Jerusalem pʋ zi'e yim la yɛla
16
1 Zugsɔb la labaar da kɛɛn m san'an na ye, 2 Ninsaal biiga, yɛlim Jerusalem dimi ba tʋʋmkisa banɛ ka ba tʋm la yɛla 3 ka yɛli ba Zugsɔb onɛ an Paŋtita'ar Sɔb la yɛt Jerusalem si'em nwa: Ba da du'a fʋ yaanam nɛ Keenan teŋin; fʋ saam da anɛ Ammon nid ka fʋ ma an Hitti buudi. 4 Daakanɛ ka ba da du'af la ba da pʋ nwaae fʋ zanrɛ, bɛɛ sʋʋf ku'om ka fʋ na an nyain bɛɛ suoɛn fʋ niŋgbina nɛ yaarim bɛɛ kpaam, bɛɛ nɔk fuudi pili fɔ. 5 Sɔ' da pʋ zɔɔf nimbaanlig bɛɛ mɔr nyɔɔg nɛf hali ka na maal nɛ'ɛŋanamɛ tisi fɔ. Ba lɛɛ da basif nɛ paalʋ, bɔzugɔ daakanɛ ka ba da du'af la, ba da nɛ'ɛsif nɛ bas. 6 Ka m gat ka nyɛ fʋn digi fʋ ziimin la bilim, ka fʋn digi ani la ka m yɛlif ye, “Vʋe!” 7 Manɛ kɛ ka fʋ nɔbig wʋʋ tiig nɛ, fʋ nɔbignɛ hali vɛnl ka fʋ bin'isa lu ka fʋ zuobid nɔbig, amaa fʋ da nan kpɛn anɛ biel ka dig zaalim.8 “Lin nya'aŋ ka m lɛn gat ya'as ka nyɛ ka fʋ yʋ'ʋn nɔbigi siak li'ab la, ka m nɔki m fuug nɔɔri ligili fʋ nyan. Ka kaanbi zi'el, ka mɛ naal nɔnaar nɛf ka fʋ lieb man din. Zugsɔb onɛ an Paŋtita'ar Sɔb la pian'ʋkʋ la. 9 M da sʋʋf nɛ ku'om ka pie fʋ ziim la ka nɔk kpaam suonf. 10 M nɔk pien fuvɛnliŋi yɛɛlif, ka nɔk gbauŋ ta'ada pidif, ka nɔk fusʋŋi pilif, ka ligilif nɛ fubanɛ ligidi kpi'em. 11 Manɛ duorif nɛ baans nɛ niŋgɔnkɔris, 12 ka nɔk baŋi ga'ali fʋ nyɔɔr, ka ga'alif tʋblɛma ka nɔk zupibvɛnliŋi pili fʋ zug. 13 Alazug m da nɔknɛ sanlima nɛ anzurifa bɔbif. Fʋ fuud la da anɛ fusʋma nɛ banɛ ligidii kpi'em nɛ fubanɛ yalim. Fʋ diib da anɛ zɔm sʋŋ nɛ siind nɛ olif kpaam. Fʋ yʋ'ʋn vɛnlnɛ hali ka lieb pu'ana'ab. 14 Ka fʋ yʋ'ʋr tiig dunia wʋsa fʋ vɛnlim la zug, ka li anɛ la'abanɛ ka m tisif la kɛ ka fʋ nyɛ vɛnlim kan buudi.” Zugsɔb onɛ an Paŋtita'ar Sɔb la pian'ʋkʋ la.
15 “Amaa fʋ ti'enɛ fʋ vɛnlim la, ka fʋ yʋ'ʋr la kɛ ka fʋ lieb pu'agɔɔndir. Fʋ nɔki fʋ ya'amlɛogʋ niŋ onɛ wʋsa gati fʋ san'an, ka fʋ vɛnlim la an on sɔba din. 16 Fʋ yɛɛsi fʋ fuud la sieba bɔbi fʋ teŋgbana nɛ ba'ar maalʋg zin'is la ka li vɛnl, ka fʋ maannɛ fʋ pu'agɔɔndir tʋʋma ani. Tʋʋm bannam pʋ sʋ'ʋm ye li tʋmma, bɛɛ lɛn tʋm ya'asɛ. 17 Fʋ mɛ nɔk baŋ sʋma banɛ ka man nɔki m sanlim nɛ anzurifa sʋma maal la kud bada banɛ an dap, ka fʋn nɛ ban san'amid taaba. 18 Ka fʋ nɔki fʋ fuyalʋŋ la pili ba, ka nɔki m kpaam la nɛ bʋnnyubisa la nyu'oe tisi ba. 19 Ala mɛn, zɔm sʋŋ nɛ olif kpaam nɛ siind linɛ ka m tisif ye fʋ di la, fʋ nɔknɛ tisi ba ka li an bʋnnyubisa maannɛ ba tuon. Ala nɔɔ ka li da maal.” Zugsɔb onɛ an Paŋtita'ar Sɔb la pian'ʋkʋ la.
20 Fʋ nɔki fʋ biribis nɛ bipumis banɛ ka fʋ du'a tis mam la maal maannɛ tis bada la ka li aan ba diib. Fʋn da tʋm pu'agɔɔndir tʋʋma la lin pʋ siakɛɛ? 21 Fʋ kʋʋdi m biis la maan maannɛ tisid bada. 22 Fʋ tʋʋmkisa nɛ pu'agɔɔndir tʋʋm kanɛ ka fʋ tʋm la, fʋ pʋ tiɛn fʋ pu'asatimin yɛlaa, fʋn da an biel nɛ sawɛɛnri digi fʋ ziim la pʋʋgini bilim la.
23-24 Zugsɔb onɛ an Paŋtita'ar Sɔb la yɛl ye, “Tɔɔg na paaf! Fʋn mɛ maana zin'is nɛ teŋgbana teŋ la pʋʋgin zin'is wʋsa tisi fʋ mɛŋi paasi fʋ bugusim tʋʋma la zug,” 25 Tempʋʋg la suoya wʋsa zug fʋ mɛɛ fʋ teŋgbana ka li san'ami fʋ vɛnlim, ka nɔki fʋ niŋgbina la maan dian'ad tʋʋma amɛŋa tisid onɛ wʋsa gat. 26 Fʋ san'am Egipt dap, banɛ aan fʋ kpi'es banɛ ka fʋ mɔr kʋkɔma'asim nɛ ba ka li kɛ ka m sʋnf duoe nɛ fʋ dian'ad linɛ ka fʋ tʋm ka nan kpɛn ken tuonnɛ tʋm la. 27 Alazug m tiɛn m nu'ug ye m tisif tɔɔg ka bu'oe fʋ titɔndis la. M nɔki fʋ tisi fʋ dataas banɛ an Filistia dim pu'ayuos banɛ ka li da paki ba nɛ ban da nyɛ dian'ad tʋʋma linɛ ka fʋ da tʋm la. 28 Fʋ da dig nɛ Asiria dim la mɛn, bɔzugɔ fʋ da pʋ tigid si'el si'ela, la'am nɛ wala lin nya'aŋ la li da pʋ siaki fɔ. 29 Ka fʋ maligim paasi fʋ pu'agɔɔndir tʋʋma la hali ti paae Babilon dim banɛ an kpikpinkpinnib la, hali la'am nɛ wala li da pʋ tigi fɔ.
30 “Bɔ ka fʋ kʋ tun'e mɔri fʋ mɛŋa?” Zugsɔb onɛ an Paŋtita'ar Sɔb la pian'ʋkʋ la. Ka fʋ niŋid nɛ'ɛŋanam wʋsa wʋʋ pu'agɔɔndir onɛ pʋ zɔt nyannɛ! 31 Fʋ mɛɛ fʋ maana zin'is la zin'ig wʋsa tempʋʋg la suoya ni, ka maali fʋ dig zin'ig la paalʋ zin'ig wʋsa tempʋʋgin la, amaa fʋ da pʋ lɛn nwɛnɛ pu'agɔɔndirɛ, bɔzugɔ fʋ da pʋ di'esid yɔɔdɛ.
32 Fʋn kanɛ an pu'agɔɔndirɛ, fʋ nɔŋnɛ dap banɛ an saamme gati fʋ mɛŋ sid! 33 Pu'agɔɔndir wʋsa di'esid yɔɔd, amaa fʋn lɛɛ tisid banɛ dig nɛf la piini, ka da'adi ba zin'ig wʋsa ye ba kena digin nɛf. 34 Pu'agɔɔnda la sʋʋgin fʋ bɛ nɛ fʋ kɔn' nɛ fʋ taaba; sɔ' pʋ zɔti dɔllif ye o nɔk o mɛŋi la'as nɛ fɔ. Fʋ bɛ nɛ fʋ kɔn', fʋnɛ lɛɛ yɔɔd ka sɔ' pʋ yɔɔdi tisidi fɔ.
35 Alazug pu'agɔɔndirɛɛ, wʋm Zugsɔb la labaar! 36 Zugsɔb onɛ an Paŋtita'ar Sɔb la yɛl ye, Fʋ yisi fʋ arezak ka yisi fʋ nyan paalʋ fʋ dian'ad tʋʋma nɛ banɛ dɔllif la ni, nɛ fʋ wina banɛ ka man kisi ba la, nɛ fʋn nɔki fʋ biis ziim tisi ba la zug, 37 m ye m la'as nɛ banɛ wʋsa ka fʋ nɔŋ ka dit malisim nɛ ba la nɛ banɛ ka fʋ kis la. M na la'asi ba wʋsa na ka ba kisigif, ka yɛɛsi fʋ la'adi ba tuon ka ba na nyɛɛ fʋ nyan. 38 M na kɛ ka fʋ nyɛ namisʋg wʋʋ pu'a banɛ san'am dap nɛ banɛ kʋʋd nidib namisʋgʋ an si'em la. M na kɛ ka ninkʋʋr tɔɔg nɛ m sʋnf duor namisʋg la sigi fʋ zugin na, 39 ka m yʋ'ʋn nɔki fʋ tis banɛ dig nɛf la ka ba na san'ami fʋ bada nɛ fʋ teŋgbana la. Ba na yɛɛsi fʋ fuud la ka yisi fʋ baans nɛ niŋgɔnkɔrsʋma la ka basif biel. 40 Ba na la'as nidib na ka ba zab nɛf, ba na lɔbif nɛ kuga ka nɔki ba sʋ'ʋsi ki'e fʋ bɛnnim-bɛnnim. 41 Ba na nyɔ'ɔ fʋ ya' la, ka kɛ ka fʋ nyɛ tɔɔg pu'ab bɛdegʋ tuon. M na kɛ ka fʋ bas pu'agɔɔndir tʋʋma, ka fʋ mɛ kʋ lɛn yɔ banɛ dig nɛf la. 42 Ka lin na kɛ ka m sʋnfʋ duoe nɛf si'em la ma'ae, ka m fufum la kʋ lɛn dɔlli fɔ. M na an baanlimm ka m sʋnf kʋ lɛn duoe ya'asɛ.
43 Fʋn pʋ tiɛn man tʋm si'eli tisi fʋ, fʋ pu'asatim saŋa, amaa ka duodi m sʋʋnr nɛ yɛlbama la, m na ba'asi kɛ ka fʋn tʋm si'el la lɛbi fʋ mɛŋ zugin na. Zugsɔb onɛ an Paŋtita'ar Sɔb la pian'ʋkʋ la. Fʋ pʋ zaŋ nyamisi paas tʋʋmkisa banɛ ka fʋ pʋn tʋm la zugɔɔ?
44 Onɛ wʋsa siilim siilima na siilim siiliŋ kaŋa fʋ yɛla ye, “O maa an si'em la, bipuŋ la mɛ anɛ ala.” 45 Fʋ sid anɛ fʋ ma bipuŋ amɛŋa, onɛ nɛ'ɛsi o sid nɛ o biis; fʋ bier nɛ fʋ pitʋ la sid anɛ fʋ mabiis; bam mɛ nɛ'ɛsi ba sidib nɛ ba biis. Fʋ ma da anɛ Hitti buudi ka fʋ saam an Ammon buudi. 46 Fʋ bieri da an Samaria onɛ da zin' kpi'e nɛf ya-datiuŋ baba la, ka fʋ pitʋ mɛ an Sodom onɛ bɛ ya-dagɔbʋg baba nɛ o bipumis la. 47 Fʋ pʋ dɔlli ba suoya ka tu'asidi ba tʋʋmyaalis la ma'aanɛ, amaa fʋ si'el wʋsa pʋʋgin fʋ yʋ'ʋn tʋm tʋʋmyɔɔdi gati ba. 48 Zugsɔb onɛ an Paŋtita'ar Sɔb la yɛl si'eli nwa, Asida sida ka m yɛt ye fʋ pitʋ Sodom nɛ o pu'ayuos la pʋ tʋm wʋʋ fʋn nɛ fʋ bipumisi tʋm si'em la.
49 Tʋʋmbɛ'ɛd banɛ ka fʋ pitʋ Sodom nɛ o pu'ayuos la da tʋm anɛ tita'alim ka an dindiisnam nɛ haya dim. Ba da pʋ sʋŋid tadimnam nɛ nɔŋ dim la. 50 Ba da anɛ nyɛɛsim dim ka tʋm tʋʋmkisa man tuon. Alazug ka m san'ami ba wʋʋ fʋn nyɛ si'em la. 51 Samaria da pʋ tʋm tʋʋmbɛ'ɛd kanɛ ka fʋ tʋm la pʋsʋkɔ, fʋ tʋm tʋʋmfɛn'ɛsa gaadi ba, ka kɛ ka fʋ bier nɛ fʋ pitʋ la an wʋʋ ba anɛ pʋpielim dim ka li anɛ fʋn tʋm tʋʋm sieba la zug. 52 Ziimi fʋ mɛŋ nyan, bɔzugɔ fʋn maal si'el la kɛ ka li nwɛnɛ fʋ bier nɛ fʋ pitʋ mɔr bʋʋd. Fʋ tʋʋmbɛ'ɛd la da zu'oe gaadi ba din la, ka li nwɛnɛ banɛ an pʋpielnamɛ gaad fʋn. Alazug kɛl ka nyan gban'af ka fʋ zii fʋ mɛŋ nyan, bɔzugɔ fʋ kɛ ka fʋ bier nɛ fʋ pitʋ la nwɛnɛ ba anɛ pʋpielim dim.
53 La'am nɛ wala m na lɛn kɛ ka Sodom nɛ Samaria dim lɛm paami ba zusʋŋ la ya'as, ka fʋ zusʋŋ la mɛ na dɔlli ba. 54 Ka li kɛ ka fʋ zii fʋ nyan la ka nyan gban'af, nɛ bʋmbanɛ wʋsa ka fʋ maal ye li malisi ba la. 55 Ka Sodom nɛ Samaria dim na lɛbi an ban da an si'em la, ka fʋn nɛ fʋ nidib mɛ na lɛbi an wʋʋ yanamɛ da an si'em la. 56-57 Saŋkanɛ ka fʋ tʋʋmbɛ'ɛd la da nam pʋ yi paalʋ na la, fʋ da pʋ siakid ye fʋ pʋdig Sodom yʋ'ʋrɛ, dabiskanɛ ka fʋ da mɔr nyɛɛsim la. Nannanna Edom nidib yʋ'ʋn la'adif nɛ ba kpi'es wʋsa nɛ Filistia dim wʋsa, nɛ banɛ wʋsa giligif la nɛ'ɛsidif nɛ. 58 Fʋn pʋ dɔl wadaa ka tʋm tʋʋmkisa la, li na lɛbi fʋ mɛŋ zugin na. Zugsɔb la pian'ʋkʋ la.
59 Zugsɔb onɛ an Paŋtita'ar Sɔb la yɛl ye, “M na tʋmif wʋʋ lin nar si'em, bɔzugɔ mam nɛ fʋ maal nɔnaar si'a la fʋ san'ami li bas. 60 La'am nɛ wala m na tiɛn nɔnaar kanɛ ka m da naal nɛf fʋ pu'asatim saŋa la, ka na kɛ ka nɔnaar la zi'en saŋa kanɛ ka' naarɛ. 61 Fʋ ya'a ti di'e fʋ mabiis la, fʋ na tiɛn fʋ suoya la yɛla ka nyan gban'af. Fʋ sid na di'e ba, banɛ kpɛmmif nɛ banɛ pʋ kpɛmmif la wʋsa. M na nɔki ba tisif ka ba nwɛnɛ fʋ bipumis nɛ, ka lin lɛɛ pʋ dɔl nɛ nɔnaar kanɛ ka m naal nɛf laa. 62 Alazug man nɛ fʋn nɔnaar la na zi'en ka fʋ baŋ ye manɛ an Zugsɔb la. 63 Ka m ya'a maal suguru ka bas tʋʋmbɛ'ɛbanɛ wʋsa ka fʋ tʋm la, fʋ na tiɛn ka nyan gban'af, ka fʋ kʋ lɛn ya'ae nɔɔr ya'asɛ ka li anɛ nyan zug.” Zugsɔb onɛ an Paŋtita'ar Sɔb la pian'ʋkʋ la.