Winsɔsʋg linɛ bɔɔd sʋŋir Wina'am san'an ye ba nyaŋ dataas
108
1 M ya'am gban'e nɛ kiŋ-kiŋ, O Wina'am;m na yʋ'ʋm yʋʋma zun'ʋf nɛ m sʋnf wʋsa.
2 Duomi, yanam banɛ nwɛ'ɛd kɔna nɛ duundis la!
M na duoe bɛkɛung asuba yʋ'ʋm yʋʋma.
3 O Zugsɔba, m na dʋ'ʋsi fʋ yʋ'ʋr tɛɛns la sʋʋgin;
ka yʋ'ʋmmi fʋ yɛla nidib buudi wʋsa sʋʋgin.
4 Fʋ nɔŋilim la zu'onɛ, li wa'ami gaad saŋgbana la;
ka fʋ sida la dʋʋ paae agɔla.
5 O Wina'am, kɛl ka fʋ yʋ'ʋr la dʋʋ paae saŋgbana;
ka fʋ na'am pipilim la pɛ'ɛl teŋgbauŋ la wʋsa.
6 Faanmi ti ka sʋŋi ti nɛ fʋ paŋ la,
ka ala ka banɛ ka fʋ nɔŋ la na paam yɔlisim.
7 Wina'am naan o zin'ikanɛ an kasi la nii pian' ye,
“M na pʋdig Sekɛm teŋ la nɛ paŋ
ka mak Sukot Bɔn'ɔg la.
8 Gilead teŋgbauŋ la anɛ m din,
ka Manase sʋ'ʋlim mɛ aan m din:
Efiram anɛ m tanp zupibig,
ka Juda aan m na'am dansaar.
9 Moab anɛ lakanɛ ka m mɔri piesid,
ka Edom aan m ta'ada digilʋg zin'ig
Filistia ka m tansid,
man nyaŋi ba la yɛla.”
10 Anɔ'ɔnɛ na mɔrimi kpɛn' tempʋkanɛ kpi'em la ni?
Anɔ'ɔnɛ na ta'asim Edom teŋinɛ?
11 Li ka' fʋnɛɛ, O Wina'am?
Ka' fʋnɛ zan'asi ti
ka pʋ lɛn dɔlli ti soogianamɛ yit tanp laa?
12 Sʋŋimi tii zab nɛ ti dataas la,
ka ninsaal sʋŋir ka' gbinnɛ.
13 Nɛ Wina'am paŋa ti na nyaŋ,
bɔzugɔ, o na nɔɔ ti dataas la digil teŋin.