Onɛ bɛ namisʋgʋn winsɔsʋg
102
1 Wʋmi m sɔsʋg, Zugsɔbaa,kɛlisimi m kaasig ka sʋŋim!
2 M ya'a bɛ yɛla ni,
fʋn da basi ma!
Kɛlisimi m buolʋg,
ka siak tɔ'ɔtɔ tisim!
3 Bɔzugɔ, m dabisa gatnɛ tɔ'ɔtɔ wʋʋ nyɔ'ɔs nɛ;
ka m niŋgbina zabidi nwɛnɛ bugum la'aŋ nɛ.
4 M nwɛnɛ mɔɔd linɛ kʋdigi daae dig teŋin la,
ala ka m sʋʋnr san'am hali,
ka m pʋtɛn'ɛr pʋ lɛn tɛn'ɛsid diib yɛlaa.
5 Man ʋʋnsid si'em la
kɛnɛ ka m niŋgbina sie kpɛlim kɔnba ma'aa.
6 M nwɛnɛ pipirisin viiug,
ka nwɛnɛ niimbia kanɛ bɛ dabɔɔdin.
7 M dignɛ, amaa gbɛɛm kae,
ka yʋ'ʋn nwɛnɛ niiŋ kanɛ ya'a dɔɔg zug.
8 M dataas la tʋ'ʋdim nɛ daar wʋsa;
banɛ la'adim la mɔri man yʋ'ʋri pɔɔd nɔɔri tisid nidib.
9 Tampɛligim aan m diib
ka linɛ ka m nuud wʋsa gɛndig nɛ ninta'am.
10 Fʋ sʋnpɛɛn tita'ar la zug,
ka fʋ nɔkimi lɔbig kpikpɛŋ sa.
11 M yʋma la kennɛ nwɛnɛ zaam ma'asim
ka m kʋdigid tɔ'ɔtɔ wʋʋ mɔɔd nɛ.
12 Amaa Zugsɔba, fʋ anɛ na'ab saŋa wʋsa
zʋmaana wʋsa na tɛnri fʋ yɛla.
13 Fʋ na duoe ka Zion mɔrif nimbaanlig;
bɔzugɔ li paae saŋa kanɛ nar ye fʋ zɔɔ o nyɔɔg;
li saŋa sid paae ya.
14 La'am nɛ teŋ la san'am la
fʋ tʋmtʋmnib la nɔŋi li tandia'ana;
ka lin lieb titani dig si'em la mɔri ba nimbaanlig.
15 Tɛɛns wʋsa na zɔt Zugsɔb la yʋ'ʋr
ka dunia na'anam na na'asid o na'am paŋ la.
16 Zugsɔb la na lɛbisi mɛ' Zion tempʋʋg
ka nie pa'al o mɛŋ nɛ o na'am pipilim la.
17 O na wʋm banɛ ka' sʋŋir la winsɔsʋg;
ka kʋ nɛ'ɛsi ba sɔsʋgɔ.
18 Kɛl ka nɛ'ɛŋa sɔbi digi tis zʋmaana banɛ na ti duoe na,
ka nimbanɛ ka ba nam pʋ du'a ba la na dʋ'ʋs Zugsɔb la yʋ'ʋr.
19 “Zugsɔb la bɛ nɛ o yir linɛ bɛɛ agɔl la ka gɔsid teŋin na,
o bɛ nɛ arezana ni ka gɔsid teŋgbauŋ la,
20 ye o wʋm banɛ bɛ sanrega ni la ʋʋnsʋg
ka yis banɛ ka ba kʋʋs ye ba kpi la bas.”
21 Ala ka Zugsɔb la yʋ'ʋr na nie nyain yit Zion tempʋʋgin
ka ba dʋ'ʋs o yʋ'ʋr Jerusalem teŋin,
22 saŋkan ka nidib nɛ na'am sʋ'ʋlim wʋsa na ti la'as
ye ba pʋ'ʋs Zugsɔb la.
23 Zugsɔb la kɛnɛ ka m tadig ka nam pʋ kʋdigɛ;
ka nwaae m yʋma ka li an giŋa.
24 Ala ka m yɛl ye,
“O m Wina'am, da nɔki m nannanna
dabisa banɛ ka m bɛ la sʋʋginɛ;
fʋ kʋdim bɛ nɛ ala zʋmaana wʋsa.
25 Pin'ilʋgʋn ka fʋ da digil teŋgbauŋ la ɛɛnbir,
ka fʋ nu'us maal saŋgbana la wʋsa.
26 Ba na bɔdig amaa ka fʋ nan kpɛn bɛ;
ba wʋsa na ti kpii nwɛnɛ fuug nɛ.
Ba nwɛnɛ fuud ka fʋ na tiak
ka nɔki ba bas.
27 Amaa fʋn anɛ fʋ naŋ-naŋ,
ka fʋ yʋma kʋdim kʋ naae.
28 Fʋ tʋmtʋmnib la biis na duoe na paaf;
ka ba yaas na duoe na nyɛ zi'esim fʋ nini ni.”