Zugsɔba tɛnri m yɛla
106
1 Zun'omi Zugsɔb la, haleluya!Pʋ'ʋsimi Zugsɔb la bareka on an sʋm la zug;
o nɔŋilim la bɛ nɛ saŋa linɛ ka' bɛnnɛ.
2 Anɔ'ɔn na nyaŋi mɔɔl Zugsɔb tʋʋm titada la yɛla
bɛɛ pa'al o zun'ori an si'em wʋsa?
3 Wina'am bareka bɛ nɛ banɛ dɔl sida la,
ka tʋm linɛ an sʋm saŋa wʋsa la.
4 Tɛnri m yɛla, Zugsɔbaa, fʋ ya'a ti sʋŋidi fʋ nidib la saŋsi'a,
fʋ ya'a ti ye fʋ faaɛn fʋ nidib la fʋn faanm.
5 Ka m mɛ la'am di bareka nɛ banɛ ka fʋ gaŋ la,
ka mɛ di malisim fʋ nidib la san'an
ka naal nɛ banɛ an fʋ faar la zun'ʋf.
Egipt teŋin yɛla
6 Ti tʋm tʋʋmbɛ'ɛd wʋʋ ti yaanamɛ da niŋ si'em la;
ti pɔ'ɔg ya ka tʋm bugusim tʋʋma.
7 Ti yaanamɛ da bɛ Egipt la,
ba da pʋ tɛn'ɛsi fʋ tʋʋmnyalima la yɛlaa;
ba da pʋ tiɛn fʋn maali ba sʋm si'em la
amaa ka zan'asi fʋ nɔɔr Atɛuk Zɛn'ugʋn la.
8 La'am nɛ wala, o da faaɛn ba o yʋ'ʋr zug,
ye o kɛ ka ba baŋ o paŋ tita'ar la.
9 O da tans Atɛuk Zɛn'ug la ka li kʋdig;
ka mɔri ti yaanam la dɔlli gaad ka li nwɛnɛ pipirig nɛ.
10 O da faaɛn ba yisi ba bi'emnam la nu'usin;
ka yisi ba, ba dataas la san'anɛ tisi ba yɔlisim.
11 Amaa ku'om da pili ba dataas la;
ka ba nid baa yinne pʋ tiligɛ.
12 Ani ka ba niŋ o kaanbʋg la yadda
ka yʋ'ʋm yʋʋma zun'e o.
Pipirigin yɛla
13 Amaa li da pʋ yuugɛ ka ba tam on maal si'el la
ka pʋ lɛn kɛlis o sa'alʋgɔ.
14 Kʋkɔma'asim da mɔri ba sian'arin la;
ka ba mak Wina'am ani.
15 Ala ka o da tisi ba ban sɔs si'el la,
amaa ka kɛ ka ban'abɛ'ɛd gban'e ba.
16 Ba la'asʋg la zin'igin, ba da bɛn'ɛd fufum nɛ Moses
nɛ Aaron onɛ ka Zugsɔb gaŋ la.
17 Teŋ la da ya'ae li nɔɔrɛ vɔl Datan;
ka mum Abiram nidib la wʋsa.
18 Bugum da li ba nya'andɔlib la sʋʋgin;
ka kanb bugusnam la.
19 Horeb zuorin la ba da maal na'abil
ka pʋ'ʋsid ba'ar linɛ ka ba mɛŋ maal.
20 Ba tiaki ba Wina'am na'am pipilim la
tis na'abil, onɛ ɔnbid mɔɔd la.
21 Ba tam Wina'am kanɛ faaɛn ba la yɛla,
la'am nɛ on da tʋm yɛltitada Egipt teŋgbauŋʋn la,
22 ka tʋm nyalima Ham dim teŋin
nɛ yɛlpakir Atɛuk Zɛn'ugʋn la.
23 Ala ka o yɛl ye o na san'ami ba wʋsa,
ka li ya'a ka'anɛ Moses sɔsʋgɔ o naan niŋin ala;
amaa o tʋmtʋm Moses, onɛ ka o gaŋ la,
da zi'enɛ o tuonnɛ vi' o sʋnpɛɛn la
ka o pʋ san'ami baa.
Ba da nɛ'ɛs teŋ sʋŋ la
24 Ani ka ba da nɛ'ɛs teŋ sʋŋ la:
ba da pʋ niŋ linɛ ka o kaanbi zi'el la yaddaa.
25 Ba da bɛɛ ba sʋga ni nyɔn,
ka pʋ siak Zugsɔb la nɔɔrɛ.
26 Ala ka o pɔ nɛ o paŋ tita'ar la
ye o na kɛ ka ba kpi mɔɔgin la,
27 ka widigi ba yaasi kpɛn'ɛs teŋ zʋna ni
ka ba kpii ani.
Peor nɛ Meriba tɛɛnsin yɛla
28 Ba da la'asi dɔl Baal teŋgban linɛ bɛ Peor teŋin la
ka di maana diib linɛ ka ba maali tis wina banɛ pʋ vʋeya;
29 ba tʋʋmbɛ'ɛd la da duoe Zugsɔb la sʋʋnr,
ka ban'abɛ'ɛd lii ba sʋʋgin.
30 Amaa Finehas da duoe zi'enɛ nwɛ' nu'ug la zug,
ka ban'as la basi ba.
31 Nɛ'ɛŋa da kɛ ka ba yɛl ye o anɛ pʋpielim sɔbi
tis zʋmaana banɛ na ti duoe na.
32 Meriba ku'om zin'igin la ba kɛ ka Zugsɔb la sʋʋnr pɛlig,
ka yɛla paae Moses ka li anɛ ban zug;
33 bɔzugɔ ba da kɛ ka o sʋnf pɛlig,
ka pian'ayɔɔd yi o nɔɔrin na.
Keenan teŋin yɛla
34 Ba da pʋ kʋ teŋ la nidib
wʋʋ Zugsɔb la yɛl si'em laa,
35 amaa ba da la'asi nɛ tɛɛns nwa nidib
ka di'e ba malima dɔl.
36 Ba maannɛ ba bada la,
ka li an bɛndigʋ bɛndi ba.
37 Ba da nɔki ba biribis nɛ bipumisi
maal maana tis kikiris.
38 Ba da kʋʋ ba, la'am nɛ ban pʋ tʋm bɛ'ɛd la,
ba biribis nɛ bipumis ka ba da kʋ,
ba da nɔki ba maal maana tis Keenan bada la,
ka ba ziim la kɛ ka teŋ la lieb dian'ad.
39 Ba da dian'a ba mɛŋ nɛ ban maal si'el la;
ba tʋʋma la da kɛ ka ba nwɛnɛ pu'agɔɔnda.
40 Linɛ da kɛ ka Zugsɔb la sʋnf duoe nɛ o nidib la
ka o kisig banɛ aan o faar la.
41 O da nɔki baa tis teŋ zʋna nidib,
ka kɛ ka ba bi'emnam sʋ'oe ba.
42 Ba dataas da mugusi ba
ka ba kɔ'ɔŋ paŋ ka bɛɛ ba nu'usin.
43 O yisi ba nɔɔr babiga
amaa ka ba zan'as ka nan kpɛn zan'asid o nɔɔr
ka ba tʋʋmbɛ'ɛd la san'ami ba.
Zugsɔb onɛ aan ti Wina'am, faanmi ti,
44 Amaa ban da kaasi tis o la
o da kpansi nyɛɛ ba namisʋg;
45 ban zug ka o da tiɛn o nɔnaar la yɛla
ka o nɔŋilim tita'ar la zug ka o da lɛb nya'aŋ.
46 O da kɛ ka banɛ gban'e ba ka ba an yammis la wʋsa
zɔɔ ba nimbaanlig.
47 Faanmi ti, Zugsɔb onɛ aan ti Wina'am,
ka la'asi ti tɛɛnsin la na
ka ti na tisi fʋ yʋ'ʋr kanɛ an kasi la bareka pʋ'ʋsim
ka zun'e fʋ na'am la.
48 Zun'or anɛ Zugsɔb la din, onɛ an Israel Wina'am la,
lin yi nannanna nɛ saŋa linɛ ka' bɛnnɛ.
Kɛl ka nidib la zan' yɛl ye, Ami!
Zun'omi Zugsɔb la, haleluya!