Babilon n an zaba sʋ'ʋg Wina'am nu'ugin la
21
1 Zugsɔb labaar la da kɛɛn m san'an na ye, 2 “Ninsaal biiga, nɔkimi fʋ nindaa kpa' Jerusalem tempʋʋgin ka pian' zɛrig Pʋ'ʋsim Yir la. Di'emi m nɔɔr pian'ad linɛ ka m zɛrig Israel teŋ la wʋsa tisi li 3 ka yɛl ye, Zugsɔb la yɛl si'eli tis Israel dim la nwa ye, M kisi ya nɛ. M na fuoe m sʋ'ʋg la li tɛɛnginɛ kɛnsig yanam banɛ an ninsʋma nɛ nimbɛ'ɛdnam la wʋsa yisi m san'an. 4 Man na nwaae ninsʋma nɛ nimbɛ'ɛdnamɛ yisi m san'an la zug, sʋ'ʋg la kʋ lɛn lɛbi li tɛɛnginɛ; li na gur sɔ' wʋsa lin yi ya-dagɔbʋgʋ keŋ paae ya-datiuŋ. 5 Ka nidib wʋsa na baŋ ye man kanɛ an Zugsɔb la fuoe m sʋ'ʋgʋ li tɛɛngʋn la; ka li kʋ lɛn lɛb ya'asɛ.”6 Dinzugɔ, Ninsaal biiga, kummi ba tuon nɛ sʋnsa'aŋ tita'ar nɛ ɛndʋg! 7 Ka ba ya'a bu'osif ye, “Bɔ ka fʋ kumma?” Fʋn on lɛbis ye, Labaar linɛ kenna la zug. Dabiem na gban'e sɔ' wʋsa ka o nu'us kpi; o sʋnkpi'euŋ wʋsa na yi ka kɛ o, ka o duma kirid ka bʋk wʋʋ gungum nɛ. Li kenna! Li sid na niŋ! Zugsɔb onɛ an Paŋtita'ar Sɔb la pian'ʋkʋ la.
“Zaba sʋ'ʋg ye, zaba sʋ'ʋg ye!
Li saasnɛ ka maali nyɛɛn,
10 li saasi gur ye li kʋ,
ka duus ye li nyɛɛn wʋʋ saa iank nɛ!
“Ti na maal sumalisim m biig Juda na'am dansaar la yɛlaa? Sʋ'ʋg la nɛ'ɛsid daban wʋsa nɛ.
11 “Ba gban'e ye ba saas sʋ'ʋg la ka maali li ka li nyɛɛn,
ye ba nɔk nu'ugʋ gban'e li;
ba saasi li nɛ ka maali duusi li,
ka ti'ebi gur ye onɛ kʋʋd la nu'ug gban'e li.
12 Kaasim bɛdegʋ ka ki'e kuŋ, Ninsaal biiga,
bɔzugɔ li ye li zabnɛ nɛ m nidib la;
li ye li zabnɛ nɛ Israel tuongatib la wʋsa.
Ba ye ba kʋʋ ba nɛ, la'am nɛ m nidib la,
alazug bibigimi ya nyɔ'ɔg dabiem zug.
13 “Makir na ba'asi kena. Ka li na niŋ wala Juda na'am dansaar kanɛ ka sʋ'ʋg la nɛ'ɛs la ya'a pʋ keŋ tuonnɛ? Zugsɔb onɛ an Paŋtita'ar Sɔb la pian'ʋkʋ la.
14 “Alazug, Ninsaal biiga, di'emi m nɔɔr pian'adi pian'
ka pisigi fʋ nu'us.
Kɛl ka sʋ'ʋg la ki'e nɔɔr ayi',
hali kɛl ka li paae nɔɔr atan' ya'as.
Li anɛ sʋ'ʋg kanɛ nar ye li li'id,
li anɛ sʋ'ʋg kanɛ kʋʋd bɛdegʋ,
ka giligi ba lʋga wʋsa.
15 Ka li kɛ ka dabiem bɛ
ka nidib bɛdegʋ na kpi.
M zi'el sʋ'ʋg la ba za'anɔya wʋsa ni
ye li kʋʋ ba bɛdegʋ.
Aa! Li na ian'ad wʋʋ saa nɛ
ba gban'e li ye ba kʋ.
16 Sʋ'ʋgɔ, ki'em lɛb datiuŋ
ka lɛb dagɔbʋg,
fʋ nɔɔri fɛndigidi lɛbid zin'isi'a wʋsa.
17 Man mɛ na pʋ'ʋsi m nu'us
ka m sʋnpɛɛn la ma'ae.
Man kanɛ an Zugsɔb la pian'.”
18 Zugsɔb labaar la da kɛɛn m san'an na ye, 19 “Ninsaal biiga, maalim suoya ayi' ka Babilon na'ab sʋ'ʋg la dɔl, ka li wʋsa pin'ili yit teŋ yinne ni. Maalim zanbin si'a digil zin'ikanɛ ka suoya ayi' la bakidi kpa'ad tɛɛns ayi' la. 20 Maalim suor yinne ka sʋ'ʋg la dɔlli keŋ zab nɛ Rabba linɛ an Ammon dim teŋ la, ka yinne mɛ dɔlli keŋ zab nɛ Juda nɛ Jerusalem linɛ aan ba kpi'euŋ zin'ig la. 21 Bɔzugɔ Babilon na'ab la na zi'en zanbin la baba, suoya ayi' la kidigid zin'isi'a la iee zanbin la. O na nɔk piema maal bʋgʋlʋm-bʋgʋlʋm, ka lɛn nɔk naaf sɔɔnri kpansi gɔs. 22 O datiuŋ nu'ugin ka Jerusalem zanbin na kena, zin'ikanɛ ka o na keŋ digil tanni maal zaba dʋʋsa, ka bas suor ka ba kʋʋ ba, ka ki'e zaba kuŋ, ka digil tanni maal zaba dʋʋsa giŋ za'anɔya la, ka la'as gulungun'ud, ka maali gu' gilig teŋ la suoya. 23 Li na nwɛnɛ li ka' sida tis Jerusalem dim banɛ maal nɔnaar nɛ o la, amaa o na tiɛn ba, ba tʋʋmbɛ'ɛd la yɛla ka gban'e ba.”
24 Alazug Zugsɔb onɛ an Paŋtita'ar Sɔb la yɛl si'em nwa ye, “Ya ki'isʋg la tiɛn ya tʋʋmbɛ'ɛd la tis nidib, ka ya zan'asʋg la zug ka ya tʋʋmbɛ'ɛd la yi paalʋ. Ka yanamɛ maal nɛ'ɛŋa la zug ba na gban'e ya keŋ.
25 “Israel tuongat onɛ an dian'ad sɔb nɛ, tʋʋmbɛ'ɛd sɔba, fʋ bɛog nie ya, ka fʋ tʋbtɛɛgir saŋa paae. 26 Zugsɔb onɛ an Paŋtita'ar Sɔb la yɛl ye, ‘Yisim o na'am papafu la, ka pidig o na'am zupibig la. Li kʋ nwɛnɛ lin da an si'em la. Tadimnam la na dʋ, ka banɛ dʋ la na sig. 27 San'auŋ ye! San'auŋ ye! M na kɛ ka li san'am! Li kʋ nyaŋi zi'enɛ asɛɛ ka onɛ sʋ'oe li amɛŋa ti paae na. Onɛ nar ye o di'e li la on sɔb ka m na nɔki li tis.’ ”
28 Ka fʋn Ninsaal biiga, di'emi m nɔɔr pian'ad ka yɛli ba ye, Zugsɔb onɛ an Paŋtita'ar Sɔb la yɛl si'eli nwa, zaŋi ken Ammon dim la nɛ ba tʋ'ʋd la yɛla:
“Zaba sʋ'ʋg ye! Zaba sʋ'ʋg ye!
Li fuoe ya ye li kʋ nidib bɛdegʋ.
Ba saasi li nɛ ye li san'am
ka li ian'ad wʋʋ saa nɛ!
29 La'am nɛ ban ye ba nyɛti fʋ yɛla ka li ka' sida,
ka bʋgʋdi fʋ yɛla ka li ka' sida la,
sʋ'ʋg la na bɛ nimbɛ'ɛdnam
banɛ ka ba ye ba kʋ la wʋsa niŋgɔnya ni.
Ba dabisa paae ya
ka ba tʋbtɛɛgir saŋa paae li bɛn.
30 Tɔ! Lɛbisim sʋ'ʋg la li tɛɛngʋn.
Zin'ikanɛ ka ba da maalif la,
fʋ yaanam teŋin la,
ani ka m na kadi fʋ saria.
31 M na kɛ ka m ɛndʋg la luu fʋ zugin na
ka kɛ ka m sʋntɔɔg la yina gɛɛlif;
M na nɔki fʋ tis nimbɛ'ɛdnam,
dap banɛ mi' san'auŋ suoya.
32 Fʋ na lieb daug ka bugum dit,
fʋ ziim la na yii fʋ mɛŋ teŋin.
Ba kʋ lɛn tiɛn fʋ yɛla ya'asɛ
bɔzugɔ man kanɛ an Zugsɔb la pian'.”