɔzugɔ Zugsɔb onɛ an Paŋtita'ar Sɔb la yɛl si'em nwa ye,
“Tɔɔg bɛ tempʋkanɛ kʋʋd nidib la zug,
li nwɛnɛ dʋk kanɛ kanb,
ka linɛ kanbi si' la kʋ yii!
Yaasimi li yinne-yinne
hali ka yinne da kpɛlim.
7 Ziim kanɛ ka o yis la bɛɛ o san'an;
o kpa'ae li nɛ pa'al tampiing zug;
o pʋ kpa'ae li bas teŋ
zin'ikanɛ ka tan na nyaŋi pin' lii.
8 Man kpa' o ziim la nɛ pa'al tampiing zug,
linɛ na kɛ ka li kʋ pin',
ye li kɛ ka sʋnpɛɛn nɛ sam yɔɔb bɛ.”
9 Alazug Zugsɔb onɛ an kasi la yɛl si'em nwa ye,
“Yɛl bɛ tempʋkanɛ kʋʋd nidib la zug!
Man mɛ na la'as daad la kʋgis bɛdegʋ.
10 Dinzug la'asim daad la digil
ka niŋ bugum ka li la'aŋ.
Dʋgim ni'im la sʋ'ʋŋa,
ka gɛndig zɛɛndnam la;
ka kɛ ka kɔnba la bi'igi kanb.
11 Ka yʋ'ʋn kpa'ae li wʋsa bas
ka lɛn nɔk dʋk la sʋn'ʋl bugumsaana la zug
hali ka li ti tʋligi mu'oe nyɛɛn,
ka li kɛ ka dian'ad la wʋsa nyɛlig
ka linɛ si' la wʋsa kanbi yi.
12 Li kɛ ka fʋ mɔɔr wʋsa lieb zaalim;
linɛ kanb la wʋsa pʋ nyaŋi yii,
hali bugum gba pʋ nyaŋi yisi lii.
13 “Linɛ kɛ ka ya dian'a la anɛ ya tʋʋmkisa la. M mɔ ye m maali ya kasi amaa ya pʋ siak ye ya yii ya dian'ad la ni ka lieb kasii, alazug ka ya mɛ kʋ lɛm maligim an kasi ya'asɛ, asɛɛ ka tɔɔg kanɛ bɛɛ ya zugin la ti yɔlis.”
14 Man kanɛ an Zugsɔb la pian'. Saŋa paae ya ye m tʋm. M kʋ zan'as tʋʋmaa; m kʋ zɔ nimbaanlig, bɛɛ lɛb nya'aŋa. Ya na paam sariakadib ka li dɔlli ya bɛllim nɛ ya tʋʋma. Zugsɔb onɛ an Paŋtita'ar Sɔb la pian'ʋkʋ la.
Ezikil pu'a kpi la yɛla
15 Zugsɔb labaar la da kɛɛn m san'an na ye, 16 “Ninsaal biiga, m ti'ebidnɛ ye m nɔk onɛ ka fʋ sʋnf nɔŋ ka fʋ ya'am kpɛn' o hali la. La'am nɛ wala da fabil bɛɛ kum bɛɛ kɛ ka ninta'am yii fʋ nini nii. 17 Fabilim baanlimm; da kum onɛ kpi la yɛllɛ. Da basi fʋ zug zaalim bɛɛ keŋ nɔbteŋa; da ligili fʋ nindaa, bɛɛ di malʋŋ dikanɛ ka onɛ ɛɛn paam kʋʋr dit la.”
18 Dinzug m da pian' tis nidib la bɛogʋn, ka zaam ka m pu'a kpi. Bɛogʋ da nie la m da maal wʋʋ on da pʋn yɛlim ye m niŋ si'em la.
19 Ka nidib la bu'osim ye, “Fʋ kʋ kɛ ka ti baŋ linɛ zugʋ kɛ ka fʋ maan na anwaa?”
20 Ka m yɛli ba ye, Zugsɔb la labaar sa kɛɛn m san'an na ye, 21 Yɛlim Israel dim la ye, Zugsɔb onɛ an Paŋtita'ar Sɔb la yɛl si'em nwa: “M gban'anɛ ye m san'ami m Pʋ'ʋsim Yir kpi'euŋ zin'ikanɛ ka ya mɔr nyɛɛsim li yɛla, ka ya nini tig ka ya ya'am nɔŋ hali la. Ya biribis nɛ ya bipumis banɛ ka ya bas nya'aŋ la, ba na kʋʋ ba wʋsa. 22 Ka ya na niŋ wʋʋ man niŋ si'em la. Ya kʋ ligili ya nindaa bɛɛ di dikanɛ ka banɛ ɛɛn paam kʋʋr dit la. 23 Ya kʋ basi ya zug zaalim bɛɛ keŋ nɔbteŋa. Ya kʋ fabil bɛɛ kumm, amaa ya na tadigi ya tʋʋmbɛ'ɛd la zug ka fabinnɛ tisid taaba. 24 Ezikil na an zanbinnɛ tisi ya; ya na niŋ wʋʋ on niŋ si'em la nɔɔ. Nɛ'ɛŋa ya'a sid niŋ, ya na baŋ ye manɛ an Zugsɔb onɛ an Paŋtita'ar Sɔb la.”
25 Ka fʋn, Ninsaal biiga, daakanɛ ka m ye m san'ami ba kpi'euŋ zin'ig la, ba sumalisim nɛ ba girima, linɛ ka ba nini kpɛn' la, linɛ ka ba ya'am bɔɔd la, ba biribis nɛ bipumis wʋsa mɛ na san'am. 26 Daakan la, onɛ nyaŋi zɔɔ pɔns la na kena tisif labaar la. 27 Saŋkan la fʋ zilim na lak; ka fʋn nɛ on na sɔns ka fʋ kʋ lɛn an gika. Dinzug fʋ na an zanbinnɛ tisi ba, ka ba na baŋ ye manɛ an Zugsɔb la.