Sʋnsa'aŋ fabʋlʋg Israel tuongatib yɛla
“ ‘Ya ma da anɛ gbigimnya'aŋ kanɛ kpi'em
gbigima la sʋʋgin!
O da la'am digi nɛ gbigimbibis la
ka ugusidi ba.
3 O da gʋ'ʋl o biig yinne,
ka o lieb gbigimtita'ari mɔr paŋ.
Ka o zamis si'elnam gban'ab
ka gban'ad nidibi ɔnbid.
4 Tɛɛns la dim da wʋm o yɛla,
ka gban'e o niŋ bʋmbɔkin.
Ba da nɔk gu'osi gban'e o tɛɛg o
mɔri keŋ Egipt teŋin.
5 Gbigimnya'aŋ la nyɛ ka o ti'ir la kʋ tʋm la,
ka on tɛn'ɛs ye o na nyɛ si'el la kae la,
ka o nɔk o bʋmbil yinne ya'asɛ
ugus ka o ti lieb gbigimtita'ari mɔr paŋ.
6 O da bɛ nɛ gbigima la sʋʋginɛ giligid,
bɔzugɔ o yʋ'ʋn da anɛ gbigim kanɛ mɔr paŋ.
O da zamis si'elnam gban'ab
ka gban'ad nidibi ɔnbid.
7 O da san'ami ba zin'ikpi'ema la
ka widigi ba tempʋʋs la wʋsa.
Teŋ la nɛ banɛ bɛɛ ani wʋsa
dabiem da gban'e banɛ, on nwa'am si'em la zug.
8 Ka tɛɛns la duoe tʋ'ʋs o,
tembibis banɛ gilig o la wʋsa.
Ba da ya'ae ba zulis ka gur o,
ka o kena luu ba bɛndigin.
9 Ba da nɔk gu'osi gban'e o tɛɛgi kpɛn'ɛs kʋnt kʋsɔkin
ka mɔr o keŋ tis Babilon na'ab.
Ba da nɔk o kpɛn'ɛs sanrega dɔɔgin,
ka ba pʋ lɛn wʋm o nwa'amʋg la ya'as
Israel zuoya la zugɔ.
10 Fʋ ma da lɛn nwɛnɛ tikanɛ wan walsʋma nɛ
bɛɛ fʋ vain tiis pɔɔgin la
ka ba sɛɛ li kpi'el nɛ ku'om.
Li da wan ka mɔr wila bɛdegʋ,
ku'om pʋ pansig o la zug.
11 Li wila la da kpi'emnɛ
ka nar nɛ ban na nɔki li maal na'am dansaar.
Li da wa'am nɛ dʋʋ agɔla
gat sian'arin tiis la vaand wʋsa,
ka nyɛt zin'ig wʋsa li wa'alim la zug
nɛ lin mɔr wila bɛdegʋ la zug.
12 Amaa ka ba vuoɛn li nɛ sʋnpɛɛnni
lɔbi li bas teŋin.
Ya-nya'aŋ sisi'em da kɛ ka li kʋdigi gɔbilim
ka fanri li wala la;
ka li wilkpi'ema la kʋdig
ka bugum dii li.
13 Nannanna li yʋ'ʋn sɛnɛ pipirigin,
zin'ikanɛ kʋdig ka ku'om kae.
14 Bugum da naanɛ li wilbɛda la yinne ni
yina dii li wala la.
Wilkpi'euŋ pʋ lɛn kpɛlimi li zug
ka na'ab na nyaŋi nwaae maal na'am dansaarɛ.
Nɛ'ɛŋa anɛ sʋnsa'aŋ yɛla ka li nar ye ba yʋ'ʋm sʋnsa'aŋ saŋa ma'aa.’ ”