Jerusalem tʋʋmbɛ'ɛd la yɛla
22
1 Zugsɔb labaar da kɛɛn m san'an na ye, 2 “Ninsaal biiga,” fʋ na kad o sariaa? Fʋ na kad tempʋkanɛ kʋʋd nidib nwa saria? Alaa kem yɛl o tʋʋmkisa banɛ wʋsa ka o tʋm la yɛla 3 ka yɛl o ye, Zugsɔb onɛ an Paŋtita'ar Sɔb la yɛl si'em nwa ye, Tempʋʋga! Fʋn kanɛ mɔr tɔɔgʋ kennɛ fʋ zugin na ka li anɛ ban kʋʋd nidibi fʋ ni ka maan bada san'ami ba mɛŋ la, 4 fʋ tʋm tʋʋmbɛ'ɛd ka li anɛ fʋn kʋʋd nidib ka maan bada san'amidi fʋ mɛŋ la zug. Fʋ kʋ'ʋgi fʋ dabisa la giŋa ka fʋ yʋma bɛn paae. Alazug m na kɛ ka sʋ'ʋlimnam la wʋsa nɛ'ɛsif ka fʋ lieb bʋnla'adiri tis tɛɛns la. 5 Banɛ bɛ yamma nɛ banɛ bɛ lalli wʋsa na mɔri fʋ la'ad ye, Fʋ anɛ teŋ kanɛ pʋ mɔr yʋ'ʋrɛ, ka daamʋg nɛ tʋkpiidʋg ma'aa pɛ'ɛl ani.6 “Gɔsim Israel kpɛɛmnam banɛ bɛɛ fʋ pʋʋgin la mɔri ba kpi'euŋ la kʋʋd nidib si'em. 7 Fʋ ni ka nidib bɛ ka pʋ tisidi ba saamnam nɛ ba manam girimaa, fʋ ni ka ba mukid saam ka pʋ maan sʋ'ʋm tisid kpiibis nɛ pʋkɔnyaa. 8 Fʋ nɛ'ɛsi m la'abanɛ an kasi la nɛ ka pʋ tisim Vʋ'ʋsʋm Daar la girimaa. 9 Fʋ ni ka zam dim bɛɛ mukidi ba mɛŋ hali ninkʋʋr yɛla; fʋ ni ka banɛ dit ba'abanɛ bɛ zuor zug diib la bɛ, ka tʋm nyamis tʋʋma. 10 Fʋ san'an ka banɛ dignɛ ba saamnam pu'ab la bɛ, fʋ ni ka banɛ pʋ tuunsid pu'a na lu nu'ug la bɛ. 11 Fʋ ni ka dau tʋm tʋʋmkisa nɛ o tiraan pu'a, ka sɔ' mɛ tʋm nyan tʋʋma san'am o bipu'a, ka sɔ' san'am o taʋn onɛ aan o mɛŋ saam bipuŋ. 12 Fʋ ni ka nidib siakid ye ba da' ba ka ba kʋ nid; ba pa'an nyɔɔd linɛ pʋ nara, ka filimmi ba taaba paamid arezak, ka tam man yɛla.” Zugsɔb onɛ an Paŋtita'ar Sɔb la pian'ʋkʋ la.
13 “M sid na pisigi m nu'usi ya arezak linɛ ka ya paam ka li pʋ dɔl suor la yɛla, nɛ nimbanɛ ka ba kʋʋ fʋ teŋsʋk la. 14 Fʋ sʋnkpi'euŋ la na kpɛm bɛ, bɛɛ fʋ na kpɛm mɔr paŋ daakanɛ ka man ye m sɛnbigif la? Man kanɛ an Zugsɔb la pian', ka sid na tʋmi li. 15 M na widigi ya kpɛn'ɛs sʋ'ʋlim nɛ tɛɛns la ni; ka kɛ ka ya tʋʋmkisa la gu'oe. 16 Fʋ na di nyan paalʋ sʋ'ʋlimnam la tuon, lin ka fʋ na baŋ ye manɛ an Zugsɔb la.”
17 Ka Zugsɔb labaar la kɛɛn m san'an na ye, 18 “Ninsaal biiga, Israel nidib la lɛn ka' tʋmmiri tis mam, ba wʋsa nwɛnɛ kʋntzɛn'ug nɛ kʋntnam buudi wʋsa linɛ kpɛm bɛ onɛ kʋnt la bugum teŋir. Ba nwɛnɛ fʋn na nyɛlig kʋnti yis bʋnsʋŋ la ka bas. 19 Alazug, Zugsɔb onɛ an Paŋtita'ar Sɔb la yɛl si'em nwa ye, ‘Ya wʋsaa lɛn ka' gban'ar la zug, m na la'asi ya Jerusalem tempʋʋgin. 20 Wʋʋ nidibi la'asid kʋntnam si'em nyɛligid nɛ bugum yisid bʋnsʋŋ la, ala ka m na la'asi ya nɛ sʋnpɛɛn, ka m ɛndʋg la na kpɛn' ya tempʋʋgin la naa nyɛligi ya. 21 M na la'asi ya ka kɛ ka m sʋnpɛɛn luu ya zug wʋʋ bugum tʋʋlʋg nɛ, ka ya nyɛlig teŋ la ni. 22 Wʋʋ anzurifa ɛɛn nyɛlig bugumin si'em la, ala mɛn ka ya na nyɛlig ka baŋ ye man kanɛ an Zugsɔb la kpa'ae m sʋnpɛɛn la gɛɛli ya.’ ”
23 Zugsɔb la labaar da lɛn kɛɛn m san'an na ya'as ye, 24 “Ninsaal biiga,” yɛlim teŋ la ye, Fʋ anɛ teŋ kanɛ pʋ nyɛ saa bɛɛ mɛligim tɔɔg dabisa la saŋaa. 25 Tuongatib la bɛ tempʋʋgin la mɔr gban'asu'ada. Ba nwɛnɛ gbigimi na gban'e si'el ka nwa'am ka aansidi li nɛ; ba gban'ad nidibi kʋʋd, ka faand areza'as nɛ la'asʋma ka kɛt ka pʋkɔnya bɛdegʋ bɛ teŋin la. 26 Maanmaannib la san'amidi m wada, ka miligidi m la'abanɛ an kasi la; ba pʋ bakid linɛ an kasi nɛ linɛ ka' kasii. Ba pa'an ye linɛ an kasi nɛ linɛ ka' kasi la wʋsa anɛ yinne; ka zan'as ye ba kʋ dɔlli m Vʋ'ʋsʋm Dabisir wada la, ka li yɛla kɛ ka m yʋ'ʋr san'ami ba san'an. 27 Kpɛɛmnam banɛ bɛɛ ani la nwɛnɛ zanku'a na gban'e si'eli ɔnbid nɛ, ba yisid ziim ka kʋʋd nidibi paamid nyɔɔd linɛ pʋ dɔl suorɛ. 28 Nɔdi'esidib la yɛtnɛ nier linɛ ka' sida nɛ bɛog yɛla linɛ an ziri lusid nidib la bɛ'ɛd la tisidi ba. Ba yɛt ye, Zugsɔb onɛ an Paŋtita'ar Sɔb la yɛl si'eli nwa. Ka Zugsɔb la mɛ pʋ pian' si'ela. 29 Teŋ la nidib filimnɛ ka faand, ba mukid nɔŋ nɛ fara dim, ka maan saam linɛ pʋ nara, ka kad saria mɔŋidi ba bʋʋd.
30 “Ka m ieed dau kanɛ na an nu'unwɛ'ɛd ka na mɛ zaŋguomi zi'el ka li zi'en man nɛ teŋ la naalʋŋ yɛla, linɛ na kɛ ka m kʋ san'ami lii, amaa m pʋ nyɛ sɔ'ɔɔ. 31 Alazug m na kpa'ae m sʋnpɛɛn la gɛɛli ba, ka kanbisi ba nɛ sʋnpɛɛn linɛ an bugum la, ka kɛ ka ban tʋm si'el la lɛn lɛbi ba mɛŋ zugin.” Zugsɔb onɛ an Paŋtita'ar Sɔb la pian'ʋkʋ la.