Ninkanɛ tʋm taal onɛ kpiid
“ ‘Ba'anam ɔnb li'ema,
ka biis nyina gbi'ida?’ ”
3 Zugsɔb onɛ an Paŋtita'ar Sɔb la ye, Asida, sida ka m yɛt ye, ya kʋ lɛn siilim siiliŋ kaŋa Israel teŋinɛ. 4 Bɔzugɔ onɛ vʋe wʋsa anɛ man din, saamnam nɛ ba biis wʋsa anɛ man din. Onɛ wʋsa tʋm tʋʋmbɛ'ɛd, o sɔbi na kpi.
5 Nwɛnɛ pʋpielim sɔb ya'a bɛ
ka tʋm linɛ an sʋm ka dɔl suor,
6 ka pʋ dit diib banɛ ka ba maannɛ
tisid teŋgbana banɛ bɛ zuoya zug la
bɛɛ ti'e bada banɛ ka Israel dim dɔl la,
ka pʋ san'amid o kpi'a pu'a
bɛɛ dig nɛ pu'a saŋa kanɛ ka o lu nu'ugɔ,
7 ka pʋ mugusid sɔ'ɔsɔ
amaa o lɛbisid linɛ wʋsa ka sɔ' kena digil
ka pɛ'ɛŋ si'el o san'an la.
O pʋ faand nidiba
amaa o mɔr o diibi tisid banɛ kɔ'ɔm zabid
ka banɛ ken biel ka o tisidi ba fuud.
8 O pʋ pɛmisid ligidi nyɔɔd yɛlaa
bɛɛ pa'an nyɔɔdi li zugini galisida.
O gban'ad o mɛŋ ka pʋ tʋm tʋʋmbɛ'ɛdɛ,
ka nidiba ayi' ya'a mɔr yɛl, o kati li saria nɛ sida.
9 O siakidi m wada
ka dɔlli m zi'ela nɛ sida.
Ninkan sɔb anɛ pʋpiel,
o sid na vʋe.
Zugsɔb onɛ an Paŋtita'ar Sɔb la pian'ʋkʋ la.
10 Li ya'a nwɛnɛ o mɔri bikanɛ tʋm gɛɛntʋʋma, ka kʋʋd nidib, bɛɛ tʋm tʋʋm banɛ ka m kaal la tis o ba'abiig 11 ka niŋid bʋmbanɛ wʋsa ka o saam pʋ niŋida, ka dit teŋgban banɛ bɛ zuoya ni la diib, ka dig nɛ o kpi'es pu'ab, 12 ka mugusid nɔŋ dim nɛ tadimnam, ka faand nidib, ka pʋ lɛbisid linɛ ka sɔ' mɔr na digil ka pɛ'ɛŋ si'el o san'anɛ, ka dɔl bada, ka tʋm tʋʋmkisa, 13 ka pɛ'ɛmisid nidib nyɔɔd yɛla ka pa'an nyɔɔd ka li gat lin nar si'em, ninkan sɔb nar ye o vʋyaa? Ayei o pʋ nara! Bɔzugɔ on tʋm tʋʋmkisbama la, li anɛ tilas ye ba kʋʋ o, ka o ziim na bɛɛ o mɛŋ zugin.
14 Amaa li ya'a nwɛnɛ bikaŋa mɛ mɔr o mɛŋ biig, ka o nyɛɛ o saamme tʋm tʋʋmbɛ'ɛsi'a la wʋsa, ka pʋ tu'asi tʋmmi lii:
15 O pʋ dit diib linɛ ka ba maan teŋgbana la nii
bɛɛ dɔl teŋgbana banɛ ka Israel dim dɔl la.
O pʋ dig nɛ o kpi'es pu'aba.
16 O pʋ mukid sɔ'ɔsɔ
bɛɛ digil lauk ka nyaan pɛ'ɛŋ si'eli tis o kpi'esɛ.
O pʋ faand nidiba
amaa o nɔkid o diibi tisid banɛ kɔ'ɔm zabid
ka tisid banɛ ken biel la fuud.
17 O gban'ad o mɛŋ ka pʋ tʋm bɛ'ɛdɛ
ka mɛ pʋ pɛmisid ka pa'an nyɔɔd bɛdegʋʋ.
O dɔlli m wada nɛ m zi'ela la.
On sɔb kʋ nyaŋi kpii o saam tʋʋmbɛ'ɛd yɛlaa, o na ba'asi vʋe. 18 Amaa o saam na kpii o mɛŋ tʋʋmbɛ'ɛd yɛla, bɔzugɔ o pɔnrimnɛ ka faand o ba'abiis ka tʋm linɛ pʋ dɔl suorɛ o nidib la san'an.
19 La'am nɛ wala ya bu'osid ye, “Wala ka biig la pʋ namis o saam la taal zugɔ?” O biig la sadigim tʋm linɛ nar ka dɔl suor, ka gu'usid ka dɔlli m wada la, o sid na vʋe. 20 Ninkanɛ tʋm tʋʋmbɛ'ɛd la, onɛ na kpi, biig saam yɛla kʋ dɔl oo, biig mɛ yɛla kʋ dɔl o saama. Pʋpielim sɔb tʋʋm sʋma na dɔl o, ka bugusim sɔb tʋʋmbɛ'ɛd mɛ na dɔl o.
21 Amaa nimbɛ'ɛd ya'a bas tʋʋmbɛ'ɛd banɛ ka o tʋm la wʋsa ka dɔlli m wada la, ka tʋm linɛ an sida ka dɔl suor, o sid na vʋe; o kʋ kpii. 22 Tʋʋmbɛ'ɛd banɛ ka o tʋm la wʋsa kʋ lɛn dɔl oo. Pʋpielim tʋʋma banɛ ka o tʋm la zug, o na vʋe. 23 “Li malis nɛ tis mam nɛ tʋʋmbɛ'ɛd sɔbi na kpi bɛɛ?” Zugsɔb onɛ an Paŋtita'ar Sɔb la pian'ʋkʋ la. Ayei! Li lɛɛ malisim nɛ ban na bas tʋʋmbɛ'ɛd ka vʋe.
24 Amaa pʋpielim sɔb ya'a bas pʋpielim tʋʋma ka tʋm tʋʋmbɛ'ɛd, nɛ tʋʋmkisa banɛ ka bugusnam tʋm la, o na vʋe bɛɛ? Ayei! Sɔ' kʋ lɛn tiɛn o tʋʋm sʋma banɛ ka o tʋm la. On ka' sida sɔba, nɛ on tʋm tʋʋmbɛ'ɛd sieba la zug, o na kpi.
25 Amaa ya yɛt ye, “Zugsɔb la maan si'el la ka' sidaa.” Tɔ! Israel nidiba kɛlisimi, man maan si'em la, sida kae anii? Ka' yanam tʋʋma la ka sida lɛɛ kae? 26 Pʋpiel ya'a bas pʋpielim tʋʋma ka pin'ili tʋm tʋʋmbɛ'ɛd, tʋʋmbɛ'ɛd kanɛ ka o tʋm la zug o na kpi. 27 Amaa bugusim sɔb ya'a bas bugusim tʋʋma, ka tʋm linɛ nar ka dɔl suor, o na faaɛn o nyɔvʋr. 28 On sadigim baŋ ye tʋʋm banɛ ka o tʋm la ka' sʋ'ʋm, ka o tiaki yii li ni la, o kʋ kpii, o na vʋe. 29 La'am nɛ wala Israel dim yɛl ye, “Zugsɔb la tʋʋma ka' sʋ'ʋm.” Israel nidiba, man suoya sid ka' sʋ'ʋm? Li lɛɛ ka'anɛ yanam suoya ka' sʋ'ʋm?
30 Alazug, Israel nidiba, man na kad sɔ' wʋsa saria ka li dɔlnɛ o tʋʋma. Zugsɔb onɛ an Paŋtita'ar Sɔb la pian'ʋkʋ la. Tiakimi! Basimi ya tʋʋmkisa la wʋsa; ka tʋʋmbɛ'ɛd da kɛ ka ya luu. 31 Basimi tʋʋm banɛ wʋsa ka ya tʋm ka li ka' sʋ'ʋm la ka paami sʋnf paal nɛ pʋtɛn'ɛpaal. Aa! Israel nidiba, bɔɔ kɛ ka ya ye ya kpi? 32 Sɔ' ya'a kpi li pʋ malis mam. Zugsɔb onɛ an Paŋtita'ar Sɔb la pian'ʋkʋ la. Tiakimi ka vʋe!