Zun'omi Zugsɔb la o tʋʋmnyalima la yɛla
105
1 Pʋ'ʋsimi Zugsɔb la bareka, buolim o yʋ'ʋr;kɛl ka tɛɛns la wʋsa baŋ on maal si'el.
2 Yʋ'ʋm tis o, yʋ'ʋm zun'e o;
mɔɔlim o tʋʋmnyalima la wʋsa.
3 Maalim sumalisim Zugsɔb la yʋ'ʋrin;
kɛl ka banɛ ieed Zugsɔb la wʋsa maal sumalisim.
4 Gɔsimi Zugsɔb nɛ o paŋ la;
ieminɛ o zin'ig saŋa wʋsa.
5-6 Yanam Abraham yaas banɛ aan o tʋmtʋmnib,
nɛ Jakob yaas banɛ ka o gaŋ la,
tɛnri nyalima banɛ ka o maal la yɛla,
nɛ tʋʋm kilima banɛ ka o da tʋm nɛ on kat saria si'em la.
7 Onɛ aan ti Zugsɔb Wina'am;
ka o sariakadib bɛ dunia wʋsa ni.
8 O tɛnri o nɔnaar la yɛla saŋa wʋsa,
nɛ o pian'ʋk linɛ ka o tis zʋmaana tusir nidib la
9 nɔnaar linɛ ka o da naalim nɛ Abraham,
nɛ on pɔɔ zi'el si'eli tis Isaak la.
10 O da maligim tiɛn li tis Jakob ye li aan o nɔzi'elʋg,
ka tiɛn li pa'al Israel ka li an nɔnaar yʋma linɛ ka' bɛn ye,
11 “Fʋn ka m ye m nɔk Keenan teŋ la tis
ka li liebi fʋ faar.”
12 O da yɛl nɛ' nɛ saŋkanɛ ka ba kal da nam pʋ zu'oe la;
sida, ba da pɔɔd ka mɛ an saam teŋin la.
13 Ba da gɔɔndi giligid teŋ-teŋ,
yit sʋ'ʋlim yinne ken sʋ'ʋlim yinne ni.
14 O da pʋ kɛ ka sɔ' mugusi baa;
ba yɛla ka o da zɛrig na'anam, ka yɛli ba ye,
15 “Mid ka ya si'is onɛ ka m gaŋ la;
da niŋi m nɔdi'esidib la si'ela.”
Josef yɛla
16 O da kɛ ka kɔ'ɔm li teŋin la
ka san'ami ba diib wʋsa;
17 ka nɔk dau sɔ' onɛ yʋ'ʋri buon Josef,
ka ba kuos o tis ka o lieb yammʋg.
18 Ba da ba'a o nɔba nɛ bana,
ka kɔl o niŋgɔɔnr nɛ kʋnt,
19 hali ti paae saŋkanɛ ka on da yɛl si'el la niŋ amɛŋa,
ka Zugsɔb la pian'ad pa'al ye on yɛl si'el la anɛ sida.
20 Na'ab la da tʋm ya ka ba yis o na,
na'akanɛ da sʋ'oe tɛɛns bɛdegʋ la da tis o yɔlisim.
21 O da kɛ ka o lieb o yir la wʋsa kpɛɛm,
ka sʋ'oe o la'ad la wʋsa,
22 ka o mɔr paŋi na sa'al kpɛɛmnam la
ka mɔr o ya'am la pa'an na'ayikpɛm la.
Moses yɛla
23 Israel da bɛ nɛ Egipt teŋin la,
Jakob da anɛ saanne bɛ Ham teŋin.
24 Zugsɔb la da kɛ ka ba nɔbigi zu'oe;
ka kɛ ka ba mɔr paŋi gati ba bi'emnam.
25 O da kɛ ka Egipt dim la tuligi kis o nidib la,
ka maannɛ ba bɛ'ɛd.
26 O da tʋm Moses onɛ aan o tʋmtʋm la
nɛ Aaron onɛ ka o gaŋ la.
27 Ba da tʋm nyalima ka li aan o zanbina nidib la sʋʋgin,
ka tʋm o kilima tʋʋma Ham teŋin.
28 Ban da pʋ siak o nɔɔr la zug
ka o tʋm liki ba teŋin la na.
29 O da kɛ ka ba ku'om kilim ziim,
ka li kɛ ka ba zimi kpi.
30 Ba teŋ la da pɛ'ɛl nɛ lɔmis,
ka ba kpɛn'ɛdi ba na'anam la dɔɔdin.
31 O da pian' ya ka pʋmpɔɔs nɛ dumis wiaki
pɛ'ɛl teŋ la wʋsa.
32 O da kɛ ka saa niid sakuga
nɛ sa-ian'asʋg teŋ la wʋsa ni;
33 o da san'ami ba daam nɛ kekama tiis
ka kɔɔ ba tibanɛ bɛ teŋin la wʋsa bas.
34 O da pian' ya ka na'azɔmnam yina,
sisɔma mɛ da yina ka' bɛnnɛ
35 ɔnb linɛ mɔr vaand wʋsa teŋin la,
ka ɔnbi ba teŋ la zʋʋd wʋsa.
36 Ani ka o lɛn kʋ bikpɛɛmnam wʋsa teŋin la,
o da kʋ yir wʋsa bikpɛɛm.
37 Li nya'aŋ ka o da yis Israel dim, ka ba ziid anzurifa nɛ sanlima,
ka ba buudi la ni, sɔ' da kae an tadim.
38 Ban da yi la, Egipt dim sʋnf da ma'ae ya,
bɔzugɔ Israel dim la dabiem da kpɛn' ba.
39 O da yadig saŋgbana lusi ba,
ka kɛ ka bugum bɛ yʋ'ʋŋʋ tisidi ba nɛɛsim.
40 Ba da sɔs diib ka o tisi ba kɔdis
ka ba lɛn di arezana ni diibi tig.
41 O da yɔ'ɔg tampiing ka ku'om yina
nwɛnɛ kɔldaug nɛ pʋbid sian'arin la.
42 Bɔzugɔ o da tiɛn o kaanbʋg linɛ an kasi
ka o da tis Abraham la.
43 O da mɔr o nidibi yina nɛ sumalisim,
banɛ ka o da gaŋ la yina maan sumalisim.
44 O da tisi ba buudbanɛ bɛɛ ani la tɛɛns
ka ba di faar linɛ ka sieba namisi li yɛla,
45 ye li kɛ ka ba siak o nɔzi'elʋg
ka dɔl o wada la wʋsa.
Zun'omi Zugsɔb la, haleluya!