Abaarnama ayi' nɛ tiwanna la yɛla
17
1 Zugsɔb labaar da kɛɛn m san'an na ye, 2 Ninsaal biiga, bɔɔm siiliŋʋ siilim tis Israel dim la. 3 Yɛlimi ba ye Zugsɔb onɛ an Paŋtita'ar Sɔb la yɛl si'em nwa ye, Abaar tita'ari da bɛ, ka o kpʋkpama kpi'em ka o kɔnbid wa'am ka zu'oe ka pɔnri vɛnl hali. O da keŋ Lebanon teŋin na gban'e na'aziinr tiig wilkanɛ bɛɛ agɔla la, 4 ka kɔ'ɔgi li mɔri keŋ banɛ kpiisid teŋin la sɛ kpikpinkpinnib la paalʋ ni.5 Ka nɔki ya teŋ la bʋmbʋʋda sieba keŋ bʋd kʋ'ʋlʋm zin'ig. O da sɛɛ li wʋʋ gʋʋŋ nɛ kpi'el zin'ikanɛ ka ku'om zu'oe, 6 ka li busi tɔn wila, ka lieb tikanɛ wan ka yaarim-yaarim. Ka li wila la tɔɔn lɛbidi abaar la san'an, ka li nya'a la lɛɛ kpɛlimi li gbinnin. Alazug, li da tɔn wila sʋ'ʋŋa ka mɔr vaand bɛdegʋ.
7 Amaa abaar tita'asi'a mɛ da bɛ mɔr kpʋkpankpi'ema ka o kɔnbid zu'oe. Ka tiig la naan ban sɛɛ o zin'isi'a la tɔn nya'a lɛbid o baba, ka tɔɔn o wila lɛbisid o baba bɔɔd ku'om. 8 Ba da sɛɛ o nɛ kʋ'ʋlʋm zin'igi kpi'el zin'ikanɛ ka ku'om zu'oe, linɛ na kɛ ka o tɔn wila ka wal wala ka lieb titita'ar linɛ vɛnl hali.
9 “Yɛlimi ba ye, Zugsɔb onɛ an Paŋtita'ar Sɔb la bu'osi ba ye, ‘O na vʋ'ʋgɛɛ? Ba kʋ vuoɛn ka fanr o wala la ka o kʋdigɛɛ? Ba sid na vuoɛn! O wilpɔla banɛ tɔn la wʋsa na kʋdig, li ka' paŋ sɔb bɛɛ nidib bɛdegʋ na vuoɛn o nɛ o nya'a la wʋsa. 10 Ba ya'a lɛn sɛ o, o na vʋ'ʋgɛɛ? Saŋkan la nya'aŋ pɛbisʋg ya'a da'ae gɛɛl o, o kʋ kʋdig nyainnɛɛ? O kʋ kʋdig ban sɛ o ka o nɔbig zin'isi'a laa?’ ”
11 Zugsɔb la da lɛn yɛlim ye, 12 Bu'osim nimbanɛ ki'isidim la ye, Ya pʋ baŋ bʋmbama gbinnɛɛ? Yɛlimi ba ye, Babilon na'ab da keŋ Jerusalem gban'e Na'ab la nɛ o kpɛɛmnamɛ mɔri ba lɛb Babilon na. 13 Ka o gaŋ nid yinne onɛ yi na'adɔɔgin la na naal nɔɔr nɛ o ka kɛ ka o pɔ. O da lɛm gban'e teŋ la tuongatibi keŋ, 14 linɛ na kɛ ka sʋ'ʋlim la na lu ka kʋ lɛn zi'en ya'asɛ, ka gban'e ye nɔnaar la na kpɛn zi'e. 15 Amaa Na'ab la da zan'as o ka tʋm o nidib Egipt ye ba da' widi ka mɔr zabzabidib bɛdegʋ na. O ya'a na nyaŋɛ? Onɛ tʋm tʋʋm kaŋa la na pɔnsɛɛ? O na zan'as nɔnaar la ka pɔnsɛɛ?
16 Zugsɔb onɛ an Paŋtita'ar Sɔb la pɔ ya ye, O na kpi Babilon na'akanɛ diis o na'am la teŋin, on pɔ nɔɔr ka zan'as ka gban'e nɔnaar ka san'ami li la. 17 Saŋkan la Babilon dim ya'a kena gilig o tempʋʋg la ye ba zabi kʋ nidib bɛdegʋ, na'ab Faaro nɛ o zabzabidib bɛdegʋ la, kʋ nyaŋi sʋŋ o zaba la nii. 18 O da nɛ'ɛs nɔpɔɔr la nɛ ka san'am nɔnaar la. Ka on sadigim siak kaanbʋg la, ka lɛn sin ka tʋm nɛ'ɛnam wʋsa la o kʋ pɔnsɛ.
19 Alazug Zugsɔb onɛ an Paŋtita'ar Sɔb la ye, Asida sida m nɔpɔɔr kanɛ ka o zan'as la nɛ nɔnaar linɛ ka o san'am la, m na kɛ ka li luu o mɛŋ zugin na. 20 M na yadigi m bɛndig la ka li gban'e o, m na mɔr o kɛn Babilon na ka kad o saria ani, on ka' sida sɔbi tis mam la zug. 21 O zabzabidib banɛ zɔt la wʋsa na kpi, ka banɛ kpɛlim la na widig zin'ig wʋsa. Ka ya na baŋ ye man kanɛ an Zugsɔb la pian' ya.
22 “Zugsɔb onɛ an Paŋtita'ar Sɔb la ye, Mam mɛŋ na kɔ'ɔg na'aziinr tiig la willi sɛɛ li. M na kɔ'ɔg wilpɔl kanɛ bɛ zugin-zugin la sɛɛ li zuokanɛ dʋ ka mɔr kʋ'ʋlʋm la zug. 23 Israel zuor la zug ka m ye m sɛɛ li, li na tɔn wila ka wal wala ka kilim titita'ar. Niimis nɛ ba buudi wʋsa na tɛ tɛɛdi li zug, ka paam ma'asim li wila la ni. 24 Tibanɛ bɛ teŋ la zug wʋsa na baŋ ye man onɛ an Zugsɔb la kɛt ka tikanɛ wa'am liebid giŋa ka tikanɛ gim liebid tiwɔk. Manɛ kɛt ka tima'asir kʋdigid ka tikpi'euŋ liebid tima'asir.”
“Man kanɛ an Zugsɔb la pian', ka sid na maal ala.”