M na zun'e Zugsɔb onɛ maal si'el wʋsa la
104
1 Zun'om Zugsɔb la, m siigaa!O m Zugsɔb Wina'am, fʋ anɛ gandaug!
Sida nɛ na'am paŋ ma'aa giligif.
2 O nɔk nɛɛsim m pil o mɛŋ wʋʋ fuug nɛ
ka yadig saŋgbana wʋʋ tapooli nɛ,
3 ka mɛɛ o yiri sʋn'ʋl ku'om linɛ bɛ agɔla la zug.
Saŋgbana ka o maal o zaba tɛrekonam
ka ban'ad sisi'em ian'adi ken.
4 O kɛ ka o maliaknam la an wʋʋ pɛbisim nɛ ka o tʋmmi ba,
ka bugum pielim aan o tʋmtʋmnib.
5 O da ɛɛnb dunia ɛɛnbir ka li zi'e kiŋ-kiŋ
ka kʋ vurig hali baa bi'elaa.
6 Fʋ da nɔk ku'ozuluŋʋ pil teŋgbauŋ la wʋʋ fuug nɛ;
ka li lim zuoya la wʋsa.
7 Amaa fʋ tansʋg da kɛ ka ku'om la zɔ:
ban wʋmi fʋ tansʋg la ka zɔ hali;
8 ku'om la pʋbid zuoya la ni sigid bɔn'ɔdin
ken zin'ikanɛ ka fʋ tis nɔɔr ye li keŋ la.
9 Fʋ digil titɔndig ka li kʋ nyaŋi lɔ'ɔŋɛ;
ka mɛ kʋ lɛn nyaŋi pʋbigi di teŋgbauŋ la ya'asɛ.
10 O kɛya ka ku'om tansidi yit na zɔti sigid bɔn'ɔdin;
li pʋbid zuoya la teŋsʋk.
11 Ka sian'arin bʋnkɔnbid paamid ku'om nuud;
ani ka sian'arin bʋmis kati ba ku'onuud.
12 Niis banɛ ian'ad agɔla la tɛɛdi ba tɛɛd ku'om la baba;
ka zu'oe tiis wila ni.
13 O bɛ nɛ o yin agɔla ka dɔn'ɔsid zuoya la;
ka teŋgbauŋ sʋnf ma'ae nɛ o tʋʋma la.
14 O kɛ ka yaama yiti tisid niigi,
ka zʋʋd bɛ ka ninsaalib kuod
ka diib yit teŋin na.
15 Li tisid daam linɛ kɛt ka ninsaal sʋʋnr ma'ad,
nɛ kpaam ka o nindaa nyɛɛn,
ka diib tɔ'ɔŋid o giinla.
16 Zugsɔb tiis la nyɛt dɔn'ɔsʋg sʋ'ʋŋa,
tibanɛ ka o sɛɛ ba Lebanon zuoya ni la.
17 Ani ka niis la maannɛ ba tɛɛd;
tiliilʋŋ yir bɛ nɛ tiis la zug.
18 Sian'arin bʋʋs bɛ nɛ zuobanɛ wa'am la ni;
ka tampiins la sian'asim an bʋnkɔnbbaanlʋg suak zin'ig.
19 Nwadig la pa'an ʋʋn nɛ sɛɛung,
ka winnig la mɛ mi' o kpɛn'ɛb saŋa.
20 Fʋnɛ mɔr liki kenna, ka li lɛbigid yʋ'ʋŋ,
ka sian'arin bʋnkɔnbid yina gɔɔnd.
21 Gbigima la nwa'amidi bɔɔd si'el ye ba gban'e
ka ieed diib Wina'am san'an.
22 Winnig ya'a ti tans na ka ba zɔɔ lɛb;
ba lɛbidi digi ba su'asa zin'ig.
23 Ka nidib yʋ'ʋn yiti ba tʋʋma ni,
tʋmm ala hali ti paae zaam.
24 Fʋ tʋʋma la zu'oya, O Zugsɔba,
fʋ ya'am la pʋʋgin ka fʋ maali li wʋsa;
dunia la pɛ'ɛl nɛ bʋn linɛ ka fʋ maal la.
25 Atɛukʋ dig la, li zu'onɛ ka yalim,
ka bʋnvʋya banɛ pʋ mɔr kal bɛɛ ani,
bʋnvʋbɛda nɛ bʋnvʋbaanlʋg wʋsa bɛɛ ani.
26 Ani ka anrima dɔlli ken ka lɛbid,
ka bʋntita'ar kanɛ ka ba buon Lɛviatan la bɛ ku'omin la,
ka maan o ya'amin ani.
27 Bama wʋsa gɔsidi fʋ
ye fʋ tisi ba diib saŋa kanɛ nar.
28 Fʋ ya'a ti tisi ba,
ba na la'asi li;
fʋ ya'a laki fʋ nu'ug,
ba tigid bʋnsʋma wʋsa nɛ li buudi.
29 Fʋ ya'a fɛndigi fʋ nindaa su'a,
dabiem kpɛn'ɛdi ba nɛ;
fʋ ya'a yisi ba vʋ'ʋsʋm,
ba na kpi ka lɛb titanin.
30 Fʋ ya'a tʋmmi fʋ siig la na,
o na maali ba,
ka tɛndig teŋgbauŋ la ka li an bʋmpaalig.
31 Zugsɔb la na'am paŋ na bɛ saŋa wʋsa;
Zugsɔb la mɔr sumalisim o tʋʋma ni.
32 Onɛ ɛɛnti gɔs teŋgbauŋ ka li dammid la,
ka si'isid zuoya ka nyɔ'ɔs yit la.
33 M na yʋ'ʋm tis Zugsɔb la m nyɔvʋr bɛn wʋsa;
m na yʋ'ʋm zun'e m Wina'am la ti paae m vʋm naar.
34 Kɛl ka man tɛn'ɛsid si'el tigi fʋ nini,
bɔzugɔ, m maannɛ sumalisim fʋn Zugsɔb la ni.
35 Amaa tʋʋmbɛ'ɛd dim la na bɔdig teŋgbauŋ nwa ni
ka bugusnam lɛn kae.
O m siiga, zun'om Zugsɔb la.
Zun'omi Zugsɔb la, haleluya!