GBAUŊ KANƐ PAAS ANU
Yʋʋma 107-150
Pʋ'ʋsimi Wina'am bareka on an sʋm la zug
107
1 Pʋ'ʋsimi Zugsɔb la bareka on an sʋm la zug;o nɔŋilim la bɛ nɛ saŋa linɛ ka' bɛnnɛ.
2 Kɛl ka banɛ ka Zugsɔb faaɛn ba la yɛl nɛ'ɛŋa,
banɛ ka Zugsɔb faaɛn ba, ba bi'emnam nu'usin la,
3 banɛ ka o la'asi ba yi tɛɛns banɛ bɛ ya-nya'aŋ nɛ ya-tuona,
nɛ banɛ bɛ ya-dagɔbʋg nɛ ya-datiuŋ la.
Banɛ giligid mɔɔgin yɛla
4 Ba sieba da giligid mɔɔgin,
ka pʋ nyɛ suori na keŋ tempʋʋgini zin'inɛ.
5 Kɔ'ɔm nɛ ku'onuud da mɔri ba,
ka ba vʋm ti'ir lɛn kae.
6 Ani ka ba kaasi tis Zugsɔb ban bɛ yɛla ni la zug,
ka o yisi ba namisʋg la pʋʋgin.
7 O da mɔri ba dɔl suokanɛ kpa' sappi
keŋ tempʋkanɛ ka ba na zin'in.
8 Kɛl ka ba tis Zugsɔb la bareka pʋ'ʋsim
o nɔŋilim linɛ ka' naar la yɛla
nɛ o tʋʋmnyalima la wʋsa zug.
9 Banɛ ka ku'onuud mɔri ba la, o tisi ba ku'om
ka diis banɛ kɔ'ɔm zabid la disʋma.
Banɛ namisid la yɛla
10 Sieba da bɛ nɛ lik nɛ sʋnsa'aŋ tita'ar pʋʋgin,
namisid sanrega ni ka ba lɔɔ ba nɛ bana,
11 ban zan'as Wina'am pian'ad
ka nɛ'ɛs Onɛ Gaad Si'el wʋsa sa'alʋg la zug.
12 Ala ka o kɛ ka ba tʋm tʋʋm tɔɔg,
kennɛ tu'usidi lit, ka sɔ' kae na faaɛn baa.
13 Ani ka ba kaasi tis Zugsɔb ban bɛ yɛla ni la zug,
ka o yisi ba namisʋg la pʋʋgin.
14 O mɔri baa yis lik nɛ sʋnsa'aŋ tita'ar la pʋʋgin
ka kɛnsi ba bana la.
15 Kɛl ka ba tis Zugsɔb la bareka pʋ'ʋsim
o nɔŋilim linɛ ka' naar la yɛla
nɛ o tʋʋmnyalima la wʋsa zug.
16 O kɔ' kʋntzɛn'ug gama la
ka kɔ'ɔgi li kʋnt daad la.
17 Sieba da lieb zɔnnɛ ba zan'asʋg suoya la ni,
ka namis hali, ba tʋʋmbɛ'ɛd la zug.
18 Ba da kisig diib wʋsa
ka yʋ'ʋn li'el kum za'anɔɔrin.
19 Ani ka ba kaasi tis Zugsɔb ban bɛ yɛla ni la zug,
ka o yisi ba namisʋg la pʋʋgin.
20 O da tʋm o labaar na ka li tisi ba laafi;
o da faaɛn ba yis yaʋgʋn.
21 Kɛl ka ba tis Zugsɔb la bareka pʋ'ʋsim
o nɔŋilim linɛ ka' naar la yɛla
nɛ o tʋʋmnyalima la wʋsa zug.
22 Kɛl ka ba maal maana tis o bareka pʋ'ʋsim
ka mɔɔl o tʋʋma la yɛla nɛ sumalisim yʋʋma.
Banɛ tʋm atɛukʋn tʋʋma la yɛla
23 Sieba da yii keŋi atɛukʋn nɛ anrima;
ba da anɛ banɛ kpiisid ku'otita'arin la.
24 Ba da nyɛ Zugsɔb la tʋʋma,
ka gɔs o tʋʋmnyalima ku'ozuluŋin la.
25 O da pian' ya ka atɛuk ku'om gudig
ka ʋkid ku'opila agɔla.
26 Ku'opila la mɔri ba dʋ'ʋsid agɔla
ka lɛbisidi sigid ku'ozuluŋin la;
lin paki ba la, ka ba ya'am bɔdig.
27 Ba da tu'usid ka gɛridi nwɛnɛ danuudib nɛ;
ka ba ti'ir wʋsa naae.
28 Ani ka ba kaasi tis Zugsɔb ban bɛ yɛla ni la zug,
ka o yisi ba namisʋg la pʋʋgin.
29 O da kɛ ka ku'opila la fɔn baanlimm;
ka ma'ae sisi'em la ka li gu'oe.
30 Lin da niŋ baanlimm la ba sʋnf da ma'ae ya,
ka o mɔri ba keŋi ba ya'am m bɔɔd zin'isi'a.
31 Kɛl ka ba tis Zugsɔb la bareka pʋ'ʋsim
o nɔŋilim linɛ ka' naar la yɛla
nɛ o tʋʋmnyalima la wʋsa zug.
32 Kɛl ka ba dʋ'ʋs o, nidib la la'asʋg sʋʋgin,
ka zun'e o, kpɛɛmnamɛ nwɛ'ɛd taaba sɔɔra zin'isi'a la.
Tʋbtɛkir nɛ faangir yɛla
33 O kɛ ka kɔldaad lieb pipiris,
ka ku'om daa ɛɛnti tansid zin'isi'a la kʋdig bar-bar,
34 ka teŋ kanɛ daa maan zʋʋd la lieb yaarim zin'ig,
ka li anɛ banɛ bɛɛ ani la bugusim zug.
35 O mɛ tiak pipiris ka li lieb bɛɛnna
ka zin'ikanɛ da kʋdigi ga'aŋ la tansid ku'om pʋbid;
36 o da mɔr banɛ kɔ'ɔm zabid la kena ye ba bɛɛ ani
ka mɛ' tempʋkanɛ ka ba na bɛ.
37 Ba da kua pɔɔd ka sɛ tiwanna
ka bʋn zʋʋd bɛdegʋ.
38 O da niŋ o nidib la zug bareka,
ka ba nɔbig ka ba kal zu'oe,
o mɛ da pʋ kɛ ka ba niigi la kal sie.
39 Ka mugusʋg nɛ tɔɔg nɛ namisʋg
paae ba, ka ba kal sie.
40 Ka o kɛ ka kpi'em banɛ daa namisidi ba la di nyan
ka gin mɔɔgin yɔri-yɔri.
41 Amaa o da yis fara dim namisʋg pʋʋgin
ka kɛ ka ba nɔbig wʋʋ bʋnkɔnbid nɛ.
42 Banɛ bɛllim dɔl suor la nyɛɛ li ka maal sumalisim,
amaa ka nimbɛ'ɛdnam on fɔɔn ba nɔɔr baanlimm.
43 Kɛl ka onɛ wʋsa mɔr ya'am kɛlis nɛ'ɛnam
ka tɛn'ɛs Zugsɔb la nɔŋilim zu'oe si'em.