Winsɔsʋg linɛ bɔɔd sʋŋir Wina'am san'an
59
1 O Wina'am, faanmim m dataas la nu'ugin;gurim ka banɛ duoe zi'e m yɛla la da nyɛɛ ma.
2 Yisimim tʋʋmbɛ'ɛd dim la nu'usin
ka faanm ninkʋʋdib la nu'usin.
3 Gɔsim ban dig si'em gurim!
Nimbɛ'ɛdnamɛ gu'udim
ka m mɛ pʋ maali ba bɛ'ɛdɛ.
4 M pʋ maali ba bugusim,
la'am nɛ wala, ba mɔɔd ye ba zab nɛ m.
Duom sʋŋim,
ka gɔsi maali m yɛl la tisim!
5 O Zugsɔb onɛ an Paŋtita'ar Sɔb, ka an Israel Wina'am,
duom zi'enɛ fʋ mɛŋ ka namis tɛɛns la;
da zɔ bugusnam la nimbaanliga.
6 Zaam ma'aya, ka ba lɛb na
ka nyiigid nyina wʋʋ baas,
ka su'adi giligid tempʋʋg la.
7 Gɔsim yɛlbɛ'ɛd linɛ yiti ba nɔɔrin na,
ba nɔɔr pian'ad nwɛnɛ sʋ'ʋsi nwaad nidib,
ka ba yɛt ye, “Anɔ'ɔn na wʋmi ti pian'ad la?”
8 O Zugsɔba, fʋ la'adi ba nɛ;
fʋ nɛ'ɛs tɛɛns la wʋsa.
9 Fʋnɛ aan m paŋ, fʋn ka m gɔsid;
O Wina'am, fʋnɛ aan m suak zin'ig,
10 nɛ m Wina'am onɛ an nɔŋilim sɔb.
Wina'am na gaadi m tuon
ka kɛ ka m nyaŋi m dataas.
11 Amaa da kʋʋ ba, O Zugsɔb onɛ lusidi ti,
ya'a ka' ala m nidib la na tam.
Fʋ paŋ tita'ar la na kɛ ka ba yirid yɔri-yɔri,
ka kɛ ka ba yʋ'ʋn sig teŋin.
12 Tʋʋmbɛ'ɛd linɛ yiti ba nɔya ni la zug,
nɛ ba nɔŋgbana pian'ad si'el la zug,
kɛl ka ba nyɛɛsim la gban'e ba.
Ban pɔɔd nɔya ka ma'ad ziri si'em la zug,
13 fʋ sʋnpɛɛn na kanbi ba wʋʋ bugum nɛ,
li na dii ba ti naae nyain.
Ala ka dunia wʋsa na baŋ ye
Wina'am sʋ'oe Jakob yaas la.
14 Zaam ma'aya, ka ba lɛb na
nyiigid nyina wʋʋ baas nɛ,
ka su'adi giligid tempʋʋgin la.
15 Ba zɔti giligidi ieed diib,
ka ba ya'a pʋ tigɛ ban wuunnɛ wʋʋ baas nɛ.
16 Amaa man na yʋ'ʋmmi fʋ paŋ la yɛla,
bɛog ya'a nie m na yʋ'ʋmmi fʋ nɔŋilim la yɛla;
bɔzugɔ fʋnɛ aan m suak zin'ig,
fʋ san'an ka m su'ad mugusʋg saŋa.
17 Fʋn onɛ aan m paŋa, m yʋ'ʋmmi zun'odi fʋ yʋ'ʋr;
O Wina'am, fʋnɛ aan m suak zin'ig,
nɛ Wina'am kanɛ nɔŋim saŋa wʋsa.