Wina'am ka m tis sida, ka kʋ zɔt dabiem
56
1 Zɔmim nimbaanlig, O Wina'am, ka nidibi katim,dabisir la wʋsa ba zabid nɛ mam.
2 Banɛ ma'ad ziri tisidim la katimnɛ saŋa wʋsa,
a-pa'alim-mɛŋ dim zabid nɛ man.
3 Dabiem ya'a ti mɔrim saŋa si'a wʋsa,
man na ti'enɛ fʋn.
4 Wina'am la yʋ'ʋr ka m dʋ'ʋsid,
Wina'am la ka m tis sida, ka kʋ zɔt dabiem.
Ninsaal na maalim bɔ?
5 Saŋa wʋsa ba tia'asidi m pian'ad
ka gban'adi m yɛla bɛ'ɛd.
6 Ba su'anɛ gban'adi m yɛla,
ka gɔsidi m nɔba yakir,
ka mɔɔd ye ba kʋʋm.
7 Ba tʋʋmbɛ'ɛd la zug da kɛ ka ba pɔnsɛ;
O Wina'am kɛl ka fʋ sʋnf duoe nɛ tɛɛns nwa ka ba wʋsa li.
8 Sɔmmi m fabʋlʋg la;
nɔkimi m ninta'am niŋi fʋ waa la pʋʋgin;
li yɛla pʋ sɔbi fʋ gbana la nii?
9 Ala ka m ya'a ti buonnɛ fʋ bɔɔd sʋŋir
m dataas la na lɛb nya'aŋ.
Ala ka m na baŋ ye Wina'am la bɔɔdi m yɛla.
10 Wina'am la yʋ'ʋr ka m dʋ'ʋsid,
nɛ Zugsɔb kanɛ ka m dʋ'ʋsid o pian'ʋk la.
11 Wina'am la ka m tis sida, ka kʋ zɔt dabiem;
ninsaal na maalim bɔ?
12 M na maal man daa kaanbi zi'el si'el la, O Wina'am,
m na tisi fʋ m bareka pʋ'ʋsim piini la.
13 Bɔzugɔ fʋnɛ yisim kumin
ka pʋ kɛ ka m nɔba tu'ugɛ,
ye m ken Wina'am tuon
vʋm linɛ an nɛɛsim dunia kaŋa ni la.