Pu'a nɛ o pitʋ banɛ an pu'agɔɔnda la yɛla
23
1 Zugsɔb labaar la da kɛɛn m san'an na ye, 2 “Ninsaal biiga,” pu'aba ayi' da bɛ, ka an pu'a yinne biis. 3 Ba da liebnɛ pu'agɔɔnda Egipt teŋin, ka tʋm pu'agɔɔndir tʋʋma ba biilimin sa. Teŋ kan la ni ka dap da tɛn'ɛbid pu'asada nwa bin'isa. 4 Kpɛɛm la yʋ'ʋri da buon Ohola ka pit la yʋ'ʋr buon Oholiba. Manɛ da sʋ'oe ba ka ba du'a biribis nɛ bipumis. Ohola zi'enɛ Samaria yɛla ka Oholiba mɛ zi'e Jerusalem yɛla.5 Ohola da nan kpɛn an man din la o da pin'il o pu'agɔɔnd tʋʋma la, ka mɔr kʋkɔma'asim nɛ banɛ li'ad o la. Ba da anɛ Asiria teŋ zabzabidib 6 ka yɛ soogianam fuvɛnla, ka an gɔmenanam nɛ zaba tuongatib. Ba wʋsa da anɛ dasam banɛ vɛnl, ka ban'ad widi. 7 O da nɔk o mɛŋi tis Asiria ninsʋma la wʋsa wʋʋ pu'agɔɔndir nɛ, ka san'am o mɛŋ nɛ ba'abanɛ wʋsa ka o ya'am kpɛn'. 8 O da pʋ bas pu'agɔɔnd tʋʋma linɛ ka o pin'il Egipt teŋin o pu'asatim saŋa ka dap da gbɛɛnd nɛ o la, ba da niŋid o wʋʋ o anɛ pu'agɔɔndir ka dig nɛ o.
9 Alazug ka m bas o tis banɛ li'ad o la, banɛ an Asiria dim la, bɔzugɔ ban ka o ya'amlɛog kpɛn' hali. 10 Ba da yɛɛs o ka kɛɛ o biel, ka gban'e o biribis nɛ o bipumis la mɔri keŋ, ka nɔk sʋ'ʋgʋ kʋʋ o. Pu'ab da mɔr o siilim ka li an yɛlpakir, ka namisʋg bɛdegʋ paae o.
11 O pitʋ Oholiba da nyɛ nɛ'ɛŋa wʋsa, amaa la'am nɛ wala o kʋkɔma'asim nɛ o dapbɔɔsim tʋʋma la da san'am o gaad o bier la. 12 O ya'am wʋsa mɛ da kpɛn' Asiria gɔmenanam nɛ zaba tuongatib, nɛ zabzabidib banɛ yɛ zaba la'ad, nɛ banɛ ban'ad zaba widi, nɛ dasam vɛnla la wʋsa. 13 M da nyɛ ka on mɛ san'am o mɛŋ: babayi' la wʋsa da dɔlnɛ suor yinne.
14 Amaa o da nan kpɛn ken tuon nɛ o dapbɔɔsim la. O da nyɛ dap ka ba gʋli baa tabil dɔkpin, 15 ka sɛnbidis lɔɔ ba sies, ka bantabis bɛɛ ba zutin, ba wʋsa da nwɛnɛ Babilon zaba tɛreko dɔribanam nɛ, banɛ an Kaldea teŋ dim. 16 On da nyɛɛ ba la, ka o ya'am kpɛm kpɛn' ba, ka o tʋm nidibi ba san'an Kaldea teŋin. 17 Ka Babilon dim la kɛɛn o san'an na digin nɛ o, san'am o. Ka ban san'am o naae la, ka o ya'am yii ba ka o fɛndig ka basi ba. 18 On da tʋmm o pu'agɔɔnd tʋʋma la paalʋ ka kɛt ka sɔ' wʋsa nyɛt o sawɛɛnr la, li da kɛ ka m kisig o ka fɛndig ka bas o, nwɛnɛ man da fɛndig ka bas o bier la si'em la. 19 La'am nɛ wala ka o maligim ken tuon nɛ o dapbɔɔsim la, saŋkanɛ wʋsa ka o tiɛn o pu'asatim saŋa, on da tʋmmi li Egipt teŋin si'em la. 20 Ani ka o ya'amlɛog da lɛm kpɛn' banɛ li'ad o la, banɛ ka ba daulim zu'oe nwɛnɛ bʋmis nɛ widi daulim an si'em la. 21 Alazug fʋ ya'am da nan kpɛm bɛ tʋʋmkisa banɛ ka fʋ da mɔr fʋn da nan an pu'asadir la, fʋn da bɛ Egipt teŋin la ka ba da babin nɛf ka tɛn'ɛbidi fʋ bin'isa si'em la.
22 “Dinzugɔ, Oholiba, Zugsɔb onɛ an Paŋtita'ar Sɔb la yɛl si'em nwa ye, M na kɛ ka banɛ li'adif la lɛn tuligi kisigif, banɛ ka kisidim da kpɛn' ya sʋʋgin ka fʋ fɛndig ka basi ba la, m na kɛ ka ba liebi fʋ dataasi yi zin'ig wʋsa na zab nɛf. 23 Babilon dim nɛ Kaldea dim la wʋsa, nɛ dap banɛ yi Pekod nɛ Soa nɛ Koa tɛɛnsin, la'am nɛ Asiria dim la wʋsa, dasam vɛnla nɛ gɔmenanam nɛ zaba tuongatib nɛ zaba tɛreko dɔribanam nɛ wiedban'adib. 24 Ba wʋsa na tuligi tʋ'ʋsif nɛ zaba la'ad nɛ zaba tɛrekonam nɛ linɛ ka ba mɔri ziid zaba la'ad la, nɛ nidib bɛdegʋ; ba na zi'en zin'ig wʋsa nɛ kʋnt gbanti'edis bʋmbibis nɛ bʋntitada nɛ kʋnt zupibis. M na nɔki fʋ tisi ba ka ba kadi fʋ saria ka li dɔlli ba wada suori an si'em. 25 M na nɔki m sʋnpɛɛn la ziilif, m na kɛ ka li tʋligif. Ba na fi'igi fʋ nyɔnya nɛ fʋ tʋba, ka yanam banɛ kpɛlim la ba na kʋʋ ya nɛ sʋ'ʋg. Ka gban'e fʋ biribis nɛ bipumis, ka nyu'oe banɛ kpɛlim la nɛ bugum. 26 Ba mɛ na yɛɛsi fʋ la'ad la ka yisi fʋ niŋgɔnkɔris nɛ baŋ vɛnla la. 27 Ka m na kɛ ka fʋ bas tʋʋmkisa nɛ dapbɔɔsim linɛ ka fʋ da pin'il Egipt teŋin la. Fʋ kʋ lɛm bɔɔd bɛɛ tiɛn Egipt yɛla ya'asɛ.”
28 Bɔzugɔ Zugsɔb onɛ an Paŋtita'ar Sɔb la yɛl si'em nwa ye, “M bɔɔd ye m nɔkif nɛ tis nimbanɛ ka fʋ ya'am yi, ka fʋ fɛndig ka basi ba la. 29 Ba na maalif ka fʋ nyɛ ka baŋ ye ba kisif ka nɔk linɛ wʋsa ka fʋ tʋm nyɛ la mɔri keŋ ka kɛɛf ka fʋ an sawɛɛnr nɛ nu'uzaalis ka di nyan ka fʋ pu'agɔɔnd tʋʋma la yi paalʋ. Fʋ tʋʋmkisa nɛ fʋ tʋʋmyaalis la wʋsa 30 zi nɛ'ɛŋa kɛɛn fʋ zugin na, bɔzugɔ fʋ kʋkɔma'asim da kpɛn' sʋ'ʋlimnam la, ka fʋ nɔki ba bada la san'ami fʋ mɛŋ. 31 Fʋ dɔlnɛ fʋ bier la nɔba; linzug m na nɔk o bʋtiŋi niŋi fʋ nu'ugin ka li kɛ ka fʋ nyɛɛ o namisʋg la buudi.”
32 Zugsɔb onɛ an Paŋtita'ar Sɔb la yɛl ye,
“Fʋ na nuu fʋ bier bʋtiŋ la pʋʋgin,
bʋtiŋ kanɛ yalim ka zulim
ka an namisʋg buudi la;
li na zi la'ad nɛ nɛ'ɛsʋg na,
bɔzugɔ bʋtiŋ la pɛ'ɛlnɛ.
33 Fʋ ye fʋ bugnɛ ka nyɛ sʋnsa'aŋ bɛdegʋ.
Li anɛ bʋtiŋ linɛ ziid san'auŋ nɛ widigir na,
li anɛ fʋ bier Samaria bʋtiŋ.
34 Fʋ na nuu li naae nyain ka lɛɛli li ka li kʋdig;
fʋ na nwa'asi-nwa'asi li sɔɔm-sɔɔm
ka aansi fʋ bin'isa la.”
Manɛ yɛl. Zugsɔb onɛ an Paŋtita'ar Sɔb la pian'ʋkʋ la.
35 Alazug Zugsɔb onɛ an Paŋtita'ar Sɔb la yɛl ye, “Fʋn sadigim tami m yɛla ka bidim kʋdig la, fʋ na namisi fʋ tʋʋmkisa nɛ fʋ pu'agɔɔnd tʋʋma la wʋsa yɛla.”
36 Zugsɔb la da lɛn yɛlim ye, “Ninsaal biiga, fʋ na kad Ohola nɛ Oholiba sariaa? Alaa kem yɛli ba tʋʋmkisa banɛ ka ba tʋm la yɛla, 37 Bɔzugɔ ba san'am nɛ dap ka kʋ nidib. Ba maalnɛ pu'agɔɔnd tʋʋma nɛ ba bada la, hali ba nɔki ba biis banɛ ka ba du'a tis man la maal maana, ka ba an diibi tis bada la. 38 Ban lɛn niŋ si'eli nwa: Saŋkan la nɔɔ, ba da lɛn san'ami m Pʋ'ʋsim Yir la ka zan'asi m Vʋ'ʋsʋm Daar wada la. 39 Daakanɛ ka ba da nɔki ba biisi maal maannɛ tis bada la, daakan nɔɔ ba da kpɛn' san'ami m Pʋ'ʋsim Yir la. Ban da tʋm si'em m Yin la nwa.
40 “Ba da tʋm nidib ka ba keŋ lalli buol dap na. Ka ban paae na la, fʋ maali sʋʋ fʋ mɛŋ nyain ye fʋ nɔki fʋ mɛŋi tisi ba, ka buoɛn kirʋ ka nɔki fʋ niŋgɔnkɔrisi kɔr. 41 Ka zin'in kʋk tita'ar kanɛ vɛnl zug, ka ba maal teebuli zi'el, ka nɔk kpaam nɛ bʋnnyubisa linɛ an man din la sʋn'ʋl.
42 “Nidib bɛdegʋ banɛ an haya dim da la'asi gilig o maan tʋkpiidʋg, ba da mɔr Sabɛa nidibi yi sian'arin la na, ka ba nɔk nu'ubaansi pid pu'ab la nu'us ka nɔk girima zupibisi pidi ba zut. 43 Ka m pian' onɛ tʋm pu'a pu'agɔɔndir tʋʋma hali gɛn la ye, ‘Nannanna kɛl ka ba maal o wʋʋ pu'agɔɔndir, bɔzugɔ on pʋn an si'em la.’ 44 Ka ba sid digin nɛ o. Wʋʋ dapi dig nɛ pu'agɔɔndir si'em la, ala ka ba gbɛɛnd nɛ pu'a banɛ tʋm tʋʋmkisa la, Ohola nɛ Oholiba. 45 Amaa dap banɛ an pʋpielim dim na tɛɛgi ba tʋbir wʋʋ pu'a banɛ san'amid dap ka kʋʋd nidib la, bɔzugɔ ba tʋʋma anɛ ala.”
46 Zugsɔb onɛ an Paŋtita'ar Sɔb la yɛl si'eli nwa ye, “La'asim nidib na ka ba zab nɛ o, ka kpɛn'ɛsi ba dabiem ka faaɛn ba la'ad. 47 Nidib la na lɔbi ba nɛ kuga, ka kʋʋ ba nɛ sʋ'ʋs, ba na kʋʋ ba biribis nɛ bipumis ka nyɔ'ɔ ba ya' nɛ bugum.