Wina'am na tɛɛg bugusnam tʋba
58
1 Yanam banɛ an na'anama, ya sid pian'adnɛ sidaa?Ya kat nidib saria ka li dɔl suorɛɛ?
2 Ayei, ya pʋtɛnda ni ya gban'ar wʋsa pʋ dɔl suorɛ,
ya nu'us ieed zaba teŋgbauŋ la zug.
3 Hali bugusim dim la pʋn bɔdig nɛ ba du'am saŋa;
ba du'am saŋa sa ka ba pʋn anɛ ninyaalis nɛ ziri dim.
4 Ba nɔɔr tɔi nɛ wʋʋ yabid nɛ,
ka nwɛnɛ dunduug kanɛ li' o tʋba ka pʋ wʋmma,
5 hali tiim sɔb ya'a bɛlisidi ba si'em,
ba pʋ wʋm o kʋkɔrɛ.
6 Kɔɔmi ba nyina la ba nɔya ni, O Wina'am;
vɔɔm gbigima la nyina, O Zugsɔba!
7 Kɛl ka ba mɛlim wʋʋ ku'om na pʋbigi gaad si'em la;
ba ya'a tɛɛg tiraug, fʋn kɛl ka ba piema la gbi'ilim.
8 Kɛl ka ba nwɛnɛ wilisʋŋ ka bian'ar mɔri gaad
ka nwɛnɛ bikpiilʋŋ ka ba du'a ka o pʋ nyɛ winniga.
9 Wina'am na uusi ba kpɛɛmnam nɛ ba biis la tɔ'ɔtɔ
wʋʋ ban na dʋgʋl dʋk ka walim yit si'em la.a
10 Ba sam yɔɔb la ya'a ti paae, pʋpielim dim na mɔr sumalisim,
daakan ka ba na sig bugusim dim ziimin buugi gaad.
11 Ani ka nidib na yɛl ye, “Sida, pʋpielim dim la di'e ba yɔɔd;
Wina'am onɛ kat teŋgbauŋ saria nɛ sida la sid bɛ.”