Wina'am, zɔmim nimbaanlig
57
1 Zɔmim nimbaanlig, O Wina'am, zɔmim nimbaanlig,bɔzugɔ fʋ ni ka m su'adi m mɛŋ.
M na su'a m mɛŋi fʋ kpʋkpama lɛuŋʋn
ka yɛlpakir ti gaad.
2 M kaasi tis Wina'am Onɛ Gaad Si'el wʋsa,
m na sɔs Wina'am
onɛ maan linɛ ka o gban'e ye o maali tisim la.
3 O na naan arezana ni tʋm sʋŋiri faanm,
ka nyaŋ banɛ kati dɔllim la tisim.
Kɛl ka Wina'am pa'al o nɔŋilim nɛ yɛlsida tisim.
4 M bɛ nɛ gbigima buugin,
m dignɛ nɛ bʋnyuos;
nimbanɛ ka ba nyina an wʋʋ kpana nɛ piema nɛ,
ka ba zilima nwɛnɛ zaba sʋ'ʋg kanɛ dit hali.
5 O Wina'am, kɛl ka fʋ yʋ'ʋr la dʋʋ paae saŋgbana;
kɛl ka fʋ na'am pipilim la pɛ'ɛl teŋgbauŋ la wʋsa.
6 Ba yadig asau ye ba gban'e m nɔba;
ka m sʋnf san'am hali.
Ba tunɛ bʋmbɔki m suorin;
amaa ba mɛŋ lɛbi lii ani.
7 M sʋnf lɔnɛ viki fʋ yɛla, O Wina'am,
m sʋnf sid lɔnɛ yim,
m na yʋ'ʋm yʋʋma zun'ʋf.
8 M siiga, duom!
Duomi, yanam banɛ nwɛ'ɛd kɔna nɛ duundis la!
M na duoe bɛkɛung asuba yʋ'ʋm yʋʋma.
9 Zugsɔba, m na dʋ'ʋsi fʋ yʋ'ʋr tɛɛns la sʋʋgin,
ka yʋ'ʋmmi fʋ yɛla nidib buudi wʋsa sʋʋgin.
10 Fʋ nɔŋilim la zu'onɛ, li wa'ami gaad saŋgbana la;
ka fʋ sida la dʋʋ paae agɔla.
11 O Wina'am, kɛl ka fʋ yʋ'ʋr la dʋʋ paae saŋgbana;
ka fʋ na'am pipilim la pɛ'ɛl teŋgbauŋ la wʋsa.