Yʋʋm kanɛ pa'an Zugsɔb la nɔŋilim an si'em
103
1 Wɔ'ɔgim Zugsɔb la, O m siiga;nɛ linɛ bɛɛ m ni wʋsa
wɔ'ɔgimi o yʋ'ʋr kanɛ an kasi la!
2 Wɔ'ɔgim Zugsɔb la, O m siiga,
ka da tam o nyɔɔdi an si'em wʋsaa,
3 onɛ kɛti m taali basid
ka ti'ebidi m ban'as wʋsa la.
4 O faanmi yis kum pʋʋgin
ka pidim nɛ nɔŋilim nɛ nimbaanlzɔɔr wʋʋ zupibig nɛ.
5 O kɛt ka m nyɛt bʋnsʋma linɛ ka m ya'amlɛog bɔɔd,
ka m paŋ lɛɛ tɛndigid nwɛnɛ silʋg paŋ nɛ.
6 Zugsɔb la tʋmnɛ pʋpielim nɛ sida
tisid banɛ bɛ mugusʋg pʋʋgin.
7 O da nɔk o suoya pa'al Moses,
ka kɛ ka Israel dim baŋ o tʋʋma.
8 Zugsɔb la anɛ nimbaanlzɔt nɛ suguru sɔb,
o sʋnf pʋ pɛligid tɔ'ɔtɔɔ, ka o nɔŋilim mɛ zu'oe.
9 O pʋ zɛrigidi ti saŋa wʋsa;
o mɛ ka' onɛ ka o sʋʋnr duod nɛ ti saŋa wʋsa.
10 O pʋ namisidi ti wʋʋ lin nar ye o niŋi ti si'em
bɛɛ kɛ ka ti di'e tinamɛ pɔ'ɔg si'em la yɔɔdɛ.
11 Nwɛnɛ agɔla lal nɛ teŋgbauŋ si'em la,
ala ka o nɔŋilim mɛ zu'oe tis banɛ na'asid o la.
12 Nwɛnɛ ya-nya'aŋi lal nɛ ya-tuona si'em la,
ala ka o mɛ yisi ti tʋʋmbɛ'ɛd ka li lal nɛ ti.
13 Nwɛnɛ ninsaali nɔŋ o biis si'em la,
ala ka Zugsɔb la mɛ bɔɔd banɛ na'asid o la.
14 O mi' on da nɔk si'eli maali ti;
o tɛnr ye ti anɛ titan ma'aa.
15 Ya'a kpɛlim nɛ tinama, ti nwɛnɛ mɔɔdnɛ;
ti nɔbigidi nwɛnɛ puum banɛ bɛ mɔɔgin,
16 ka sisi'em da'ae li mɔri gaad,
ka sɔ' kʋ lɛn nyɛɛ li ya'asɛ.
17 Amaa banɛ na'asid Zugsɔb la,
o nɔŋir pʋ naadi ba san'anɛ,
ka o sʋm la paad zʋmaana wʋsa,
18 tis banɛ siak nɛ sida tis o nɔnaar la
nɛ banɛ sid dɔl o nɔzi'elʋg la.
19 Zugsɔb la digil o na'am gbauŋ arezana ni;
onɛ an na'anam wʋsa Na'ab.
20 Zun'omi Zugsɔb la, yanam banɛ aan o maliaknam la,
yanam banɛ mɔr paŋ nɛ kpi'euŋ
ka siak o nɔzi'elʋg,
ka kɛlisid on yɛt si'el la.
21 Zun'omi Zugsɔb la,
yanam banɛ aan o zabzabidib ka bɛ arezana ni la,
yanam banɛ aan o tʋmtʋmnib,
ka tʋmm o bɔɔdim la!
22 Zun'omi Zugsɔb, yanam banɛ ka o maal la wʋsa
nɛ zin'ibanɛ ka o gɔsid la wʋsa.
M siiga, zun'om Zugsɔb la!