Israel dim banɛ pʋ siakid la yɛla
20
1 Tinamɛ da an yammisi bɛ teŋ zʋŋ saŋa si'a la, li yʋma ayɔpɔi la, li nwadis anu la ni dabisa piiga la daar, ka Israel kpɛɛmnam la sieba da kɛɛn m san'an na ye ba bu'os Zugsɔb la baŋ linɛ bɛ, ka da zin'ini m tuon.2 Ka Zugsɔb la labaar kɛɛn m san'an na ye, 3 Ninsaal biiga, pian'am tis Israel kpɛɛmnam la ka yɛli ba ye, Zugsɔb onɛ an Paŋtita'ar Sɔb la yɛl ye, “Ya kena ye ya bu'os mam baŋɛɛ? Asida sida ka m yɛti ya ye, m kʋ kɛ ka ya bu'osim si'el yɛllɛ” Zugsɔb onɛ an Paŋtita'ar Sɔb la pian'ʋkʋ la.
4 Fʋ na kadi ba sariaa? Ninsaal biiga, fʋ na kadi ba sariaa? Alazug yɛlimi ba tʋʋmkisa banɛ ka ba yaanam da tʋm la yɛla, 5 ka yɛli ba ye, Zugsɔb onɛ an Paŋtita'ar Sɔb la yɛl si'em nwa ye, “Daakanɛ ka m da gaŋ Israel la, m da ʋki m nu'ug ka pɔɔ tis Jakob yaas, ka nie m mɛŋi pa'ali ba Egipt teŋin. M da ʋki m nu'ug ka yɛli ba ye, ‘Manɛ an Zugsɔb onɛ aan ya Wina'am la.’ 6 Daakan la m da pɔɔ tisi ba ye m na yisi ba Egipt teŋin, mɔri ba keŋ teŋ kanɛ ka man mɛŋ iee ye m tisi ba la, teŋ kanɛ ka bin'isim nɛ siind pʋbid, ka li vɛnli gat tɛɛns wʋsa la. 7 M da lɛn yɛli ba ye ba wʋsa yinne-yinne basim bʋmbanɛ ka ba ya'ab ka ti'e ka li ka' sʋŋir la, ka mɛ da san'ami ba mɛŋ nɛ Egipt dim bada laa, Manɛ an Zugsɔb onɛ aan ya Wina'am la.”
8 Amaa ba da zan'asim ka pʋ kɛlis man yɛt si'el laa; ba da pʋ yis ba'abanɛ kʋ nyaŋi sʋŋi ba laa, bɛɛ kɛɛs Israel dim bada la basɛ. Alazug ka m ye m na kɛ ka tɔɔg luu ba zugin, ka m sʋnf duoe nɛ ba Egipt teŋin. 9 Amaa m yʋ'ʋr la zug, m da pʋ bɔɔd ye m kɛ ka ba nɛ'ɛsi m yʋ'ʋr la sʋ'ʋlimnam la nii, banɛ nini ni ka m nie m mɛŋi pa'al Israel dim ka yisi ba Egipt teŋin la. 10 Alazug m da yisi ba Egipt teŋin mɔri ba kɛn sian'arin la na. 11 M da tisi ba m zi'ela, ka kɛ ka ba baŋi m wada la, bɔzugɔ ninkanɛ siaki li la, li na sʋŋ o ka o vʋe. 12 M mɛ da tisi ba m Vʋ'ʋsʋm Dabisir la ka li an zanbinnɛ ti teŋsʋk, ka ba baŋ ye man kanɛ an Zugsɔb la kɛ ka ba an kasi.
13 La'am nɛ wala ka Israel nidib la ki'isim sian'arin la. Ba da pʋ dɔlli m zi'ela la ka zan'asi m wada la, la'am nɛ onɛ siaki li na paam vʋm la. Ba da san'ami m Vʋ'ʋsʋm Dabisa la. Linzug ka m yɛl ye m sʋnpɛɛn na luu ba zug ka m kʋʋ ba sian'arin la. 14 Amaa m yʋ'ʋr la zug, m da mɔ man na niŋ si'em ka kʋ paam yʋ'ʋbɛ'ɛd tɛɛns banɛ da nyɛ ka m yisi ba la nii. 15 Ala ya'as ka m da ʋki m nu'ug mɔɔgin la ka pɔɔ tisi ba ye m kʋ lɛm mɔri ba keŋ teŋ kanɛ ka m ye m tisi ba la ya'asɛ; teŋ kanɛ ka bin'isim nɛ siind pʋbid, ka li vɛnl hali gat tɛɛns wʋsa la. 16 Ka li anɛ ban da zan'asi m wada ka pʋ dɔlli m zi'ela la ka pʋ tis Vʋ'ʋsʋm Daar la girima la zug. Bɔzugɔ ba da pɛsigi ba sʋnf wʋsa tisi ba bada la. 17 La'am nɛ wala, m da gɔsi ba ka zɔɔ ba nimbaanlig, ka pʋ kʋʋ ba bɛɛ li' ba mɔɔgin la. 18 M da yɛli ba biis la sian'arin la ye, Da dɔlli ya saamnam nɔba bɛɛ dɔlli ba wada la, bɛɛ san'ami ya mɛŋ nɛ ba bada laa. 19 Manɛ aan ya Zugsɔb Wina'am; dɔllini m zi'ela la ka siaki m wada la sʋ'ʋŋa. 20 Kɛlli ka m Vʋ'ʋsʋm Daar la an kasi, ka li na an zanbin man nɛ yanam teŋsʋk. Ka ya na baŋ ye manɛ an Zugsɔb onɛ an kasi la. 21 “Amaa biis la da zan'as mam. Ba da pʋ dɔlli m zi'ela la, ka mɛ pʋ gu'us ka dɔlli m wada la; la'am nɛ onɛ siaki li na vʋe la. Ba mɛ da san'ami m Vʋ'ʋsʋm Dabisa la. Ka m yɛl ye m na kɛ ka tɔɔg luu ba zug, ka m sʋnf pɛlig nɛ ba sian'arin la. 22 Amaa m da gban'e m mɛŋ, m yʋ'ʋr la zug, ka mɔ man na niŋ si'em ka da paam yʋ'ʋbɛ'ɛd tembanɛ ni ka ba da bɛ ka m yisi ba la. 23 M da lɛn ʋki m nu'ug ka pɔ tisi ba mɔɔgin la ye, m na widigi ba kpɛn'ɛs sʋ'ʋlimnam nɛ tɛɛns la sʋʋgin, 24 bɔzugɔ ba pʋ siaki m zi'ela nɛ m wada la ka pʋ maali m Vʋ'ʋsʋm Dabisa la kasii, ka ba kʋkɔma'asim kpɛn' ba yaanam bada la. 25 M mɛ da basi ba ka ba dɔl wada banɛ ka' sʋ'ʋm nɛ zi'ela banɛ kʋ tisi ba vʋm. 26 M da dɔlisnɛ ba mɛŋ piini la nii kɛ ka ba tʋm bɛ'ɛd ka mɔri ba mɛŋ bikpɛma na maal maana. Ye m kɛ ka li paki ba hali ka ba baŋ ye manɛ an Zugsɔb la.”
27 Dinzugɔ, Ninsaal biiga, pian'am tis Israel nidib la ka yɛli ba ye, “Zugsɔb onɛ an Paŋtita'ar Sɔb la yɛl si'em nwa ye, ‘Tʋʋmbɛ'ɛkaŋa buudi nɔɔ ka ya yaanam da niŋ ka zan'asim la. 28 Man da mɔri ba paae teŋ kanɛ ka m pɔ ye m tisi ba la, ka ba nyɛ zuoya nɛ tibɛda la, ani ka ba da maali ba maana linɛ kɛ ka m sʋnf duoe hali, nɛ ban nyɔ'ɔd bʋnnyubisa nɛ daam linɛ ka ba mɔri kenna maan maana la.’ 29 Ka m bu'osi ba ye, ‘Kʋkʋna zut banɛ ka ya ken la an bɔ?’ ” (Li yʋ'ʋri buon Bamah hali ti paae zina.)
Tʋbtɛɛgir nɛ sʋŋir
30 Ka Zugsɔb la da lɛn yɛlim ye, Alazugɔ yɛlim Israel nidib la ye, Zugsɔb onɛ an Paŋtita'ar Sɔb la bu'os ye, “Ya na tʋm tʋʋmyɔɔd wʋʋ ya yaanamɛ da niŋ si'em ka dɔl ba'a linɛ kɛt ka ya an dian'ad dim laa? 31 Yanamɛ mɔri ya biribisi nyɔ'ɔdi maan maana tisidi ya bada la, ya nan maligim paasidi ya mɛŋ nɛ dian'ad, hali ti paae zina. Yanam Israel dima, man na siak ka ya bu'osimi baŋ linɛ bɛɛ?” Zugsɔb onɛ an Paŋtita'ar Sɔb la pian'ʋkʋ la, Asida sida ka m yɛt ye, m kʋ kɛ ka ya bu'osimi baŋ linɛ bɛɛ.
32 Ya yɛt ye, “Ti bɔɔd ye ti nwɛnɛ tembama la, ka nwɛnɛ dunia nidib banɛ wɔ'ɔgid tiis nɛ kuga la.” Amaa linɛ bɛɛ ya pʋtɛn'ɛrin la kʋ maligin tʋmm. 33 Zugsɔb onɛ an Paŋtita'ar Sɔb la yɛl ya ye asida, sida ka m yɛti ya ye, “M na tiɛn m nu'ug kpi'euŋ nɛ nu'ug kanɛ mɔr paŋ hali la, nɛ ɛndʋgʋ zanli ya. 34 M na mɔri ya yi tɛɛnsin nɛ tembanɛ wʋsa ni ka ya widig yaama-yaama la ni la'as na. M na tiɛn m nu'ug kpi'euŋ nɛ nu'ug kanɛ mɔr paŋ hali la nɛ ɛndʋg. 35 M na mɔri ya yi tɛɛns la pipirisin la na, ka ti kpa' taaba ka m kadi ya saria lugi ya. 36 Man da maali ya yaanam si'em Egipt teŋ sian'arin la, ala nɔɔ ka m mɛ ye m kadi ya saria.” Zugsɔb onɛ an Paŋtita'ar Sɔb la pian'ʋkʋ la. 37 “Ya ya'a gati m tuon, m na kpansi ya, ka kaali ya wʋʋ pɛ'ɛs nɛ ka kɛ ka ya siaki m nɔnaar la. 38 M na yis banɛ ki'isid ka tʋm tʋʋmbɛ'ɛd la ya san'an. La'am nɛ man na yisi ba ban bɛ teŋ si'a ni la, ba kʋ kpɛn' Israel dim teŋin la. Ka ya na baŋ ye manɛ an Zugsɔb la.”
39 “Israel dima, ya'a kpɛlim yanam, Zugsɔb onɛ an Paŋtita'ar Sɔb la yɛli ya ye, ‘Sɔ' wʋsa, kem pʋ'ʋs o ba'ar! Amaa lin nya'aŋ la li anɛ tilas ye ya di'e mam nɔɔr ka kʋ lɛn san'ami m yʋ'ʋsʋŋ la ya'as nɛ ya piini nɛ bada laa. 40 Bɔzugɔ man zuor linɛ an kasi ka an Israel zuokanɛ wa'am la ni ka Israel nidib la wʋsa na pʋ'ʋs mam, ka m na di'e ba. Zugsɔb Paŋtita'ar Sɔb la pian'ʋkʋ la. Ani ka m na kɛ ka ya mɔri ya maana nɛ ya ya'amlɛog piini nɛ ya bʋndɛɛnna piini la na, la'am nɛ ya maana linɛ an kasi la. 41 M ya'a ti la'asi ya yi sʋ'ʋlimnam nɛ tɛɛns la ni, m na di'e ya maan linɛ nyuusid sʋ'ʋŋa la ka pa'al ye man anɛ kasi ka sʋ'ʋlim banɛ bɛ la wʋsa nyɛ. 42 M ya'a mɔri ya kɛn Israel teŋin na, teŋ kanɛ ka m da ʋki m nu'ug ka pɔ ye m na nɔki tisi ya yaanam la, ya sid na baŋ ye manɛ an Zugsɔb la. 43 Ani ka ya na tiɛn ya tʋʋma an si'em, nɛ ya bɛllim linɛ kɛ ka ya lieb dian'ad dim man tuon la, ka li na kɛ ka ya kisigi ya mɛŋ, bɛ'ɛd kanɛ wʋsa ka ya tʋm la yɛla. 44 M ya'a ti tʋm linɛ na kɛ ka m yʋ'ʋr da san'am ka pʋ dɔl wʋʋ yanamɛ tʋm bɛ'ɛd si'em la bɛɛ ya filʋŋ tʋʋma la, ya na baŋ ye manɛ sid an Zugsɔb la. Zugsɔb onɛ an Paŋtita'ar Sɔb la pian'ʋkʋ la.’ ”
45 Zugsɔb la labaar da kɛɛn m san'an na ye, 46 “Ninsaal biiga,” nɔkimi fʋ nindaa kpa' ya-dagɔbʋg baba, di'emi m nɔɔr pian'ad linɛ ka m zɛrigi ba la tisi ba la'am nɛ sian'anr linɛ bɛɛ ani la. 47 Yɛlim ya-dagɔbʋg baba sian'anr la ye, Wʋmmi Zugsɔb labaar. Zugsɔb onɛ an Paŋtita'ar Sɔb la yɛl si'eli nwa: “M ti'ebidnɛ ye m nyu'oe ya bugum, ka li kanbi ya tibanɛ ma'as nɛ banɛ kʋdig la wʋsa. Bugumpielig la kʋ kpiisɛ, ka tʋʋlʋg la na paae si'el wʋsa lin yi ya-dagɔbʋgʋ keŋ paae ya-datiuŋ. 48 Sɔ' wʋsa na nyɛ ka baŋ ye manɛ nyu'oe li, ka li kʋ nyaŋi kpiisɛ.”
49 Ka m lɛbis ye, “Aa! Zugsɔb onɛ an Paŋtita'ar Sɔba! Ba pian'adi m yɛla ye, ‘Ayei, li ka'anɛ sɔlima ka o sɔlimaa?’ ”